3
Gun-guna Janguny Burrwa Jardich (Sardis) Aburr-nirra
“Rrapa wukurrja nuluwa an-ngaypa an-mujaruk an-gata jaga a-ganaja burrwa a-workiya aburr-ngaypa wurra gama gorlk aburr-gata rrawa Jardich (Sardis) aburr-nirra. Yinda wukurrja nula:
“Gun-guna janguny nipa a-weya ana-gorrburrwa nipiya an-guna a-rrimanga a-nirra Wangarr an-mawunga an-gata abirri-jirrapa abirri-jirrapa abirri-jirrapa an-ngardapa, rrapa jin-gata marnnga abirriny-jirrapa abirriny-jirrapa abirriny-jirrapa jin-ngardapa nipiya jin-dimanga a-nirra.
“Nipa a-yinagata: Ngaypa marn․gi ana-gorrburrwa gun-gata ana-goyburrpa jama nyiburr-jirra nyiburr-workiya. Wuriya gun-gata aburr-werranga nyirrbu-ngurrjinga ana-goyburrpa, jimarna gubu-borrwurra ana-goyburrpa nyiburr-mola, wurra jarra nyiburr-juwuna. Wurra buburr-garlma, gun-ngiya burdak ana-goyburrpa nyibi-rrimanga derta buburr-negiya; gala yapa ana-goyburrpa gun-nyagara gu-ni. Ngardawa ngaypa ngu-nana ana-gorrburrwa gun-gata ana-goyburrpa jama nyiburr-jirra nipa gala burdak gu-molamiyarna nula Ngun-anya. Wurra bubu-borrwa gun-ngaypa janguny nyiburr-galiyana aburr-wena ana-gorrburrwa. Gun-narda bubi-rrima buburr-ni, wurra gun-gata gun-nerra bubu-bawa rrapa buburr-ngukurdanyjiya. Wurra minyja gala nyiburr-jarlapiya, lika ngaypa barra ngu-bengga ana-gorrburrwa minypa wolawola an-gugaliya an-ngumurda a-beya a-workiya gu-werranga gu-rrawa wenga. Minypa ana-goyburrpa gala barra marn․gi nyiburr-ni gun-gata gu-yinpa barra ngaypa ngu-bengga ana-gorrburrwa. Metiyu 24:43-44; Luk 12:39-40; Borrich 16:15
“Wurra ana-goyburrpa nyiburr-garda Jardich nyiburr-nirra, nyiburr-werranga nyiburr-gata nyiburr-jaranga ngika mun-goyburrpa mirikal gala mu-ngunyjarrarna. Ana-goyburrpa nyiburr-gurda mun-gungarlcha nyiburr-barrnguma barra rrapa wugupa apula nguburr-rrigirrga barra, ngardawa ana-goyburrpa nyiburr-molamola. Minyja gun-nerra gun-gata ana-nga gu-beyba, a-molamiya, an-gata an-gugaliya a-yirdiya barra minypa ana-goyburrpa nipa mun-gungarlcha mirikal a-barrnguma barra. Rrapa nipa an-nelangga ngaypa gala ngu-yinmiya ngu-werrwerrma mu-jurra a-yurra mun-gata aburr-welangga aburr-yurra aburr-gata minypa wanngu aburr-nipa barra aburr-workiya. Wurra Ngun-anya gatiya aburr-yigipa waykin aburr-guyinda aburr-mujaruk wugupa nula aburr-nirra ngaypa ngu-ngurrja barra nula an-nelangga nipa an-gata an-gugaliya an-ngaypa. Exodus 32:32-33; Psalms 69:28; Borrich 20:12; Metiyu 10:32; Luk 12:8
“An-gata ana-nga gelama a-jirra a-jirra, nipa barra a-galiya nula Mern An-mawunga a-yinmiya a-weya burrwa aburr-ngaypa wurra gama gorlk gun-jaranga rrawa aburr-nirra.
Gun-guna Janguny Burrwa Biladélpiya (Philadelphia) Aburr-nirra
“Rrapa wukurrja nuluwa an-ngaypa an-mujaruk an-gata jaga a-ganaja burrwa a-workiya aburr-ngaypa wurra gama gorlk aburr-gata rrawa Biladélpiya (Philadelphia) aburr-nirra. Yinda wukurrja nula:
“Gun-guna janguny nipa nyanma an-guna minypa an-molamola warrpam rrapa an-burral. Nipa a-rrimanga a-nirra an-gulapkujama gi (key) Daybit (David) gun-nika rrawa. Rrapa gun-nga nipa gu-lapkujamunga a-workiya ngana gu-jirra, gala ana-nga a-yinmiya gu-jakaba; rrapa nipa gu-jakaburda a-workiya ngana gu-jirra, gala ana-nga a-yinmiya gu-lapkujama. Isaiah 22:22; Job 12:14
“Nipa a-yinagata: Ngaypa marn․gi ana-gorrburrwa gun-gata ana-goyburrpa jama nyiburr-jirra nyiburr-workiya. Minyja bubi-na, gipa ngu-lapkujamurra ana-gorrburrwa ngana gu-jirra, rrapa gala ana-nga a-yinmiya gu-jakaba. Ngaypa marn․gi ana-goyburrpa ganyjarr nyibi-rrimanga marr wana, wurra wurpa lika minypa gun-ngaypa janguny nyibu-borrwurra apula nyiburr-ni rrapa gala ngunabu-bawujarna ngaypa ngu-welangga. Rrapa aburr-gata minypa aburr-malchinga nula walkwalk an-gata Jeytan (Satan), rrapa minypa aburr-ngurrjiya aburr-workiya Ju yerrcha wurra jarra gun-nyagara, birripa ngaypa barra nguburr-ga gurda ana-gorrburrwa barra aburr-bama aburr-gurrmiya ana-gorrburrwa rrapa nyiburr-gochila aburr-bungga, rrapa marn․gi aburr-ni barra ana-gorrburrwa ngardawa ngaypa jal ngu-nirra ana-gorrburrwa. Isaiah 49:23; 60:14; 43:4 10 Rrapa ana-goyburrpa ngardawa gun-ngaypa joborr nyibu-borrwurra, rrapa minypa nyiburr-jinyjapa marrban gun-nerra gu-ni ana-gorrburrwa, lika ngaypa barra arr-jarlapa arr-ga gun-gata gun-nerra gu-ni barra gun-nardiya rrawa. Minypa gun-gatiya ngaypa ngu-ngunyangunyjiya barra burrwa aburr-gurdiya gorlk, wurra ana-goyburrpa jarra ngaypa barra arr-jarlapa arr-ga. 11 Yibirrich ngaypa gugu ngu-bengga barra ana-gorrburrwa. Ana-goyburrpa gun-narda nyibi-rrimanga apula nyiburr-nirra janguny bubi-rrimapa bubu-mungba; gala yapa ana-nga nyirr-gaypa gun-molamola gun-goyburrpa burraya nyibu-ma barra. 12 Minyja gun-gata gun-nerra ana-nga gu-beyba, a-molamiya, an-gata an-gugaliya ngaypa barra ngu-ma, gata an-ngaypa Wangarr gun-nika bala gun-japurra a-ninyapa barra a-workiya. Gala barra gu-bawa a-boy gun-gata rrawa, wurra minypa gun-maywapa an-gelama an-gata abi-jarlapuna an-molamola nipa an-gata an-gugaliya a-jipa barra a-workiya. Rrapa nipa an-burral ngaypa ngu-wukurrja barra nula nipa an-ngaypa Wangarr an-nelangga rrapa nipa gun-nelangga an-ngaypa Wangarr gun-nika rrawa gun-gata gun-geka Jirúchalam (Jerusalem) nipa an-ngaypa Wangarr guna-jerrma barra, guna-bupiya barra waykin wenga. Rrapa ngu-wukurrja barra nula nipa an-burral an-gata an-gugaliya ngaypa ng-geka ngu-welangga burr-guta. Borrich 21:2; Isaiah 62:2; 65:15
13 “An-gata ana-nga gelama a-jirra a-jirra, nipa barra a-galiya nula Mern An-mawunga a-yinmiya a-weya burrwa aburr-ngaypa wurra gama gorlk gun-jaranga rrawa aburr-nirra.
Gun-guna Janguny Burrwa Leyodachíya (Laodicea) Aburr-nirra
14 “Rrapa wukurrja nuluwa an-ngaypa an-mujaruk an-gata jaga a-ganaja burrwa a-workiya aburr-ngaypa wurra gama gorlk aburr-gata rrawa Leyodachíya (Laodicea) aburr-nirra. Yinda wukurrja nula:
“Gun-guna janguny nipa a-weya ana-gorrburrwa an-guna gun-burral gu-rrimanga a-nirra Wangarr gun-nika janguny rrapa minypa gu-ngurrjinga a-workiya, nipiya an-guna mu-ngoyurra a-jirra burrwa an-mumurna an-guyinda bunggawa gun-nardiya rrawa gu-jirra gu-boya. Proverbs 8:22
15 “Nipa a-yinagata: Ngaypa marn․gi gun-gata ana-goyburrpa jama nyiburr-jirra nyiburr-workiya. Ana-goyburrpa minypa bugula gun-nerra, minypa gala mu-mern gu-rrima rrapa gala gu-rro gu-ji. 16 Ngaypa ngu-borrwurra jimarna ana-goyburrpa mu-mern nyin-dimarra, wurra jarra borijipa nyiburr-nirra ngaypa minypa barra arr-bocha ngana ngu-jirra wenga minypa bugula gun-nerra. 17 Ngardawa ana-goyburrpa ngardapa ngardapa nyiburr-weya, nyiburr-yinagata, ‘Ngaypa gorlk wana ngu-rrimanga. Gipa gugu gun-molamola gu-ni apula rrapa gala barrwa gun-nga jal ngu-ni.’ Ana-goyburrpa nyiburr-yinagata nyiburr-weya nyiburr-workiya, wurra gala nyiburr-borrwiya ana-goyburrpa nyiburr-gurda nyiburr-werra warrpam aburr-werranga barra aburr-worija ana-gorrburrwa, minypa nyiburr-nyagara nyiburr-nirra rrapa gapula nyiburr-nirra rrapa mirikal nyiburr-nyagara nyiburr-nirra burr-guta. 18 Wurra ngaypa ngu-weya ana-gorrburrwa barra bayim nyiburr-ni ngaypa ngu-murna minypa mun-molamola goldan minypa gipa mu-ngoyurra gu-bol gu-rronga rrapa gun-nerra gu-bona gu-ji. Gu-gurda ngacha barra minypa ana-goyburrpa nyiburr-garlma, nyiburr-welangga wana nyiburr-ni barra. Rrapa bayim nyiburr-ni barra ngaypa ngu-murna minypa mun-gungarlcha mirikal barra ana-goyburrpa nyiburr-barrnguma rrapa gala barrwa nyiburr-yinmiya gona nyiburr-ni minypa nyiburr-gata nyiburr-nyarlanga. Rrapa bayim nyiburr-ni barra ngaypa ngu-murna minypa mun-barra mun-gungimiya, barra nyibu-gurrma mun-barra ana-gorrburrwa rrapa nyiburr-gana nyiburr-ni. 19 Minyja aburr-gata aburr-nga ngaypa jal ngu-nirra burrwa, ngaypa gelama gelama nguburr-banga minypa gun-nerra gubi-rrimanga, rrapa marn․gi marn․gi nguburr-nenga nguburr-burnda ngu-workiya barra aburr-mola aburr-ni. Ganapiya, lika ana-goyburrpa bubu-bawa gun-nerra rrapa buburr-ngukurdanyjiya, burr-guya marr buburr-balcha apula. Proverbs 3:12; Yibru Yerrcha 12:6
20 “Buburr-galiya! Ngaypa minypa ngu-dulduljinga ngu-jirra ngana gu-jirra gu-guyinda, rrapa minyja ana-nga a-galiya barra apula manyjirda ngu-jirra rrapa minypa ngana gu-jirra gu-lapkujama barra apula, ngaypa nguna-barrnguma barra nuluwa, rrapa nipa rrapa ngaypa balaja mun-ganawa nyirri-bay barra wugupa.
21 “Minyja gun-gata gun-nerra ana-nga gu-beyba, a-molamiya, an-gata an-gugaliya ngaypa barra ganyjarr ngu-wu, nipa rrapa ngaypa wugupa bunggawa nyirri-ni barra gun-maywapa minypa ngaypa niya gun-gata gun-nerra ngu-beybana, ngu-molamiyana, lika ngaypa rrapa Ngun-anya Bunggawa nyirri-nirra wugupa.
22 “An-gata ana-nga gelama a-jirra a-jirra, nipa barra a-galiya nula Mern An-mawunga a-yinmiya a-weya burrwa aburr-ngaypa wurra gama gorlk gun-jaranga rrawa aburr-nirra.
“Gun-nardiya rrapa ganapiya.”

3:3 Metiyu 24:43-44; Luk 12:39-40; Borrich 16:15

3:5 Exodus 32:32-33; Psalms 69:28; Borrich 20:12; Metiyu 10:32; Luk 12:8

3:7 Isaiah 22:22; Job 12:14

3:9 Isaiah 49:23; 60:14; 43:4

3:12 Borrich 21:2; Isaiah 62:2; 65:15

3:14 Proverbs 8:22

3:19 Proverbs 3:12; Yibru Yerrcha 12:6