1 Oupwe aüseling ngeni mine ewe Samol mi Lapalap a apasa. Oupwe ütä o pwärätä ämi osukosuk me mwen ekewe chuk, nge ekewe chukutekison repwe rongorong mweliemi. 2 Ämi ekewe chuk me en longolongun fanüfan mi nükünük, oupwe rongorong än ewe Samol mi Lapalap kapasen änini, pun a änini ngeni nöün kewe aramas, epwe atipisi chon Israel. 3 A apasa, “Ämi nei aramas, met üa föri ngenikemi? Ren met üa aweiresikemi? Oupwe pälüeniei. 4 Üa emwenikemiiwu seni ewe fanü Isip o angasakemi seni ewe fanü ia ra nöünikemi amanau ie. Üa tinala Moses, Aaron me Miriam pwe repwe akom mwemi. ✡Eks 12.50-51; 4.10-16; 15.20 5 Ämi nei aramas, oupwe pwal chechemeni mine Palak ewe kingen Moap a eäni rawangau ngenikemi, pwal mine Palam nöün Peor we mwän a eäni pälüen ngeni. Oupwe pwal chechemeni mine a fis, lupwen oua sai seni Sitim tori Kilkal, pwe oupwe silei mine Ngang ewe Samol mi Lapalap üa föri pwe üpwe amanauakemi.” ✡Num 22.2–24.25; Jos 3.1–4.19

6 Met üpwe uwato ren ewe Samol mi Lapalap, lupwen üa feito o fel ngeni ewe Koten läng? Ifa usun, üpwe feito ren fän asoren kek me nienifön kow eu ierir? 7 Ifa usun, ewe Samol mi Lapalap epwe pwapwa ren ngeröün ätemwänin sip me pumongun apüra seni olif? Ifa usun, üpwe eäni asor nei mwänichi fän iten ai pupungau ika nei kana fän iten ai tipis? 8 En aramas, ewe Samol mi Lapalap a aiti ngonuk mine a mürina. Met a mochen pwe kopwe föri? A mochen pwe kopwe föri mine a pwüng o eäni kirikiröch, kopwe pwal tipetekison fän mesen om we Kot.

9 Mwelien ewe Samol mi Lapalap a kökkö ngeni ewe telinimw, nge iö a niuokusiti i a tipachem, “Oupwe rongorong, ämi aramas mi mwichefengen lon ewe telinimw. 10 Lon imwen ekewe aramasangau a wor pisek aüchea ra angei fän rikirik. Ra aea kilo mi solä, eu föför üa oput. 11 Ifa usun, üpwe amusafatei eman aramas mi nöünöü eu kilo mi solä, eman mi eäni föün kilo mi atuputup? 12 Ekewe aramas mi pisekisek lon ewe telinimw ra föri chomong angangen mwänewüs, ekewe aramasen lon ra eäni kapas chofana me atuputup. 13 Iei mine üa popuetä le nikemi o ataela fanüemi pokiten ämi kewe tipis. 14 Oupwe mongö, nge ousap möt, oupwe chök mefi fion. Oupwe iseis mettoch, nge resap mwöch, nge mine a nom remi üpwe ataala ren maun. 15 Oupwe fofot, nge ousap kinikin. Oupwe üchüch föün olif, nge ousap epitikemi noppukun. Oupwe puri föün irän wain, nge ousap ün wain seni. 16 Ei epwe fis, pokiten oua apirü än Omri me chon leimwen Ahap föför mi ngau. Oua pwal sopwela le eäni örünier kewe. Iei mine üpwe ataala fanüemi, nge ekewe aramasen lon repwe och minen turunufas. Oupwe mwärelong fän itengau me ren chon ekewe mwü.” ✡1.King 16.23-28; 16.29-34; 21.25-26