1 Iwe, lupwen a tori ewe afisuen maram, nge ekewe chon Israel ra nonom lon ar kewe telinimw, ir meinisin ra mwichefengen fän tipeeu lon Jerusalem lon ewe leni mi amassawa mwen ewe Asamalapen Koluk. Iwe, ra üreni Esra ewe sousile allük pwe epwe uwato än Moses we puken allük, ia a mak ie ekewe allük ewe Samol mi Lapalap a ngeni chon Israel. 2 Lon aeuin ränin ewe afisuen maram ewe souasor Esra a uwato ewe puken allük me mwen ewe mwichen aramas, ir ekewe mwän me fefin, pwal semirit meinisin mi tongeni weweiti. 3 A aleani ewe allük le sape ngeni ewe leni mi amassawa me mwen ewe Asamalapen Koluk seni lesosorusich tori leoloas. A aleani mwen ekewe mwän me fefin pwal ekewe semirit meinisin mi tongeni weweiti. Iwe, ekewe aramas meinisin ra aü selinger ngeni masouen ewe puken allük. 4 Nge Esra a ütä won eu lenien afalafal mi för seni irä, ra föri fän iten ei popun. Iwe, Matitia, Sema, Anaia, Uria, Hilkia me Maseia ra ü ünükün me lepelifichin. Nge Petaia, Misael, Malkia, Hasum, Haspatana, Sekaria me Mesulam ra ü ünükün me lepelimöngün. 5 Esra a suki ewe puk won lenian mi tekia, nge ekewe aramas meinisin ra chök nenengeni. Nge lupwen a suki ewe puk, ekewe aramas meinisin ra ütä. 6 Esra a mwareiti ewe Samol mi Lapalap ewe Kot mi Tekia, nge ekewe aramas meinisin ra aitietä pöür o apasa, “Amen, Amen.” Iwe, ra rotiu, ra chapetiu lepwül o fel ngeni ewe Samol mi Lapalap. 7 Mürin, ekewe aramas ra ütä lon en me lenian, nge ekewe mwän seni ewe ainangen Lefi iter Jesua, Pani, Serepia, Jamin, Akup, Sapetai, Hotia, Maseia, Kelita, Asaria, Josapat, Hanan me Pelaia ra awewei ngeniir ewe allük. 8 Ra aleaniöchü ewe puken allük än Kot, ra aföüü o aweweni, pwe ekewe aramas ra tongeni weweiti.

9 Iwe, lupwen ekewe aramas ra rongorong kapasen ewe allük, a mwökütüküt letiper pwe ra kechü. Iei mine ewe kepina Nehemia, ewe souasor Esra, i ewe sousile allük, me ekewe mwän seni ewe ainangen Lefi mi aiti ngeni ekewe aramas ewe allük ra üreni ekewe aramas meinisin, “Ei rän a pin fän iten ewe Samol mi Lapalap äm we Kot. Ousap letipeta ika kechü.” 10 Mürin, Nehemia a üreniir, “Oupwe liwiniti en me lenian, oupwe eni mongö mi anö o ünümi wain mi arar. Oupwe pwal tinala och seni enemi me ünümemi ngeni chokewe resap tongeni amolätä och. Pun ei rän a pin fän iten ewe Samol. Ousap letipeta, pun ewe pwapwa seni ewe Samol mi Lapalap epwe apöchökülakemi.” 11 Iei usun ekewe mwän seni ewe ainangen Lefi ra amosonosonala ekewe aramas meinisin o üreniir, “Oupwe chipila, pun ei rän a pin. Ousap letipeta.” 12 Mürin, ekewe aramas meinisin ra liwiniti en me lenian, ra mongö o ün fän watten pwapwa, ra pwal tinala och ngeni chokewe esap wor ener, pun ra weweiti ekewe kapas ra rongorong.

13 Iwe, lon aruuen ränin ewe maram ekewe mwänirelan än semer kewe cho seni ekewe aramas meinisin, pwal ekewe souasor me ekewe mwän seni ewe ainangen Lefi ra feitopök ren Esra ewe sousile allük, pwe repwe kaiö kapasen ewe allük. 14 Iwe, ra küna pwe a mak lon ewe allük Moses a allük fän alon ewe Samol mi Lapalap pwe ekewe aramasen Israel repwe nonom lon likachoch lupwen ewe fansoun chulapen likachoch lon afisuen maram. 15 Iei mine ra asilefeili o arongafeili lon ar kewe telinimw meinisin pwal lon Jerusalem, pwe aramas repwe feila won ekewe chuk o uwato palen ewe irä olif, mwoosor me palm, pwal palen sokopaten irä mi muresires, pwe repwe föri likachoch usun a fen mak lon ewe allük. ✡Lif 23.33-36,39-43; Tut 16.13-15 16 Mürin, ekewe aramas ra feila o uwato ekewe palen irä. Iwe, ra föri likachoch fän iter won en me imwan, lon ekewe leni lükün imwer, pwal lükün ewe imwen Kot, lon ekewe leni mi amassawa arun ewe Asamalapen Koluk me arun ewe Asamalapen Efraim. 17 Iwe, ekewe aramas meinisin mi liwinto seni ar oola ra föri likachoch o nonom lor. Pun seni fansoun Josua nöün Nun we mwän tori ei rän ekewe aramasen Israel resap föri mwo iei usun. Iwe, a fis watten pwapwa. 18 Seni aeuin ränin ewe chulap tori lesopolan Esra a aleani ewe puken allük än Kot ngeni ekewe aramas. Ra föri ewe chulap lon ükükün fisu rän, nge lon awaluen rän ra föri eu mwich mi pin, usun a mak lon ewe allük.