3
Yo꞉n eyo꞉ towo꞉ wido꞉
Madi 3.1-12, Mak 1.1-8, Yo꞉n 1.19-28
1 Sisa Taibelias e Lom misa꞉ kalu bo꞉fo꞉likilo꞉ eleno꞉, donayo꞉ do꞉la꞉ta꞉ga꞉ bila꞉fo꞉ gulula꞉sa꞉ga꞉yo꞉, Fondias Failat e Yudia hen a꞉namio꞉ gamani misa꞉ sen. O꞉g a꞉namio꞉ Ha꞉lod e Ga꞉lili hen a꞉no꞉ e bo꞉fo꞉liki, ene ao Filib e Idulia o꞉lia꞉ Takonitis hen a꞉la꞉ a꞉no꞉ e bo꞉fo꞉len. A꞉la꞉ta꞉ga꞉ Lisanias e Abilene hen a꞉no꞉ e bo꞉fo꞉len. 2 Kaiafas o꞉lia꞉ Anas o꞉lia꞉yo꞉ bobalo꞉ so꞉mea꞉sen misa꞉ kalu dowab ho꞉len a꞉namio꞉, Sekalayaya꞉ inso꞉ Yo꞉n e kalaleli hen a꞉na sabiki, Godeya꞉ towo꞉ eya a꞉la꞉ta꞉ga꞉ fa꞉la꞉dowo꞉. 3 Ilig 13.24A꞉la꞉fo꞉ko꞉lo꞉ eyo꞉ ho꞉n Yodan anib doba꞉da꞉lo꞉ amisa꞉n a꞉na wida꞉i sia꞉likiyo꞉, “Gode eyo꞉ gili mogago꞉ dimida꞉sen a꞉no꞉ hala꞉ma꞉ki, gio꞉ asulo꞉wo꞉ nodolaki, ho꞉na to꞉loma” a꞉la꞉sa꞉la꞉liki wida꞉i ane. 4 Ais 40.3-5Dinali sa꞉lan kalu Aisaya eyo꞉ a꞉la꞉sa꞉sa꞉lo꞉,
“Kalu imilig nowo꞉ kalaleli hen a꞉na iliki
ho꞉le sa꞉lakiyo꞉,
‘Kalu Alando꞉ mia꞉no꞉ togo꞉ dinafama.
Tog a꞉no꞉ digale fadaifoma.
5 Hen gagodo꞉ a꞉no꞉ tambo ko꞉le alifelaki,
hen misio꞉ a꞉no꞉ tambo dali ko꞉nela꞉bi.
Tog kowagelo꞉wo꞉ digale imili fadaitaki,
tog mogago꞉ a꞉lab a꞉no꞉lo꞉ dinafale fadaita꞉bi.
6 A꞉la꞉dimidalikiyo꞉ Godeya꞉lo꞉ asuwa꞉takilo꞉ gasilian man a꞉no꞉ henfelo꞉ kaluka꞉isaleyo꞉ tambo ba꞉ba꞉ib.’ ” *Aisaya 40.3-9
Aisaya eyo꞉ Yo꞉n elo꞉ nanog dia꞉nigab a꞉no꞉ ko꞉lo꞉ asulaki, to a꞉no꞉ a꞉na sa꞉sa꞉lo꞉.
7 Madi 12.34,23.33Kaluka꞉isale modo꞉ a꞉no꞉ Yo꞉n elo꞉wa ho꞉na to꞉loma꞉ki mio꞉ ko꞉lo꞉, Yo꞉n eyo꞉ imo꞉wo꞉ a꞉la꞉sio꞉, “Gio꞉ kisa꞉wa꞉lo꞉ o꞉ngo꞉ dowo꞉. Godeya꞉lo꞉ mo꞉walilakilo꞉ falasila꞉ma꞉nigab a꞉no꞉, gio꞉ begele alita꞉ga꞉ hamana꞉kiyo꞉ abe hagugu sio꞉wo꞉? 8 Yo꞉n 8.33,39Gio꞉ Godeya꞉ gadio꞉wo꞉ tininima꞉nikiyo꞉, asulo꞉ nodolo꞉ a꞉ma꞉ fo nafayo꞉, gililo꞉ man dimidan us a꞉namio꞉ fowo꞉ hele alita꞉bi. Ablahamo꞉ nili ma꞉mu ko꞉lo꞉ nio꞉ o꞉li sili alifa꞉no꞉ a꞉la꞉likiyo꞉ gegelebo꞉ sa꞉la꞉lowa꞉so꞉bo. Niyo꞉ gimo꞉wo꞉ a꞉la꞉so꞉lo꞉l. Gode eyo꞉ Ablahama꞉ ema꞉mu i nolo꞉ u wena a꞉la꞉ta꞉ga꞉yo꞉ o꞉lika fa꞉la꞉do alifa꞉ib. 9 Madi 7.19Kabiyo꞉ imo꞉ amio꞉ o꞉ma dia꞉fo꞉lab ko꞉lo꞉, iyo꞉ tambo fo nafalo꞉ mo꞉hedab a꞉no꞉ gegedelia꞉ga꞉ deya gilima꞉ib.”
10 Yo꞉n eyo꞉ a꞉la꞉sa꞉labiki, kalu kegeo꞉ iliyo꞉ emo꞉wo꞉ a꞉la꞉dabu ba꞉ba꞉, “A꞉la꞉go꞉lo꞉biki, niliyo꞉ waga dimidama꞉no꞉wa꞉le?”
11 Eyo꞉ a꞉ma꞉la꞉bo꞉ a꞉la꞉sio꞉, “Kalu abeyo꞉ helebeso꞉g ka꞉la꞉seno꞉ a꞉la꞉ da꞉lalega, nowo꞉ kalu aundo꞉ma dowab emo꞉ dimia꞉bi. A꞉la꞉ta꞉ga꞉ kalu ge ma꞉no꞉wo꞉ da꞉lalega, a꞉la꞉ka dimida꞉bi” a꞉la꞉sio꞉. 12 Luk 7.29A꞉la꞉ta꞉ga꞉ takis molelo꞉ dia꞉sen kalu nolo꞉ Yo꞉n elo꞉wa ho꞉na to꞉loma꞉ki mio꞉ ko꞉lo꞉, iliyo꞉ Yo꞉nbo꞉wo꞉ a꞉la꞉dabu ba꞉ba꞉, “Widan kalu, niliyo꞉ waga dimidama꞉no꞉wa꞉le?” 13 Eyo꞉ imo꞉wo꞉ a꞉la꞉sio꞉, “Giliyo꞉ gamani kaluwa꞉lo꞉ saefa꞉ o꞉leauka dia꞉bi. Moleyo꞉ wa꞉l amio꞉ nolo꞉ bama꞉kiyo꞉ ha꞉iya꞉so꞉bo.” 14 Da꞉la꞉di kalu nolba꞉yo꞉ Yo꞉nbo꞉wo꞉ a꞉la꞉dabu ba꞉ba꞉, “Niliyo꞉lo꞉ waga dimidama꞉no꞉wa꞉le?” A꞉la꞉da꞉dabiki eyo꞉ imo꞉wo꞉ a꞉la꞉sio꞉, “Mole gimo꞉lo꞉ kililia꞉sen o꞉leauka dia꞉no꞉ sagala꞉bi. Giliyo꞉ mole nolo꞉ dia꞉no꞉ a꞉lakiyo꞉, go꞉no꞉n halaido꞉wa꞉yo꞉ susuda꞉so꞉bo. A꞉la꞉ta꞉ga꞉ dikili sa꞉lakiyo꞉ diga꞉lila꞉so꞉bo.”
15 Kaluka꞉isale iyo꞉ sagala꞉liki yasisen ko꞉lo꞉ ili asulo꞉ amio꞉ “Yo꞉n e Godeya꞉lo꞉ Da꞉feyo꞉ Kaluwo꞉ weya꞉le?” a꞉la꞉asula꞉len. 16 Ilig 13.25A꞉la꞉fo꞉ko꞉lo꞉ Yo꞉n eyo꞉ imo꞉wo꞉ a꞉la꞉sio꞉, “Niyo꞉ gio꞉ ho꞉ndeya to꞉lola꞉lo꞉l. Ko꞉sega kalu ni fa꞉s amilo꞉ mia꞉nigab a꞉ma꞉, ene halaido꞉wo꞉ alan ko꞉lo꞉, ne e tiniab. Ne wilo꞉ma kalu ko꞉lo꞉, niyo꞉ e budi sa꞉ga꞉lo꞉ a꞉namilo꞉ me melealifa꞉ a꞉no꞉ ni fagela꞉ma꞉no꞉wo꞉ mo꞉ililo꞉. Eyo꞉ gio꞉ Mama Malilo꞉ o꞉lia꞉ de o꞉lia꞉ a꞉na to꞉loma꞉ib. 17 Eyo꞉ bebo꞉ dila꞉sa꞉ga꞉, wit fo hende a꞉no꞉ kegenema꞉no꞉ a꞉la꞉liki, uwa꞉fo꞉ e dagi amio꞉ ta꞉li sab. Eyo꞉ wit fo hende a꞉no꞉ kegea꞉sa꞉ga꞉, ene aya dia꞉fa꞉ib. A꞉la꞉ta꞉ga꞉ sebeb mogago꞉ o꞉da꞉lab a꞉no꞉, de mo꞉dalima꞉no꞉ a꞉lab a꞉na gilima꞉ib.” 18 Yo꞉n eyo꞉ to widakiyo꞉, tog ko꞉li ko꞉lilo꞉wa wido꞉. Eyo꞉ kaluka꞉isaleya꞉ asulo꞉wo꞉ digidalitakiyo꞉, Godeya꞉ to nafa a꞉no꞉ a꞉na wida꞉len.
Ha꞉lod eyo꞉ Yo꞉no꞉ dibolo aya disa꞉
19 Madi 14.3-4,Mak 6.17-18Yo꞉n eyo꞉ gamani misa꞉ kalu Ha꞉lodbo꞉wo꞉ a꞉la꞉sio꞉, “Ge gaowa꞉ inga Ha꞉lodias o꞉lia꞉lo꞉ mogago꞉ dimido꞉ a꞉no꞉ mo꞉lilo꞉.” Ha꞉lod elo꞉ man mogago꞉ ko꞉li ko꞉lilo꞉ nol dimida꞉sen a꞉no꞉lo꞉ tambo Yo꞉n eyo꞉ kalaba sio꞉. 20 A꞉la꞉sa꞉labiki Ha꞉lod elo꞉ mogago꞉ tamin amilo꞉ dimida꞉len a꞉no꞉ wa꞉ka a꞉kudu dimidakiyo꞉, Yo꞉n e dibolo aya to꞉lo alifa꞉.
Ya꞉suwo꞉ Yo꞉na꞉ ho꞉na to꞉lolo꞉
Madi 3.13-17, Mak 1.9-11
21-22 Yo꞉n 1.32Ho꞉len no amio꞉ Yo꞉n eyo꞉ kaluka꞉isale modo꞉ nolo꞉ ho꞉na to꞉lola꞉labikiyo꞉, Ya꞉su elo꞉ ho꞉na to꞉lolo꞉. To꞉lola꞉sa꞉ga꞉ Ya꞉su eyo꞉ Godemo꞉ dulugu sa꞉labikiyo꞉, Hebene a꞉no꞉ kolaetabiki, Mama Malilo꞉wo꞉, o꞉ba꞉ hi o꞉ngo꞉ ko꞉lo꞉ Hebene a꞉la꞉ta꞉ga꞉ dalolia꞉ tinda꞉ga꞉, elo꞉wa mio꞉. A꞉la꞉ta꞉ga꞉ to nowo꞉ Hebene a꞉la꞉ta꞉ga꞉ sa꞉lakiyo꞉, “Ge no꞉no꞉n so꞉wa ha꞉fo꞉lo꞉ disa꞉yo꞉ ge. Giyo꞉ ne mada sagale alitakigab” a꞉la꞉sio꞉.
Ya꞉suwa꞉ ema꞉mu i mio꞉wo꞉ we
23 Luk 4.22,Yo꞉n 6.42Ya꞉su e donayo꞉ do꞉ a꞉la꞉fo꞉wo꞉ otalen a꞉no꞉ gulula꞉sa꞉ga꞉yo꞉, Godeya꞉ towo꞉ a꞉na mo꞉mo꞉da wido꞉. Kaluka꞉isaleya꞉yo꞉ Ya꞉su e Yosa꞉ba꞉ ene inso꞉ a꞉la꞉asulo꞉.
24 Yosa꞉b e Heliya꞉ inso꞉.
Heli e Madada꞉ inso꞉.
Madad e Libaiya꞉ inso꞉.
Libai e Melkiya꞉ inso꞉.
Melki e Yanaiya꞉ inso꞉.
Yanai e Yosa꞉ba꞉ inso꞉.
25 Yosa꞉b e Madatiasa꞉ inso꞉.
Madatias e A꞉mosa꞉ inso꞉.
A꞉mos e Nahuma꞉ inso꞉.
Nahum e Hesliya꞉ inso꞉.
Hesli e Nagaiya꞉ inso꞉.
26 Nagai e Mada꞉ inso꞉,
Mad e Madatiasa꞉ inso꞉.
Madatias e Semena꞉ inso꞉.
Semen e Yosega꞉ inso꞉.
Yoseg e Yodaya꞉ inso꞉.
27 Yoda e Yoanaya꞉ inso꞉.
Yoana e Lesaya꞉ inso꞉.
Lesa e Selubabela꞉ inso꞉.
Sa꞉lubabel e Seadiela꞉ inso꞉.
Seadiel e Neliya꞉ inso꞉.
28 Neli e Melkiya꞉ inso꞉.
Melki e Adiya꞉ inso꞉.
Adi e Kosama꞉ inso꞉.
Kosam e Elmadama꞉ inso꞉.
Elmadam e Ela꞉ inso꞉.
29 El e Yosuaya꞉ inso꞉.
Yosua e Eliesaya꞉ inso꞉.
Eliesa e Yolima꞉ inso꞉.
Yolim e Madada꞉ inso꞉.
Madad e Libaiya꞉ inso꞉
30 Libai e Simeona꞉ inso꞉.
Simeon e Yudaya꞉ inso꞉.
Yuda e Yosa꞉ba꞉ inso꞉.
Yosa꞉b e Yonama꞉ inso꞉.
Yonam e Eliakima꞉ inso꞉.
31 Eliakim e Meleaya꞉ inso꞉.
Melea e Menaya꞉ inso꞉.
Mena e Madadaya꞉ inso꞉.
Madada e Natana꞉ inso꞉.
Natan e Da꞉ibida꞉ inso꞉.
32 Lud 4.17-22Da꞉ibid e Ya꞉siya꞉ inso꞉.
Ya꞉si e Obeda꞉ inso꞉.
Obed e Boasa꞉ inso꞉.
Boas e Salamona꞉ inso꞉.
Salamon e Nasona꞉ inso꞉.
33 Nason e Aminadaba꞉ inso꞉.
Aminadab e Admina꞉ inso꞉.
Admin e Aniya꞉ inso꞉.
Ani e Heslona꞉ inso꞉.
Heslon e Belesa꞉ inso꞉.
Beles e Yudaya꞉ inso꞉.
34 Yuda e Ya꞉koba꞉ inso꞉.
Ya꞉kob e Aisa꞉ga꞉ inso꞉.
Aisa꞉g e Ablahama꞉ inso꞉.
Ablaham e Telaya꞉ inso꞉.
Tela e Nahola꞉ inso꞉.
35 Nahol e Seluga꞉ inso꞉.
Selug e Leuwa꞉ inso꞉.
Leu e Belega꞉ inso꞉.
Beleg e Ebela꞉ inso꞉.
Ebel e Silaya꞉ inso꞉.
36 Mo꞉mo꞉ 11.10-26Sila e Ka꞉ina꞉na꞉ inso꞉.
Ka꞉ina꞉n e Alafasaga꞉ inso꞉.
Alafasag e Sa꞉ma꞉ inso꞉.
Sa꞉m e Noaya꞉ inso꞉.
Noa e Lamega꞉ inso꞉.
37 Lameg e Metuselaya꞉ inso꞉.
Metusela e Inoga꞉ inso꞉.
Inog e Yaleda꞉ inso꞉.
Yaled e Mahalalela꞉ inso꞉.
Mahalalel e Ka꞉ina꞉na꞉ inso꞉.
38 Mo꞉mo꞉ 4.25-26Ka꞉ina꞉n e Enosa꞉ inso꞉.
Enos e Sa꞉da꞉ inso꞉.
Sa꞉d e Adama꞉ inso꞉.
Adam e Godeya꞉ ene so꞉wa.