11
Iteiten ekewe aramas mi nom lon Jerusalem
11.1-24
Iwe, ekewe souemwenin aramas ra nom lon Jerusalem. Nge ekewe lusun aramas ra üttüt won eu famili me lein engol famili pwe epwe feito o nonom lon Jerusalem ewe telinimw mi pin, nge ekewe tiu lusun repwe nonom lon en me an telinimw. Iwe, ekewe aramas ra afeiöchü chokewe meinisin mi filätä seni mochenin letiper pwe repwe nonom lon Jerusalem. Nge lon ekewe lusun telinimwen Juta ekewe chon Israel, ekewe souasor, ekewe mwän seni ewe ainangen Lefi, ekewe chon angang ngeni ewe imwenfel me ekewe mwirimwirin nöün Salomon kewe chon angang ra nonom lon en me lenian lon ar kewe telinimw. Ikkei iten ekewe samolun ewe fanü Juta mi nom lon Jerusalem: Seni chon ewe ainangen Juta: Ataia nöün Usia we mwän, Usia nöün Sekaria, Sekaria nöün Amaria, Amaria nöün Sefatia, Sefatia nöün Malalel, nge Malalel eman mwirimwirin Peres. Ne 7.13 Pwal Maseia nöün Paruk we mwän, Paruk nöün Kolhose, Kolhose nöün Hasaia, Hasaia nöün Ataia, Ataia nöün Joiarip, Joiarip nöün Sekaria, nge Sekaria eman mwirimwirin Sela. Iwe, ekewe mwirimwirin Peres meinisin mi nom lon Jerusalem ükükün föpükü wone me waluman mwän mi pöchökül o pwora.
Nge seni chon ewe ainangen Peniamin: Salu nöün Mesulam we mwän, Mesulam nöün Joet, Joet nöün Petaia, Petaia nöün Kolaia, Kolaia nöün Maseia, Maseia nöün Itiel, nge Itiel nöün Jesaia, pwal märärin kewe Kapai me Salai, irfengen meinisin ükükün tiwepükü rüe me waluman. Iwe, Joel nöün Sikri ar sounemenem, nge Juta nöün Hasenua a kisin fan le nemenem lon ewe telinimw.
10 Ikkei iten ekewe souasor mi nom lon Jerusalem: Jetaia nöün Joiarip we mwän me Jakin, 11 Seraia nöün Hilkia we mwän, Hilkia nöün Mesulam, Mesulam nöün Satok, Satok nöün Meraiot, nge Meraiot nöün Ahitup, ewe mi nemeni ewe imwen Kot, 12 fiti märärir kewe mi föri angangen lon ewe imwenfel, irfengen meinisin ükükün walupükü rüe me ruoman. Iwe, pwal Ataia nöün Jeroham we mwän, Jeroham nöün Pelalia, Pelalia nöün Amsi, Amsi nöün Sekaria, Sekaria nöün Pasur, nge Pasur nöün Malkia, 13 fiti märärin kewe, ir mwänirelan än semer kewe cho, irfengen meinisin ükükün ruupükü faik me ruoman. Pwal Amasai nöün Asarel we mwän, Asarel nöün Asai, Asai nöün Mesilemot, nge Mesilemot nöün Imer, 14 fiti märärin kewe, ir sounfiu mi pwora, irfengen meinisin ükükün ipükü rüe me waluman. Iwe, Saptiel nöün Haketolim we mwän ar sounemenem. 15 Pwal ikkei iten ekewe mwän seni ewe ainangen Lefi: Semaia nöün Hasup we mwän, Hasup nöün Asrikam, Asrikam nöün Hasapia, nge Hasapia nöün Puni. 16 Iwe, Sapetai me Josapat ir samolun ekewe mwän seni ewe ainangen Lefi, ra wisen nemeni angangen ünükün ewe imwen Kot. 17 Pwal Matania nöün Mika we mwän, Mika nöün Sapti, nge Sapti eman mwirimwirin Asaf, i souemwenin ewe mwichen chon köl a wisen chietä ewe kölün kilisou lupwen fansoun iotek. Iwe, Pakpukia ewe aruomanün me lein märärin kewe, pwal Apta nöün Samua we mwän, Samua nöün Kalal, nge Kalal eman mwirimwirin Jetutun. 18 Iwe, ekewe mwän seni ewe ainangen Lefi meinisin mi nom lon Jerusalem ewe telinimw mi pin ükükün ruupükü walik me föman.
19 Iwe, iten ekewe chon mamasa asamalapen imwenfel Akup me Talmon fiti märärir kewe ükükün ipükü fik me ruoman. 20 Nge ekewe lusun chon Israel, ekewe lusun souasor me chon ewe ainangen Lefi ra nonom lon ekewe telinimwen Juta lon en me püsin fanüan. 21 Iwe, ekewe chon angang ngeni imwenfel ra nonom lon Ofel, eu kinikinin lon ewe telinimw Jerusalem, nge Siha me Kispa ra wisen nemeniir.
22 Iwe, ewe sounemenemen chon ewe ainangen Lefi mi nom lon Jerusalem itan Usi nöün Pani we mwän, Pani nöün Hasapia, Hasapia nöün Matania, nge Matania nöün Mika, eman me lein ekewe mwirimwirin Asaf, ir ekewe chon köl mi wisen köl lupwen ar fel lon ewe imwen Kot. 23 Pun mi wor eu allük fän iten ekewe chon köl me ren ewe king, a akota usun ar angang repwe föri iteiten rän. 24 Nge Petaia nöün Mesesapel we mwän seni ekewe mwirimwirin Sera nöün Juta a wisen tupuni ekewe aramasen Israel ngeni ewe kingen Persia won mettoch meinisin.
Ekewe sop lükün Jerusalem
11.25-36
25 Ikkei ekewe telinimw me ekewe tanipi ünükür, ekoch chon ewe ainangen Juta ra nonom lon: Kiriat-arapa, Tipon me Jekapsel fiti wisoposopur kewe. 26 Ra pwal nom lon ekewe telinimw Jesua, Molota me Petpelet, 27 Hasar-sual me Persepa fiti wisoposopun kewe, 28 lon Siklak me Mekona fiti wisoposopun kewe. 29 Ra pwal nom lon En-rimon, Sora me Jarmut, 30 Sanoa me Atulam fiti wisoposopur kewe, lon Lakis me ekewe tanipi ünükün, pwal lon Aseka fiti wisoposopun kewe. Iei usun ekewe chon Juta ra nonom lon ewe fanü seni Persepa mi nom ör tori ewe lemolun Hinom mi nom efeng. 31 Nge chon ewe ainangen Peniamin ra nonom lon Kepa, Mikmas, Aia me Petel fiti wisoposopun kewe, 32 lon Anatot, Nop me Anania, 33 Hasor, Rama me Kitaim, 34 Hatit, Sepoim me Nepalat, 35 Lot me Ono, pwal lon ewe lemol ia ekewe mwän mi sipeöch le angang ra nom ie. 36 Iwe, ekoch aramas seni ewe ainangen Lefi mi nom lon fanüen chon Juta ra awiseer pwe repwe nonom lon fanüen chon Peniamin.

11:4: Ne 7.13