2
1 * Efe 4:22; Yem 1:21Máan tukhen mifo minó namu avúavá bá kampun ma siantan avúavá bá ifasá ono. Ída vá kama avúavá anan bariyá bá uno seno. Baya ana ma siren ída varan avúava safi ena ma namu inin mamantan nafi ena ina yaná ma kampun tiren baran avúava safi vá oyan ameno. 2 Arará iyampon mano ma nan anu máa niyáken e inoriyain an deya vá monó avúavápin e inoresin ná Tiyarafenu ano siretin aya uren evaránen avirano. 3 * Íbo 34:8Tiretí ankan taréa Bafani kama avúavá inka afová e ono.
Ákona Onámanáká Ma Má Uvaran Baya Ino
4 Yisas Karaisi ano Tiyarafenui monó namuntá ákona namádaní ukháin mi vanasi ano namu ukhen ne siren do éken mino. Máan turan Tiyarafenu avorá kama ukhen baréin béin aní ukhen mifo ve vain tasá ereno.
5 * Efe 2:21-22; Rev 1:6Tiyarafenu ano siretimpó deren maman bei ákona namádaní uren mi ven ma monó tiantan namun uvariyan mino. Yisas Karaisi ma varein avúavákái Tiyarafenu ano siretin maman kantasí ukhein monó doran banta kékasí uren mi véi ma íkun uan amiyaona van amusin iyan mino. 6 * Efe 2:20Mai fara vara seyo, Tiyarafenui vompon dókifin tian amá ukhen mino.
“Onano. Yerusaremí* Yerusaremie ma siyain baya mai Saioni sen tiyan mino. barurá mana onámaná aní uré
maman ákona namádan an daré dafédékun bain
béintá ma mumunan in nain kéká ano
ída ayave van inten mino.” Ais 28:16
7 Mai ma veni vaya iniren oyan amiyain kéká ina va van naifo mumunan ma iyaona kékái kama yanái van mino.
“Má uvaran banta kayo ano ma yo maman karúdein onámaná ano
maman má dádaimpin mana ákona onámanasí ukhen mino.” Íbo 118:22
8 Inká Tiyarafenui vompon dóki ano evaránen máa sikhen mino,
“Banasi arantantá duádan ma eyúpó en ankamé iyain onámanái véi van mino.
Inká mai ma vanasi ano eraven ankamé iyain onámaná ino.” Ais 8:14
Betí ankan ma Tiyarafenui vaya ída inintin mi mai avúavá afoká inten ne sikháin mai avúavá afokáen mino.
9 * Diu 7:6; 14:2; Ais 9:2; Apo 26:18; Efe 5:8Máan ten mifo siretí ankan mai ma einisa ukha va ono. Ída ino. Para vara seyo, Tiyarafenu ma kin bain manon tiretí ankan aní urayan beni monó doran bantaí uveyan tireti má inká beni kantasí ukhein nanin banta vá ano ven ninaí ukha ono. Máan tukhantin Tiyarafenu ano ma yuntein avúavá pintena avían bei kakhakhein avúavápin ma kaúdákantiya kasae veni kama avúavá ena nanin banta aní inono.
10 * Ose 2:23“Pefá tiretí ankan banasi va vare va ono.
Taréa siretí ankan Tiyarafenui vanasin ba ono.
Pefá tiretí ankan Tiyarafenui arunaná ída mantare
saréa veni arunaná inka vare ono.”
11 * Kar 5:17, 24Téi ma sinunu ukheruna sirona kéka soe, siretí ankan ena vara fákéi e van ná namu avúava sinta ano ma siretíi au anunu vá aruviyain nan mi nentá bano van ákonaé tiamiyá uno. 12 * Mat 5:16Afokhampin ma vain nanin bantafin ma váke yafían ákona ukheya vá bano. Tiretí ankan ma Tiyarafenu aví daníin avúavá bariyanona van ída kama iyan ne siyaren maen Tiyarafenu ma vanasii avúavá me yaimin nain damúi siretin nan kama avúavái variyaren ne siren mumunan iyáken Tiyarafenu aví daní inten mino.
Banasirá Ma Yafíkein Kékái Aránaopá Ma Van Baya Ino
13 * Tai 3:1Kin manon minó danáká dafíkein bákan béi ma siamin nain baya kayoi aránaópá ana vano van mi Bafan mano inikhen mino. 14 Máan tukhan kin mano vei yoran banta kéká aní uran ban mifo mai kayo aránaópá dere vá bano. Mai fara vara seyo, mai ma namu avúavá baran nain kéká uman amiyáken kama avúavá ma varan nain kéká maman daní ino van mi vetin tiantan erikhen mino.
15 * 1Pi 3:16Para vara seyo, siretí ankan ma kama avúavá baran nona ano mai ma oyampá baya sin nain kékái oorá iyarano van mi Tiyarafenu ano anunu ukhen mino. 16 Tiretí ankan miyan ída van doran banta kéka saono. Ída ino. Tiretin inka útúantaya va ompo ída vá inka útútintá bá uno sire namu avúavá bariyáke vá Tiyarafenui yoran banta kékasí ukhe yoriya vano. 17 * Rom 12:10Ena nanin banta aráopá ma van avúavá aní iyákeya vá monópin ma vain kékasá avábá ono. Tiyarafenu van periya vá kini aránaópa sá bano.
Miyan Ída Van Doran Bantai Vaya Ino
18 * Efe 6:5Miyan ída van doran banta kéká ma vanteya siretíi ayafa aránaópa sá bano. Ída vá mai ma kama avúavá aní iyáken doran amin nain kékái yoran mana varano van ono. Mai ma yoran barano van duvun in nain kékái vaya yere vá ineno. 19 Mai fara vara seyo, siretí ankan kamá iya fo áa namú iya fo mai kama ineinen iyákeya manaí ukhein avúaváká anan míkani yoran bariyan nan mi Tiyarafenu ano amusin iyan mino. 20 * 1Pi 3:14, 17Tiretíi namu avúaváká ma uman bariyare ída mana miyan o varan nompo kama e váke ma funtákein avúavá bariya ma uman bariyaré esin mi Tiyarafenu ano siretin nan amusin inten mino.
21 * Mat 16:24; Yon 13:15Mai uman barano van mi Tiyarafenu ano siretin arakhen mino. Para vara seyo Yisas Karaisi ma siretí ankan nan uman mantein manon tiretin aní ukhen mifo véin ánain ná dakhafono.
22 “Béi ída umeí iyáken
manáa kéká ída mákáken mino.” Ais 53:9
23 * Ais 53:7; 1Pi 3:9Béin ma asiyákan anona ída asikharen mino. Inká béin ma uman amiyákan anona ída uman amikharen mino. Mai ma funtákein avúaváká kó tiantan banta Tiyarafenu ayampin mi vei uman kaen mino. 24 * Ais 53:5-6; Rom 6:11Tetin nan ume avúavá me ampiren puntákein avúaváká bano van mi veyantá tetisi ume maman be aurá kaúden baren daa unkamádantá un puren mino. Béin ma arein afun kayo anon tiretin ayofen mino. 25 * Isi 34:5-6; Mat 9:36; Yon 10:14; Ibu 13:20-21Para vara seyo siretí ankan aiyókein sipisipi an deya kufa ukhare ompo saréa evaráneya sipisipirá ma yafisin banta an den ma siretíi aúká dafisin banta vaípái orikha ono.