1 “Iwe, lupwen oupwe aineti ewe fanü ngeni ekewe ainangen Israel, oupwe aimwüela eu kinikin fän iten ewe Samol mi Lapalap, pwe epwe eu leni mi pin. Iwe, ükükün langataman engol mail, nge chölapan ükükün walu mail. Unusen ei fanü epwe pin. 2 Nge lon ei kinikin mi pin oupwe pwal aimwüela eu leni fän iten ewe Imwenfel langataman me chölapan ükükün walüpükü faik fiit. Iwe, epwe pwal wor eu leni mi amassawa ünükün, chölapan ükükün walik me rüanü fiit. 3 Seni lon ewe kinikin mi pin oupwe pwal aükü eu leni langataman ükükün engol mail, nge chölapan ükükün rüanü mail. Ei leni epwe fän iten ewe Imwenfel, epwe eu leni mi unusen pin. 4 Ei kinikinin fanü epwe pin me lon fanüemi. Iwe, epwe fanüen ekewe souasor mi föri angangen ewe leni mi pin o feito ren ewe Samol mi Lapalap, pwe repwe angang ngeni. Iwe, ei fanü epwe lenien imwer, pwal eu leni mi pin fän iten ewe Imwenfel. 5 Pwal eu kinikinin ewe leni epwe fanüen chon ewe ainangen Lefi mi föri angangen lon Imwenfel, langataman ükükün engol mail, nge chölapan ükükün rüanü mail. Iwe, chon ewe ainangen Lefi repwe nonom lon ei fanü.

6 Iwe, lepekin ewe leni mi pin oupwe pwal aimwüela eu kinikin fän iten ewe telinimw, chölapan ükükün ruu mail, nge langataman ükükün engol mail. Ei kinikin epwe fän iten chon Israel meinisin.

7 Iwe, fän iten ewe samol oupwe aimwüela ruu fanü lesopun ewe leni mi pin me rüepek, pwal lepekin ewe fanü ia ewe telinimw a nom ie. Eu epwe seni kiännin ewe leni me pelilotou tori ewe matau watte. Nge eu epwe seni kiännin ewe leni mi pin me peliötiu tori kiännin ewe fanü me peliötiu. Iwe, langatamen ekewe fanü epwe wewefengen me kiännin fanüen ekewe ainangen Israel. 8 Iei ükükün fanüen ewe samol me lon Israel. Iwe, nei kewe samol resap chüen ariaföüü nei aramas, nge repwe mwüt ngeni ekewe ainangen Israel fanüer pwe repwe püsin fanüeni.

9 Iei alon Kot ewe Samol mi Lapalap, “Oupwe ükütiu, ämi samolun Israel, oupwe ükütiu le föri föför mi mwänewüs me ariaföüü aramas, nge oupwe eäni pwüng me föföröch. Ousap chüen asüela nei aramas seni fanüer. Ngang Kot ewe Samol mi Lapalap üa kapas.

10 Ämi kilo epwe pwüngüöch, pwal ämi efa *efa eu aükük fän iten föün wiich ika mettoch mi pwas me ämi paat †paat eu aükük fän iten mettoch mi lölö. ✡Lif 19.36 11 Iwe, ükükün eu efa me eu paat epwe wewefengen. Eu paat epwe ükükün eu leengolun eu homer ‡eu homer ükükün 81.2 kalon, nge eu efa epwe pwal ükükün eu leengolun eu homer. Iwe, eu homer longolongun ämi aükük. 12 Iwe, eu sekel §eu sekel ina epwe ükükün esop aunus epwe ükükün rüe kera. Nge rüe sekel kapach rüe me limu sekel pwal kapach engol me limu sekel epwe eu mina.”

13 “Iwe, iei ükükün ekewe asor oupwe eäni: Oupwe asor eu lewone seni kiniemi wiich, pwal eu lewone seni kiniemi parli. 14 Nge ewe apüra oupwe eäni asor epwe ükükün eu leipükü seni kiniemi föün olif. Ewe aükük epwe longolong won paat: Engol paat eu koor ika eu homer. 15 Iteiten familien chon Israel epwe eäni asor eman sip seni iteiten akaruopükü sip. Iei ewe asoren mongö, asoren kek me asoren kilisou fän iten amusamusen ämi tipis. Ngang Kot ewe Samol mi Lapalap üa kapas. 16 Iwe, aramasen ei fanü meinisin repwe uwato ekei asor ren ewe samolun Israel. 17 Nge ewe samol epwe wisen awora ekewe asoren kek, asoren mongö me asoren ün mi fis lupwen ekewe chulap, lupwen chulapen popun maram me ekewe ränin sapat, pwal sokun chulap meinisin chon Israel ra eäni. I epwe awora ewe mönün asoren amusamusen tipis, ewe asoren mongö me asoren kek, pwal asoren kilisou fän iten amusamusen än chon Israel tipis.”

18 Iei alon Kot ewe Samol mi Lapalap, “Lon aeuin ränin ewe aeuin maram oupwe eäni asor eman nienifön ätemwänin kow esap wor terin, pwe oupwe limeti ewe Imwenfel ren. 19 Ewe souasor epwe angei ekis chan ewe mönün asoren amusamusen tipis o toofi ngeni penkasamen ewe Imwenfel, ngeni won ililin ewe rongen asor lepwokukun me rüanü, pwal ngeni penkasamen ewe asamalap mi wene ngeni ewe leni mwen Imwenfel. 20 Iei usun oupwe pwal föri lon afisuen ränin ewe maram fän iten ekewe aramas mi tipis ren ar chechengau. Ina usun oupwe limeti ewe Imwenfel.

21 Lon engol me rüanün ränin ewe aeuin maram oupwe eäni ewe Pasofer. Iwe, lon ükükün fisu rän oupwe mongö pilawa esap wor iis lon. ✡Eks 12.1-20; Num 28.16-25 22 Lon aeuin rän ewe samol epwe eäni asoren amusamusen tipis eman nienifön ätemwänin kow fän püsin itan, pwal fän iten aramasen ewe fanü meinisin. 23 Nge lon eu me eu ekewe fisu ränin chulap, ewe samol epwe eäni asoren kek ngeni ewe Samol mi Lapalap füman ätemwänin kow me füman ätemwänin sip esap wor terir. Iwe, epwe eäniir asoren kek iteiten rän lon ükükün fisu rän, epwe pwal eäni asoren amusamusen tipis eman ätemwänin kuuch iteiten rän. 24 Epwe pwal apacha ngeni iteiten eman kow me kuuch pilawa mi amas ükükün ilik paun me ülüngat kuoch apüra seni föün olif fän iten asoren mongö. 25 Iwe, lupwen ewe chulapen likachoch mi poputä lon engol me limuen ränin ewe afisuen maram, ewe samol epwe uwato ewe chök asoren amusamusen tipis, asoren kek, pwal asoren mongö fiti ewe apüra lon ükükün fisu rän.” ✡Lif 23.33-36; Num 29.12-38