1 Iwe, ikkei iten chokewe mi saini iter: Ewe kepina Nehemia nöün Hakalia we mwän me Setekia. 2 Pwal ekei souasor iter: Seraia, Asaria me Jeremaia, 3 Pasur, Amaria me Malkia, 4 Hatus, Sepania me Maluk, 5 Harim, Meremot me Opatia, 6 Taniel, Kineton me Paruk, 7 Mesulam, Apia, me Miamin, 8 Masia, Pilkai me Semaia. 9 Ikkei iten ekewe mwän seni ewe ainangen Lefi: Jesua nöün Asania we mwän, Pinui seni ewe familien Henatat, me Katmiel, 10 pwal pwiir kewe iter Sepania, Hotia, Kelita, Pelaia me Hanan, 11 Mika, Rehop me Hasapia, 12 Sakur, Serepia me Sepania, 13 Hotia, Pani me Peninu. 14 Ikkei iten samolun ekewe aramas: Paros, Pahat-moap, Elam, Satu me Pani, 15 Puni, Askat me Pepai, 16 Atonia, Pikwai me Atin, 17 Ater, Hiskia me Asur, 18 Hotia, Hasum me Pesai, 19 Harif, Anatot me Nepai, 20 Makpias, Mesulam me Hesir, 21 Mesesapel, Satok me Jatua, 22 Pelatia, Hanan me Anaia, 23 Hosea, Hanania me Hasup, 24 Haloes, Pilha me Sopek, 25 Rehum, Hasapna me Maseia, 26 Ahia, Hanan me Anan, 27 Maluk, Harim me Paana.

28 Iwe, äm aramasen Israel, ekewe souasor, ekewe mwän seni ewe ainangen Lefi, ekewe chon mamasa asamalapen imwenfel, ekewe chon köl, ekewe chon angang ngeni imwenfel, pwal meinisin mi aimwürela seni aramasen ekewe fanü pokiten ar aleasochisi än Kot we allük fiti pwülüem, nöüm mwän me fefin, meinisin mi tongeni silei o weweiti ewe pwon, 29 aia chufengen me äm kewe souemwen le pwon fän akapel. Aia pwon fän akapel pwe aipwe apwönüetä än Kot we allük Moses nöün Kot we chon angang a ngenikem, aipwe pwal aleasochisi än ewe Samol mi Lapalap äm we Samol kewe allük me pwüüng meinisin. Nge iö kana ra atai ei pwon repwe anümamau. 30 Äm aisap apwüpwülüa nöüm kewe föpwül ngeni aramasen ei fanü ika apwüpwülüa nöüm alüal ngeni nöür föpwül. ✡Eks 34.16; Tut 7.3 31 Nge are aramasen ekewe fanü repwe uwato pisek ika wiich pwe repwe amömö lon ewe ränin sapat, äm aisap kamö seniir lon ewe ränin sapat ika lon eu rän mi pin. Äm aisap fotuki och lon iteiten afisuen ier, aia pwal amusala än pwiim kewe liwinimang. ✡Eks 23.10-11; Lif 25.1-7; Tut 15.1-2

32 Iwe, äm aia pwal püsin pwon pwe aipwe püngütiu eu lewalu aunus silifer iteiten ier fän iten angangen imwen äm we Kot: ✡Eks 30.11-16 33 Fän iten ekewe pilawa mi pin, ewe asoren mongö me ewe asoren kek mi fifis iteiten rän, fän iten ekewe asor mi fis lon ränin sapat, lon ekewe ränin popun maram, lon ekewe chulap mi kefil, fän iten ekewe asor mi pin, ekewe asoren tipis fän iten amusamusen än ekewe aramasen Israel tipis, pwal fän iten angangen lon imwen äm we Kot meinisin. 34 Äm kewe souasor, ekewe mwän seni ewe ainangen Lefi me ekewe aramas, aia pwal üttüt won iö lein än semelapem kewe cho epwe uwato amwüch lon imwen äm we Kot iteiten ier lon ewe fansoun mi afat, fän iten ekewe asor repwe kek won än ewe Samol mi Lapalap äm we Kot we rongen asor, usun a fen mak lon ewe allük. 35 Äm aia pwon pwe iteiten ier aipwe uwato mwen uän fotäm irä lon ewe imwenfel, pwal mwen uän ekewe sokopaten irä meinisin. ✡Eks 23.19; 34.26; Tut 26.2 36 Äm aipwe uwato nöüm kewe mwänichi ren ekewe souasor mi angang lon imwen äm we Kot pwe nöün. Aipwe pwal uwato mweinöün nöüm pwiin kow me sip me kuuch, usun a fen mak lon ewe allük. ✡Eks 13.2 37 Äm aipwe pwal uwato ren ekewe souasor lon ekewe rumwen iseis lon imwen äm we Kot öüwäem pilawa seni mwen kiniem wiich, pwal äm kewe asor seni uän ekewe irä meinisin, seni ewe wain me apüra. Aipwe pwal uwala ewe eu leengolun uän äm pwül ren ekewe mwän seni ewe ainangen Lefi, pun ir ra wisen ioni ekewe leengol seni lon sopum kewe meinisin. ✡Num 18.21 38 Nge ekewe souasor ir mwirimwirin Aaron repwe eti ekewe mwän seni ewe ainangen Lefi, lupwen repwe angei ekewe leengol. Iwe, ekewe mwän seni ewe ainangen Lefi repwe uwato eu leengol seni ekewe leengol lon ekewe rumwen iseis lon imwen äm we Kot. ✡Num 18.26 39 Ekewe chon Israel me ekewe mwän seni ewe ainangen Lefi repwe uwato ekewe asor seni wiich, wain me apüra lon ekewe rumwen iseis ia ekewe pisek fän iten ewe imwenfel ra nom ie, pwal ia ekewe souasor mi angang, ekewe chon mamasa ekewe asamalapen imwenfel me ekewe chon köl ra nom ie. Äm aisap tümwününgau ngeni angangen imwen äm we Kot.