1 Pues tama inteꞌ día tin e tuobꞌ uchꞌajnarir e Filisti cay umorojse uyajtzꞌojyirobꞌ tuaꞌ uchiobꞌ e tzꞌojyir taca tin e tuobꞌ e Israel otronyajr, y entonces ixin e Aquís tuaꞌ oꞌjron taca e David y che:

—Pues nen incꞌani que net taca tunor awajtzꞌojyirobꞌ axin alocꞌoyobꞌ tacaren tuaꞌ cache e tzꞌojyir upater tin e tuobꞌ e Israel, che e Aquís.

2 Entonces ojron e David y che:

—Bueno pue. Erer caxin tacaret, y net tuaꞌ awira cobꞌa tzꞌojyir cobꞌna cache, che e David.

Entonces che e Aquís:

—Bꞌan yaꞌ, y cꞌanto inwaret ubꞌan tuaꞌ iquetpa ajcojc tanibꞌa inyajrer, che e Aquís.

3 Pues conda turuto e Samuel e Saúl cay uche meyra cosa xeꞌ aquetpa imbꞌutz tut Cawinquirar Dios, y uyajnes locꞌoy tunor tin e unatobꞌ aqꞌuiniobꞌ, y tin e unatobꞌ upejcobꞌ tin e chamen. Pero conda chamay e Samuel, tunor tin e tuobꞌ e Israel cay aruobꞌ tamar uchamer, y mujca tama e chinam Ramá tiaꞌ cuxpa. Pero nacpat que chamay, e Saúl machi ixto ubꞌijnu tuaꞌ utzayres ut e Dios.

4 Pues tama inyajr tin e tuobꞌ uchꞌajnarir e Filisti cay umorojse tunor uyajtzꞌojyirobꞌ tuaꞌ uchiobꞌ e tzꞌojyir taca e Israel, y tamar era ixiobꞌ tuaꞌ aturuanobꞌ* Iranic e nota tama e 1 Samuel 17:1 tuaꞌ inata cocha turuanobꞌ e ajtzꞌojyirobꞌ tama e onian tiempo. esto tama e chinam Sunem xeꞌ aquetpa tiaꞌ atobꞌoy watar e qꞌuin. Y e Saúl taca uyajtzꞌojyirobꞌ ixiobꞌ tuaꞌ aturuanobꞌ tama e chinam Guilboa xeꞌ aquetpa majax innajt tiaꞌ turobꞌ tin e tuobꞌ uchꞌajnarir e Filisti. 5 Pero conda e Saúl uwira e sian ajtzꞌojyirobꞌ xeꞌ tuobꞌ uchꞌajnarir e Filisti, cꞌaxi inteꞌ nuxi bꞌajcꞌut tamar este cay chincha meyra. 6 Entonces cay ucꞌajti taca Cawinquirar Dios tuaꞌ unata tucꞌa tuaꞌ uche, pero matucꞌa arobꞌna umener, nien tama inteꞌ wayac, y nien tama e Urim lo que acꞌampesna umen e sacerdote tuaꞌ acꞌotoy unata tucꞌa ucꞌani e Dios, y nien matucꞌa arobꞌna umen incojt profeta. 7 Y tamar era jaxir uyare uyajbꞌijresiajobꞌ y che:

—Sajcanic inteꞌ ixic xeꞌ unata upejca tin e chamenobꞌ, cocha cꞌani umbꞌi tacar tuaꞌ innata tucꞌa tuaꞌ anumuy tama tunor e tzꞌojyir era, che e Saúl.

Entonces ojronobꞌ uyajbꞌijresiajobꞌ y chenobꞌ:

—Pues ayan inteꞌ ixic xeꞌ unata upejca tin e chamenobꞌ tama e chinam Endor, chenobꞌ uyajbꞌijresiajobꞌ.

8 Entonces e Saúl ulocse ubꞌujc xeꞌ ucꞌampes tuaꞌ aquetpa chequer que jax e rey, y ubꞌujcse ubꞌa taca e bꞌujc bꞌan cocha acꞌampesna umen tunor e gente tuaꞌ machi aquetpa chequer chi era, y de allí ixin acbꞌar taca chateꞌ uman tuaꞌ uwarajse e ixic. Y entonces ojron e Saúl y che:

—Cꞌani onjron taca inteꞌ winic xeꞌ chamen. ¿Erer ca apejca tin e inwaret tuaꞌ uyubꞌien onjron tacar? che e Saúl.

9 Entonces ojron e ixic y che:

—¿Machi ca anata lo que uche e Saúl? Pues jaxir cꞌapa uyajnes locꞌoy tunor tin e unata aqꞌuiniobꞌ y tin e upejcobꞌ tin e chamenobꞌ tama tunor e lugar Israel. Pues jay inxin ani inche bꞌan cocha war awaren era, erer ani inchamesna tamar cocha machi ixto actana tuaꞌ achempa e yax coner, che e ixic.

10 Entonces e Saúl uyare e ixic cocha era y che:

—Cꞌani inwaret que bꞌan cocha turu Cawinquirar Dios que matucꞌa tuaꞌ anumse abꞌa jay ache bꞌan cocha war inwaret era, che e Saúl.

11 Entonces ojron e ixic y che:

—¿Chi acꞌani tuaꞌ impejca watar? che e ixic. Y che e Saúl:

—Aren tuaꞌ watar e Samuel, che e Saúl.

12 Entonces bꞌan uche e ixic. Pero conda uwira que checta tari e Samuel, cay aru taca inteꞌ nuxi nuc umen e bꞌajcꞌut, y uyare e Saúl y che:

—¿Tucꞌa tuaꞌ que war amajresen? Net jaxet e Saúl, che e ixic.

13 Entonces ojron e Saúl y che:

—Ira ibꞌacta. Arenen tucꞌa awira, che e Saúl.

Y che e ixic:

—Inwira inteꞌ mein xeꞌ war atꞌabꞌay alocꞌoy tor e rum, che e ixic.

14 Y che e Saúl:

—¿Y cocha turu uwirnar? che e Saúl.

Y che e ixic:

—Pues uwirnar lo que inwira aquetpa bꞌan cocha incojt onian winic xeꞌ lapar inteꞌ nuxi bꞌujc umener, che e ixic.

Entonces quetpa chequer tut e Saúl que jax e Samuel, y tamar era cotuan este que utacbꞌu ut ujor tut e rum. 15 Entonces ojron e Samuel tuaꞌ uyare e Saúl y che:

—¿Tucꞌa tuaꞌ que war achien innumse nibꞌa umen que achien insutpa waten? che e Samuel.

Entonces ojron e Saúl y che:

—Pues nen war innumse nibꞌa meyra umen que tin e tuobꞌ uchꞌajnarir e Filisti war uchiobꞌ e tzꞌojyir tacaren, y e Dios najtiri taniut, y machi cꞌani uyaren tucꞌa tuaꞌ inche nien umen incojt profeta, y nien machi cꞌani uchectes ubꞌa taniut tama inteꞌ wayac. Y tamar era imbꞌijnu tuaꞌ impejquet tuaꞌ awaren tucꞌa tuaꞌ inche, che e Saúl.

16 Entonces ojron e Samuel y che:

—Pues Cawinquirar Dios cꞌapa uyactet, y coner war aqꞌuijna uwiret. Entonces, ¿tucꞌa tuaꞌ que war oybꞌi tacaren? 17 Pues jaxir war uche tacaret bꞌan taca cocha cay uyaren que bꞌan tuaꞌ uche. Y tamar era ixin ulocset tuaꞌ machi ixto iquetpa rey tama e Israel, y war uyajcꞌu tuaꞌ aquetpa rey inteꞌ apiar xeꞌ jax e David. 18 Pues cocha machi acꞌubꞌse lo que arobꞌnet tuaꞌ ache umen Cawinquirar Dios tuaꞌ acꞌapa asati tunor tin e tuobꞌ uchꞌajnarir e Amalec xeꞌ xebꞌna utobꞌ umener, jaxir machi cꞌani utacret coner sino que uyactet inyajrer. 19 Y tamar era net y oynenobꞌ y tunor awajtzꞌojyirobꞌ cꞌani ixturbꞌana yebꞌar ucꞌotorer tin tuobꞌ uchꞌajnarir e Filisti umen Cawinquirar Dios, y ejcꞌar net taca oynenobꞌ cꞌani ixcꞌotoy ixquetpa tiaꞌ turen tama e lugar tiaꞌ aquetpobꞌ tunor tin e chamenobꞌ† Iranic tama e San Lucas 16:19-31 tiaꞌ Cawinquirar Jesús uchecsu ticoit que ayan chateꞌ lugar tiaꞌ aquetpobꞌ tin e chamenobꞌ, inteꞌ lugar tuaꞌ tin e erachobꞌ, y inteꞌ lugar tuaꞌ tin e ajmabꞌambꞌanirobꞌ.. Y tunor e ajtzꞌojyirobꞌ xeꞌ tuobꞌ e Israel axin acucurnobꞌ umen tin e tuobꞌ uchꞌajnarir e Filisti, che e Samuel. Y conda e Samuel cꞌapa ojron cocha era, satpa tutobꞌ.

20 Pues conda e Saúl cꞌapa uyubꞌi tunor uyojroner e Samuel, bꞌacta meyra y cucrema chꞌan tut e rum. Pues cꞌapa tunor uqꞌuecꞌojsiaj cocha ayix tiempo que machi war aweꞌ: tunor e día y tunor e acbꞌar. 21 Entonces conda irna umen e ixic que e Saúl war achincha meyra, ixin tuyejtzꞌer tuaꞌ oꞌjron tacar y che:

—Niwinquiret, cꞌapa inche tunor lo que awaren tuaꞌ inche, motor que war imbꞌacta que bꞌajcꞌat inxin inchamesna. 22 Pero coner quisinic que oybꞌi lo que cꞌani inwaret. Pues cꞌani inwajqꞌuet tucꞌa tuaꞌ acꞌuxi tuaꞌ asutpa watar aqꞌuecꞌojsiaj otronyajr tuaꞌ uyubꞌiet iꞌxin tama axambꞌar, che e ixic.

23 Pero e Saúl machi ucꞌani tuaꞌ aweꞌ. Pero cocha arobꞌna meyra umen uyajbꞌijresiajobꞌ y umen e ixic que ucꞌani tuaꞌ aweꞌ, cay ubꞌijnu tuaꞌ uchꞌami e comida. Y entonces achpa tut e rum y turuan tama inteꞌ chꞌacteꞌ. 24 Y entonces ixin e ixic tuaꞌ uchamse incojt chuchu wacax xeꞌ war unojres tor utinaj, y allí cay upojpi e wer. Y uchꞌami imbꞌijc e harina y cay uyapruꞌ tuaꞌ uche cora pan xeꞌ machi atꞌabꞌay ut. 25 Y de allí uqꞌueche ixin tunor era y uturbꞌa tor e mesa tut e Saúl y tut umanobꞌ, y wiobꞌ. Y de allí achpobꞌ y locꞌoy ixiobꞌ tamar taca e acbꞌar era.