10
1 Nakunum kumel kunum waneng yutaka! Moses em kaleyemse sawa weng be sow em fein dem so auk so keloke eisneng beem kiskiw takak ete kuw te. Kasike, itol mak itol mak diwkuw diwkuw samal anko, aik ayem dim ka kel dukuko, mali im sili sili nam beem dulum elote Sunbin-Got elo dulewkabiliw kukuw beem mongom ete kukuyemin be ki keko, Sunbin-Got em wiin daolewkabiliw kawtiw ilo akalem kiin dim e kilele kiol kuw sen so banim kelinba kekabe te. 2 Kukuw be kawtiw biilo Sunbin-Got em kiin dim e fein kilele kiol kuw kele tewe, kawtiw i ikalem ibolow tem ka kel “Nu sen so banim kebuluw kai!”, angeko, samal im kaim so sili sili nam em yan wa kulu kolewomin kukuw beso, alik alik be atin kuw kolewkabiliw tew te. 3 Kate, kukuw beem mongom ete kawtiw i ikalem sili sili ibolow kukuw kelewsiliw be diwkuw diwkuw iti ibolow fukuneko, kilele akokow kelinba kelewkabiliw kasike. 4 Nimtew angom? Bulmakao imok so, meme so, samal alik alik biim kaim be ki keko, sili sili kukuw beem yan wa be kilele nam kulu koyemkabe kasike.*Kibulu 9:13 5 Beem dulum elote Kulais em kawin dim kaleelo talse ding dim kabalak e, e bokolomele:
“Sunbin-Got kutaka! Ku samal ansomi, aik ayem dim dukuko, kulo dukemkabuluw beem kukuw so,
mesesem eisneng kom mit de teleko, kulo dukakemin beem kukuw so,
kukuw alik alik be ibolow kelinba kekabelew te.
Kate, ku nakalem kal dim be memen kenemselew te.*Sim Fut 40:6-8
6 Feinka! Samal anko, aik ayem dim ka kel dukuko, atin kuw kainsomi, Sunbin-Got kulo, dukakemkabiliw kukuw so,
mali sili sili nam beem mongom ete samal anko, yan wa kulu kolewkemin beem kukuw beso,
kukuw alik alik be ku ibolow kelewinba kekabelew te.
7 Kasike ne bokolomeli:
‘Ne teleko, nem dulum elote angeko, sua kel fut ayem tem ka kel bosiliw em weng so, kom ibolow fukunin beso, alik alik be kilele gelewomin talsi te.’, angsi te.”,
angse kale. 8 Emisik ding dim kabalak e, Kulais e kukuyemin sawa beem “Yu kanelina!”, yangse weng beem dulum elote Sunbin-Got elo bokolewomele:
“Ku samal ansomi, aik ayem dim dukuko, kulo dukakemkabuluw em kukuw so,
mesesem eisneng kom mit de teleko, kulo dukakemin beem kukuw beso,
Samal anko, aik ayem dim kel dukuko, atin kuw kainsomi, kulo, dukakemkabiliw kukuw beso,
mali sili sili nam beem mongom ete samal anko, yan wa kulu kolewkemin beem kukuw beso,
alik alik kukuw be ku ibolow kelinba kekabelew te.”,
angse kale.*Kibulu 10:5-7 9 Angeko, iti weng mak so mak bokolomele:
“Ne kom ibolow fukunin be gelewomin talsi te.”,
angse kasike, e emisik kukuw be banim kelewei, kikis kukuw mak emisik beem abin kuluse te. 10 Kaneko kasike, Yesus Kulais e Sunbin-Got em fukunin be geleweko, num sili sili nam beem mongom ete makmak ding ete kuw akalem ete aik ayem dim ka kel dukulin tew keko, akalem kal dem be samal atew Sunbin-Got elo dulewse te. Dulewsomi, nulo diwkuw diwkuw Sunbin-Got em wiin so galmose te.*Kibulu 9:12
11 Keko beli, yu am yol aluwkabiliw kunum im aluwbamin be diw atemina! I diwkuw diwkuw yol am kawtem kel samal anko, aik ayem dim ka kel Sunbin-Got elo dulewkabiliw kate, im kanekabiliw kukuw be, sili sili kukuw em yan wa be atin kuw banim kelewinba kekabe te.*Aneng Kolew 29:38 12 Kate, Kulais e makmak ding ete kuw, num sua kel akal, sow akal, diwkuw diwkuw kekabuluw sili sili nam alik alik beem mongom ete aik ayem beem aluwbamin atew keko, kame Sunbin-Got em auk so yuk teing ka kel teinko, alakabe te. 13 Ka kel e, e Sunbin-Got em weng “Ku kame ding feneko, ne kom maka bi kom yan bin dil keyemeko, kom afak duloki te.”, dangse weng beem fein dem keloke ding feneko, alakabe te.*Sim Fut 110:1 14 Nimtew angom? Makmak ding ete kuw, e akalem ete samal emdiw Sunbin-Got elo dulewei, alik alik Sunbin-Got em wiin so galmoko, koyemse kunum waneng nulo beem deiw ete atin kuw kiol sen so banim kunum waneng keyemse kasike.
15 Yu Sunbin-Finik em nulo bokoyemse weng kale kililina! E kiinwalako, nulo weng mak bokoyemomele:
16 “Kitakamin weng kikis iso dukuyemkabi be kanekote:
Yu Kamok Fian nem weng kale kililina!
Beem ding dim bakate, nem kukuyemin weng be yom ibolow fukunin dim ka kel duyemsomi,
yom ibolow tem ka kel akal fut emdiw boyemoki te.”,
angeko,*Selemaya 31:33; Kibulu 8:10 17 iti weng mak so bokoyemomele:
“Im sili sili nam kekabiliw be atin kuw ibolow fukuninba kemoki te.”,
angse kale.*Selemaya 31:34 18 Angse kasike, yu kilele ibolow fukunina! Sunbin-Got e mali kunum waneng num sili sili kukuw kekabuluw be fein kulu koyeme tewe, nu kanelom sili sili beem yan wa kulu koyemeko, kaim buselemin deiw tikin mak fenokoluw te!
Sunbin-Got em Mit Mewso elo Keluma!
19 Nakunum kumel kunum waneng yutaka! Yesus e num gomet elote kuanse kasike, nu beem kaim buselse beem dulum elote kame ibolow kalaing kuw keko, finganinba kesomi, abiil tikin katem em am yol beem fokong kawtem “Atin kuw Ayem!”, dangsiliw kawtem elo unuma!*Kibulu 4:16 20 Kawtem elo unomin finik so bin duyemkabe deiw kikis be Kulais ete akalem kaim so wankese te. Nimtew angom? Em kal anggil kalat finggelse ding dim bakate, em kal be kiskiw emdiw kanese kasike. Kiskiw be kanekote: Sunbin-Got em am yol beem fokong kawtem alew biim awet kolewkabe ilim fian be akalem kal emdiw keko, bakati kalat finggelsomelei, Sunbin-Got em mit mewso unomin deiw bususe kasike.*Matyu 27:51
21 Yutaka! Nu kunum ayem fian sel so buluwi, e nulo kilele yetemkabe kasike, 22 nu kanelom ibolow tem tem keko, finganeko, “E ki keko, nulo fein dokoyemoke sako?”, angeko, neknek kemokoluw te! Babo! Nimtew angom? E nukalem sen so keko, Sunbin-Got eso ibolow ki kelinba ibolow fukunin be akalem kaim so songsong busel dayemeko, banimsomi, nulo Sunbin-Got em kiin dim e kiol kuw sen so banim kunum waneng keyemse kasike. Keko beli, nukalem kal anggil akal ok ati so kuayemin tew kese te.*Kunum Ayem 8:30; Esekiel 36:25; Efesus 5:26
23 Yu kililina! Nu nukalem weng “Nu em nulo dokoyemoke ding fenbuluw kai!”, angakabuluw weng be kilele aluwbuma! Nimtew angom? E nulo kitil weng mak bokoyemomele: “Yulo fein dokoyemoi te!”, yangse kasike. Feinka! E akalem weng bakal fein gelewoke kasike. 24 Kaneko beli, yu mali ilo kilelbi keyemeko, ibolow mutuk fian dulew dulew kukuw so, mali ilo kukuw ken kukulew kukulew kukuw beso, alik alik kukuw beem dulum elote “Neng so neng so kanelina! Mak so kanelina!”, yangboliwka! 25 Yangsomeliwi, yu kanelom mali kawtiw imdiw keko, beit kesomi, Sunbin-Got em wiin dim wensan kemin em kukuw be kolew kemokoliw te! Kate, yu “Kamok Fian em iti toloke ding kame mewso kele kasike!”, angeko, mali ilo weng tem tem bokolew bokolew kukuw be fian kuw kelewboliwka!*Kibulu 3:13
26 Nakunum kumel kunum waneng yutaka! Yu kilebiko, boliwka! Mali kawtiw i Kulais em kanese sang so, akalem weng beso, alik alik be kilele kal kesiliw kate, i beelo “Kanemok!”, dangeko, ikalem fukunin ete kuw geleweko, sakalaw keko, weng bo bo kukuw kemiw tewe, kanekabiliw kawtiw biim dulum elote sili sili kukuw beem kulu kolewemin em kaim buselemin deiw mak so banim te.*Kibulu 6:4-8 27 Feinka! Kaneloke deiw atin kuw banim kasike, i Sunbin-Got em awan ete finganeko, em geeyemoke ding feneko, Sunbin-Got em maka kekabiliw kawtiw im ais dong tem unomin em ding kuw fenkabiliw te.*Aisaya 26:11 28 Yu kilele kal keliwete: Alew bani alemsal kawtiw mak mali Moses em kaleyemse kukuyemin weng beem dulum elote “Kanemok!”, dangeko, elo sakalaw keko, weng bo bo kelewbiliw kawtiw biim kukuw be kiinwalasomi, mali ilo “I fein kaneliw te!”, angiw tewe, diwyemin kunum i kanelom kanekabiliw kawtiw biilo ibolow kinkin keyembokoliw te! Itel bate! Kate, i ilo yeniwi, i kuan kemaliw te.*Sawa Weng 17:6; 19:15 29 Kate kame, yu nono fukunbiliw e? Sunbin-Got em Min em kanese beelo “Kanemok!”, dangbiliw kawtiw biim dulum elote nono kaneyemoke ye? Im kulokoliw yan wa be Moses em kukuyemin weng beelo sakalaw keko, weng bo bo kelewsiliw kawtiw biim kulusiliw yan wa be atin kuw bakilewkabe te. Nimtew angom? I Sunbin-Got em Min beelo yan deit san kelin atew kesomi, em ilo kiol kuw sen so banim keyemomin beem dulum elote buselse kaim beelo sakok kelewsomi, ilo ibolow folok kukuw kukuyemse Sunbin-Finik beelo desi kelewkabiliw kasike.*Aneng Kolew 24:8 30 Nakunum kumel kunum waneng yutaka! Sunbin-Got e bokolomele:
“Nakalem ete kuw, wa kukuw beem yan duyemoki te.”,
angeko, weng mak so bokolomele:
“Kamok Fian akalem ete akalem angin ilo diwyemsomi, geeyemboke te.”,
angse kale. Feinka! Alik alik nu angse Sunbin-Got beelo kal kebuluw te.*Sawa Weng 32:25-36 31 Kaneko kasike, mali yu sakalaw keko, weng bo bo kukuw kemiw kawtiw yu kilelbiko, boliwka! Kaisuw keko, sunsun finik so bin Sunbin-Got e yulo kanekabiliw beem yan wa kilele duyemoke kasike! Feinka! Yu finganin fian mak finganemoliwka!
32 Nakunum kumel kunum waneng yu yukalem suaem Sunbin-Got em ailbin kulusiliw beem emisik ding be ibolow fukunemoliwka! Beem ding dim bakate, ilum sakik banban yom dim talse kate, yu kitil keko, moko, sak “Kanemok!”, angeko, fein ibolow so kakameliw te. 33 Beem ding dim bakate, maka i teleko, yulo kawtiw im kiin dim kel mo koyemeko, desi weng bokoyemsomi, ilum fian mak duyemkakawkabiliw te. Kaneyemsomi, mali beemdiw kaneyemsiliw kunum waneng bikati dokoyemsomi, 34 sok am tem da koyemsiliw kunum waneng ilo kinkin ibolow kukuw kukuyemkakawkabiliw te. Kukuyemsomi, maka kawtiw im teleko, yom aluwbiliw eisneng alik alik be dakal koyemsiliw ding dim bakate, yu ibolow menew kesomi, “Kenka!”, yangeko, kalfongeko, sow em nam iti banimeko, kululokoliw eisneng beem ibolow fukunkakawkabiliw te.*Matyu 6:20; 19:29 35 Kasike, yu kanelom yukalem fein ibolow elo kalaing dukayemkabe be sak kolewokoliw te! Nimtew angom? Beem mongom ete yu yan ken mak kulokoliw kasike. 36 Nakunum kumel kunum waneng yutaka! Yu kitil keko, moko, unbiliw ki kuw kesomi, Sunbin-Got em ibolow fukuin be kilele gelewemoliwka! Gelewemiw tewe, yu Sunbin-Got em “Yulo duyemoki te!”, yangse weng beem dem e fein kulokoliw te. 37 Yu Sunbin-Got em weng kale ibolow fukunemoliwka! E bokolomele:
“Sukum ding kuw mak kelei,
‘Toloke!’, yangsi kunum be fineng kelinba keko, fongate akate toloke te.*Aisaya 26:20; Abakuk 2:3-4
38 Ne kunum waneng im fein nangbiliw ibolow be atemkabi kasike,
‘Beem dulum elote kiol kuw kunum waneng yute te!’, yangeko,
ilo sunsun bin finik so bin duyemkabi te.
Kate, nem dulum elote dubuluw angbiliw kawtiw im dulum elote ne kalfongyeminba kebi te.”,
angse kale. 39 Kate, nukalem ete dubuluw angesomi, banimokoliw kawtiw biimdiw bate. Nu Sunbin-Got elo “Feinka!”, dangakabuluw kasike, sunsun finik so bin kulokoluw te.
*10:5: Sim Fut 40:6-8
*10:11: Aneng Kolew 29:38
*10:13: Sim Fut 110:1
*10:16: Selemaya 31:33; Kibulu 8:10
*10:17: Selemaya 31:34
*10:22: Kunum Ayem 8:30; Esekiel 36:25; Efesus 5:26
*10:27: Aisaya 26:11
*10:28: Sawa Weng 17:6; 19:15
*10:29: Aneng Kolew 24:8
*10:30: Sawa Weng 32:25-36
*10:37: Aisaya 26:20; Abakuk 2:3-4