1 Iwe, ämi pwii kana, iei üa mochen achema ngenikemi usun ewe Pworausen Manau üa fen afalafala ngenikemi, ewe oua etiwa o alonga ämi lükülük won. 2 Iei ewe Pworausen Manau oua küna manau ren are oupwe kamwöchünük won. Nge are ousap kamwöchünük won, ämi lükü a lomotongau.

3 Üa ngenikemi mine üa fen angei met a fokun aüchea: pwe Kraist a mäla fän iten ach tipis usun a mak lon ekewe Toropwe mi Pin, ✡Ais 53.5-12 4 pwe a peias, nge mürin ülüngat rän a manausefälitä usun a mak lon ekewe Toropwe mi Pin, ✡Kölf 16.8-10; Mat 12.40; Föf 2.24-32 5 pwe a pwä ngeni Petrus, nge mürin a pwä ngeni ekewe engol me ruoman soukünö. ✡Mat 28.16-17; Mark 16.14; Luk 24.34,36; Joh 20.19 6 Mürin a pwä ngeni lap seni limupükü chon lükü i lon eu chök fansoun, chomong me leir ra chüen manau, nge ekoch ra mäla. 7 Mürin a pwä ngeni James, mürin a pwal pwä ngeni ekewe soukünö meinisin.

8 Iwe, amüchülan a pwal pwä ngeniei, inamwo ika üa wewe ngeni eman aramas mi uputiu lon fansoun esap pwüng ngeni. ✡Föf 9.3-6 9 Pun ngang üa kis seni ekewe soukünö meinisin, esap fich ngeniei ai üpwe iteni eman soukünö, pun üa ariaföüü chon ewe mwichefelin Kot. ✡Föf 8.3 10 Nge ren än Kot ümöümöch üa wilila o wiliti eman soukünö. Iwe, an ümöümöch ngeniei esap lomotongau, pun mi enlet üa fokun achocho le angang lap seniir meinisin. Nge pwüngün pwe sap ngang üa föri ei angang pwe än Kot ümöümöch a nom rei. 11 Iei mine ese lifilifil ika ngang üa afalafala ewe Pworausen Manau ika pwal ekewe ekoch soukünö, äm meinisin aia afalafala eu chök Pworausen Manau, iei met oua lükü.

12 Iwe, pokiten sia afalafala pwe Kot a amanauasefäli Kraist seni mäla, pwota ekoch me leimi ra apasa pwe ekewe mi mäla resap manausefäl? 13 Are mi pwüng pwe resap manausefäl, wewen Kraist esap pwal manausefäl. 14 Nge are Kraist esap manausefäl seni mäla, mürin äm afalafal a lomotongau, pwal ämi lükü a lomotongau. 15 Pwal och, epwe pwäla pwe aia chofona usun Kot, pun aia apasa pwe Kot a amanauasefäli Kraist seni mäla. Nge are a pwüng pwe ekewe mi mäla resap manausefäl, mürin Kot esap amanauasefäli Kraist. 16 Pun are ekewe mi mäla resap manausefäl, Kraist esap pwal manausefäl. 17 Nge are Kraist esap manausefäl, ämi lükü i a aücheangau o ämi oua chüen nom lon ämi tipis. 18 Iwe, pwal wewen, pwe ekewe chon lükü Kraist mi fen mäla ra pöütmwälila. 19 Are sia apilükülükü Kraist lon ei chök manau, sia attong seni aramas meinisin mi nom won ei fanüfan.

20 Nge a pwüng pwe Kot a amanauasefäli Kraist seni mäla, iei mine a allükülük pwe chokewe mi mäla repwe pwal manausefäl. 21 Pun usun chök mäla a pop seni eman aramas, pwal ina chök usun ewe manausefäl seni mäla a pop seni eman aramas. 22 Pun usun aramas meinisin ra mäla lon Atam, iei usun aramas meinisin repwe manausefäl lon Kraist. 23 Nge meinisin repwe manausefäl lon en me tettelin: Kraist a akom, mürin chokewe ir nöün Kraist repwe manausefäl lon fansoun an liwinsefäl. 24 Mürin epwe war ewe fansoun sopolan. Kraist epwe akufu ekewe samol, ekewe sounemenem me ekewe manaman o atolonga mwün fän nemenien Saman Kot. 25 Pun Kraist epwe fokun nemenem tori Kot epwe akufu chon oputan meinisin o anomuur fän pechen. ✡Kölf 110.1 26 Iwe, ewe amüchülan chon oputan epwe mola, iei mäla. 27 Pun iei mine a mak lon ekewe Toropwe mi Pin, “Kot a anomu mettoch meinisin fän pechen.” Ewer, a fokun fat pwe ewe kapas “mettoch meinisin” Kot esap pachelong lon, i ewe mi anomu mettoch meinsin fän nemenien Kraist. ✡Kölf 8.6 28 Iwe, nge lupwen ekewe mettoch meinisin ra nom fän nemenien Kraist, mürin ewe Nau epwe püsin anomu i fän nemenien Kot, i ewe mi anomu mettoch meinisin fän nemenian. Iwe, Kot epwe unusen nemeni mettoch meinisin.

29 Iwe, ifa usun ren ekewe aramas mi papatais fänäsengesin ekewe mi mäla? Pwota ra föri iei usun? Are a let pwe ekewe mi mäla resap manausefäl, pwota ekei aramas ra papatais fänäsengesin ekewe mi mäla? 30 Nge me rem, pwota äm aipwe küküna feiengau iteiten fansoun meinisin? 31 Ämi pwii kana, üa sereni feiengauen mäla iteiten rän. Üa apasa ei lon ai sikäsinikemi lon Kraist Jesus ach Samol. 32 Are ngang üa fiu ngeni ekewe manmwacho lon Efisos fänäsengesin ekoch popun mi fis seni ekiekin aramas, met lomotan ngeniei? Nge are ekewe mi mäla resap manausefäl, pwota sisap chök föri usun met ekewe ekoch ra apasa, “Ousipwe momongö o ükün, pun lesor sipwe mäla”? ✡Ais 22.13

33 Ousap püsin atupukemi: “Chiechi ngeni aramas mi ngau a angauala manauach.” 34 Oupwe miritila, iwe, oupwe ükütiu le föri tipis. Pun ekoch me leimi resap silei Kot, üa pwärätä ei pwe oupwe säw ren.

35 Iwe, eli eman epwe ais, “Ifa usun än ekewe mi mäla repwe manausefäl? Met sokun inis repwe inisini?” 36 Ka umwes! Lupwen ka fotuki eföü pwükil lon pwül, esap pwükütä are esap akomwen mäla. 37 Nge mine ka fotuki eföü chök pwükil, eli eföü föün wiich ika och sokun föün irä, sap inisin ewe irä epwe märitä me mürin. 38 Iwe, Kot a ngeni ewe pwükil eu inis usun i a mochen. A ngeni eföü me eföü pwükil en me inisin.

39 Fituken mönümanau meinisin a sokofesen. Mi wor och sokun fituken aramas, och sokun fituken man, och sokun fituken machang, pwal och sokun fituken ik.

40 A wor inis minen läng, a pwal wor inis minen fanüfan. Lingen ekewe inis minen läng a sokola seni lingen ekewe inis minen fanüfan. 41 A wor eu sokun lingen akkar, eu sokun lingen maram, pwal eu sokun lingen ekewe fü, pwal mwo nge lefilen ekewe fü a sokofesen linger.

42 Iei usun mine epwe fis lupwen ekewe mi mäla repwe manausefäl. Ewe inis mi fotutiu a mämmä, nge ewe inis mi manausefäl esap mämmä. 43 Lupwen a fotutiu a lingengau o apwangapwang, nge lupwen epwe manausefäl epwe ling o pöchökül. 44 Met a fotutiu eu inis sokun fituk, nge met epwe manausefäl eu inis sokun ngün. Are a wor eu inis sokun fituk, epwe pwal wor eu inis sokun ngün. 45 Pun iei usun mine a mak lon ekewe Toropwe mi Pin, “Ewe poputän aramas Atam, i eman aramas mi manau”, nge ewe amüchülan Atam, i eman Ngün mi afisätä manau. ✡Ken 2.7 46 Nge sap ewe inis sokun ngün a akom, pwe ewe inis sokun fituk, mürin ewe inis sokun ngün. 47 Ewe aeumanün Atam a för seni pwül, nge ewe aruomanün Atam a feito seni läng. 48 Chokewe mi pop seni pwül ra usun chök ätewe mi för seni pwül, nge chokewe mi pop seni läng ra usun chök ätewe mi feito seni läng. 49 Usun sia sokuni sokun ewe aramas mi för seni pwül, ina usun sipwe pwal sokuni sokun ewe Aramas seni läng.

50 Ämi pwii kana, iei wewen ai kei kapas: Mine a för seni fituk me cha esap tongeni mwüni mwün Kot, nge mine a morola esap tongeni eäni mine esap morola. 51 Oupwe rongorong, üpwe ürenikemi eu kapas monomon: Sap kich meinisin sipwe mäla, nge lupwen ewe amüchülan rappwa epwe tik, kich meinisin sipwe müttir wilila 52 lon eu chök morupun mas. Pun lupwen ewe rappwa epwe tik, ekewe mi mäla repwe manausefäl, nge resap chüen mälasefäl, nge kich meinisin sipwe wilila. ✡1.Tes 4.15-17 53 Pun met mi morola epwe siwil ngeni met esap tongeni morola, nge met mi mämmä epwe siwil ngeni met esap tongeni mämmä. 54 Iwe, lupwen met mi morola epwe siwil ngeni met esap tongeni morola, o met mi mämmä epwe siwil ngeni met esap tongeni mämmä, mürin epwe pwönüetä mine a mak lon ekewe Toropwe mi Pin, “Manau a akufu mäla pwe esap chüen wor!” ✡Ais 25.8

58 Iei mine ämi pwii kana mi achengicheng, oupwe apposakemi, ousap mwöküt seni ämi souläng. Oupwe alapalafochei ämi achocho lon ewe angangen ach Samol, pun oua silei pwe esap lomotongau ämi angang lon ach Samol.