9
Chon Israel ra pwärätä ar tipis
9.1-37
1 Iwe, lon rüe me rüanün ränin ei chök maram ekewe aramasen Israel ra mwichefengen, ra echikefel o üföüf üf seni tuk, ra pwal tukotuketä pwül won mökürer pwe asisilen ar letipeta pokiten ar tipis. 2 Iwe, ekewe chon Israel ra aimwürela seni ekewe chon ekis meinisin, ra ütä o pwärätä ar kewe tipis me än ar kewe lewo föföringau. 3 Lon ükükün ülüngat kulok ra ütä won lenier, lupwen än ewe Samol mi Lapalap ar we Kot puken allük a alea ngeniir, nge lon pwal ükükün ülüngat kulok ra pwärätä ar tipis o fel ngeni ewe Samol mi Lapalap ar we Kot. 4 Mi wor eu leni mi ekis tekia fän iten ekewe mwän seni ewe ainangen Lefi, ia Jesua, Pani, Katmiel, Sepania, Puni, Serepia, Pani me Chenani ra ütä ie. Ra leüömong le iotek ngeni ewe Samol mi Lapalap ar we Kot. 5 Mürin, ekewe mwän seni ewe ainangen Lefi Jesua, Katmiel, Pani Hasapneia, Serepia, Hotia, Sepania me Petaia ra apasa,
“Oupwe ütä o mwareiti ewe Samol mi Lapalap
ämi we Kot tori feilfeilachök.
Oupwe mwareiti itan mi ling, a tekia seni ekewe feiöch meinisin me mine aramas ra mwareiti.”
6 Mürin, ekewe aramasen Israel ra eäni ei iotek, “En Kot, en chök ewe Samol mi Lapalap.
Ka föri läng, ekewe sässärin läng mi fokun tekia,
pwal mettochun lon meinisin.
Ka föri fanüfan me meinisin mine a nom won,
ekewe matau me masouen lor meinisin.
En ka pwal ngeniir meinisin ar manau.
Iwe, ekewe chon läng meinisin ra fel ngonuk.
7 En ewe Samol mi Lapalap, ewe Kot mi filätä Apram, ka emwenawu i seni Ur lon ewe fanü Papilon
o siwili itan ngeni Apraham. ✡Ken 11.31; 12.1; Ken 17.5
8 Ka küna pwe a allükülük ngonuk,
ka föri eu pwon ngeni
pwe kopwe ngeni mwirimwirin kana ewe fanüen chon Kaanan,
chon Hit, chon Amor,
chon Peris, chon Jepus me chon Kirkas,
pwe repwe fanüeni.
En ka apwönüetä om we pwon, pun ka pwüng. ✡Ken 15.18-21
9 Iwe, ka küna än äm kewe lewo riaföü me lon Isip
o rongorong ar siö me arun ewe Setipar. ✡Eks 3.7; Eks 14.10-12
10 Ka föri asisil me manaman o afeiengaua Farao
me nöün kewe nöüwis meinisin, pwal aramasen fanüan meinisin,
pun ka silei pwe ra ariaföüü äm kewe lewo fän lamalamtekia.
Ren ei föför itom a iteföüla tori ikenai. ✡Eks 7.8–12.32
11 Ka kinifeseni ewe matau me mwer
pwe ra tongeni pwerelong lukalapan won pwasapwas,
nge ka aturalong ekewe chon tapweriir le alololun ewe matau,
usun eföü fau a turulong lon eu matau mi öütöüt. ✡Eks 14.21-29; Eks 15.4-5
12 Iwe, ka emweniir lerän ren eu ürekuchu,
nge lepwin ka emweniir ren eu üreekkei, pwe epwe saram ewe al repwe fetal won. ✡Eks 13.21-22
13 Ka feitiu won ewe chuk Sinai seni läng,
ka fos ngeniir
o ngeniir ekewe pwüüng mi wenechar me ekewe allük mi pwüng o mürina.
14 Ka asile ngeniir pwe repwe apini om kewe ränin sapat,
nge Moses noum we chon angang a ngeniir ekewe allük me pwüüng fän alom. ✡Eks 19.18–23.33
15 Ka ngeniir mongö seni läng lupwen ra echik,
ka apuwowu koluk seni ewe achau lupwen ra kaka.
Ka pwal üreniir pwe repwe tolong lon ewe fanü o fanüeni,
usun ka fen pwon fän akapel pwe kopwe ngeniir. ✡Eks 16.4-15; Eks 17.1-7; Tut 1.21
16 Nge äm kewe lewo ra lamalamtekia o tipepöchökül,
resap aleasochisi om kewe allük.
17 Resap fokun mochen aleasochis ngonuk, resap pwal ekieki ekewe manaman ka föri lefiler.
Nge ra chök tipepöchökül o filätä eman souemwen,
epwe aliwinirela Isip pwe aramas repwe nöüniir amanau.
Nge en eman Kot mi amusala tipis,
ka kirikiröch o ümöümöch, ka pwal songomang o wöün tong ellet.
Iei mine kosap likitirela, ✡Num 14.1-4; Tut 1.26-33; Eks 34.6; Num 14.18
18 lupwen ra mwo nge föri fän iter uluulun eman nienifön kow seni mächä
o üra, ‘Iei i äm we Kot mi emwenikeemiwu seni Isip,’
pwal lupwen ra fokun turunufaseek. ✡Eks 32.1-4
19 Pokiten ka fokun ümöümöch,
kosap likitirela lon ewe fanüapö.
Ewe ürekuchu mi emweniir won ewe al esap sü seniir lerän,
nge ewe üreekkei, a asarama ewe al repwe fetal won,
esap sü seniir lepwin.
20 Ka lifang ngeniir Ngünum mi mürina, pwe epwe öüröüreer,
ka pwal amongö ngeniir om mana o aünü ngeniir koluk.
21 Lon ükükün faik ier ka tümwünüür lon ewe fanüapö,
pwe resap osupwang ren och.
Üfer kewe ra üföüf resap kamwala,
nge pecher resap pwo. ✡Tut 8.2-4
22 Ka atolonga ekewe mwü me aramasen lor fän nemeniir,
ka pwal afanüa ngeniir fanüer kewe meinisin.
Iei mine ra fanüeni fanüen Sihon ewe kingen Hespon
me fanüen Ok ewe kingen Pasan. ✡Num 21.21-35
23 Ka achomonga mwirimwirir kewe pwe ra chomong usun chomongun ekewe fün läng,
ka pwal emwenirelong lon ewe fanü,
ka fen üreni ar kewe lewo pwe repwe tolong lon o fanüeni. ✡Ken 15.5; 22.17; Jos 3.14-17
24 Iei mine mwirimwirir kewe ra tolong lon ewe fanü o fanüeni.
En ka akufu me mwer ekewe chon Kaanan mi nom lon ewe fanü
o atolonga fän nemenier ar kewe king me aramasen ewe fanü,
pwe repwe tongeni föri ngeniir usun ar mochen. ✡Jos 11.23
25 Iwe, ra liapeni telinimw mi pöchökül tittir
me fanü mi mürina o imweni ekewe imw mi ur ren mettoch mi mürina.
Ra eäni ekewe chönüttu
o tanipini ekewe tanipin wain me olif,
pwal chomong sokopaten irä mi ua.
Ra mongö o möt, ra pwal kitinupula.
Ra fokun pwapwa ren ekewe mettoch mi mürina ka lifang ngeniir. ✡Tut 6.10-11
26 Iei mwo nge noum kewe aramas ra chök lükümach o ü ngonuk,
ra pöütala om allük lükisökürür
o niela noum kewe soufos mi fönöör
pwe repwe kulsefälituk,
ra pwal fokun turunufaseek.
27 Iei mine ka asechirelong lepöün chon oputeer mi ariaföüür.
Iwe, lon fansoun ar riaföü ra siö ngonuk,
nge en ka aüselingeer seni läng.
Lon om ümöümöch mi lapalap ka ngeniir souemwen
mi angaseer seni lepöün chon oputeer.
28 Nge lupwen ra kinamwe, ra försefäli mine a ngau me fän mesom.
Mürin ka asechisefälirelong lepöün chon oputeer pwe repwe nemeniir.
Nge lupwen ra ekieksefäl o siö ngonuk,
ka aüselingeer seni läng.
Fän chomong ka angaseer lon om ümöümöch. ✡Souk 2.11-16
29 Ka fönöör pwe repwe aleasochis ngeni om kewe allük.
Nge ir ra chök lamalamtekia o aleasolap ngeniir.
Iwe, ra tipis ren ar puri om kewe pwüüng,
are eman epwe fen apwönüretä, epwe manau ren.
Iwe, ra ülöförea o tipepöchökül, nge resap mochen aleasochis. ✡Lif 18.5
30 Chomong ier ka mosonotam ngeniir,
ka ngeni noum kewe soufos Ngünum pwe repwe tongeni fönöör,
nge resap mochen aüselinga.
Iei mine ka atolongeer fän nemenien ekoch mwü. ✡2.King 17.13-18; 2.Kron 36.15-16
31 Iei mwo nge lon om ümöümöch mi lapalap
kosap likitirela ika aroserela.
Pun en eman Kot mi kirikiröch o ümöümöch.
32 Äm Kot, en eman Kot mi tekia o manaman,
aramas ra niuokusituk,
ka apwönüetä om pwon me tong ellet ngenikem.
Iei mine kopwe ekieki usun ekewe riaföü meinisin ra torikem,
ra tori äm kewe king me samol, nöüm kewe souasor me soufos,
äm kewe lewo me nöüm kewe aramas meinisin
seni fansoun mwün ekewe kingen Asiria tori ikenai. ✡2.King 15.19,29; 17.3-6; Esr 4.2,10
33 Nge en ka pwüng won meinisin mine ka föri ngenikem.
En ka allükülük ngenikem, nge äm aia tipis ngonuk.
34 Äm kewe king me samol, äm kewe souasor me äm kewe lewo
resap apwönüetä om kewe allük
ika afäli om kewe pwüüng me om kewe kapasen fön ka ngeniir.
35 Pwal lupwen ra nemenem lon mwür o pwapwaäsini ekewe feiöch
ra angei senuk me lon ewe fanü mi watte o pwülüöch ka ngeniir,
ir resap kul seni ar kewe föför mi ngau o angang ngonuk.
36 Nengeni, aramas ra nöünikem amanau ikenai.
Aramas ra nöünikem amanau me lon ewe fanü ka ngeni äm kewe lewo,
pwe repwe pwapwaiti uan me ekewe mettoch mi mürina lon.
37 Iwe, uän ewe fanü mi watte a tori ekewe king,
en ka awiseer pwe repwe nemenikem
pokiten aia tipis.
Ra pwal nemeni inisim me nöüm kewe man usun ar mochen,
nge äm aia nom lon riaföü watte.”
Ekewe aramas ra pwon pwe repwe aleasochisi ewe allük
9.38–10.39
38 Pokiten ekei mettoch mi fis, äm ekewe chon Israel aia föri eu pwon mi nükünük o makeetiu kapasan, nge äm kewe samol, nöüm kewe mwän seni ewe ainangen Lefi me nöüm souasor ra saini iter won o impwangei.