1 Ikkei ir ekewe souasor me ekewe mwän seni ewe ainangen Lefi mi liwinsefäl seni ar oola, ra etato Serupapel nöün Sealtiel we mwän me Jesua: Ekewe souasor Seraia, Jeremaia, Esra, 2 Amaria, Maluk me Hatus, 3 Sekania, Rehum me Meremot, 4 Ito, Kinetoi me Apia, 5 Miamin, Matia me Pilka, 6 Semaia, Joiarip me Jetaia, 7 Salu, Amok, Hilkia me Jetaia. Ikkei ir samolun lein ekewe souasor fiti märärir kewe lon ränin manauen ewe souasor mi lap Jesua.

8 Ikkei ir ekewe mwän seni ewe ainangen Lefi: Jesua, Pinui, Katmiel, Serepia, Juta me Matania, nge Matania fiti märärin kewe ra wisen chietä ekewe kölün kilisou. 9 Nge Pakpukia me Uno fiti märärir kewe ra ü awenewener lon ar mwichen köl mi likatatap. 10 Iwe, Jesua semen Joiakim, Joiakim semen Eliasip, nge Eliasip semen Joiata, 11 Joiata semen Jonatan, nge Jonatan semen Jatua.

12 Ikkei ir ekewe souasor, ir mwänirelan än semer kewe cho lon ränin manauen ewe souasor mi lap Joiakim: Meraia seni än Seraia we cho, Hanania seni än Jeremaia we cho, 13 Mesulam seni än Esra we cho, Jehoanan seni än Amaria we cho, 14 Jonatan seni än Maluki we cho, Josef seni än Sepania we cho, 15 Atna seni än Harim we cho, Helkai seni än Meraiot we cho, 16 Sekaria seni än Ito we cho, Mesulam seni än Kineton we cho, 17 Sikri seni än Apia we cho, Piltai seni än Miniamin-Moatia we cho, 18 Samua seni än Pilka we cho, Jehonatan seni än Semaia we cho, 19 Matenai seni än Joiarip we cho, Usi seni än Jetaia we cho, 20 Kalai seni än Salai we cho, Eper seni än Amok we cho, 21 Hasapia seni än Hilkia we cho, Netanel seni än Jetaia we cho.

22 Iwe, lon ränin manauen ekewe souasor mi lap Eliasip, Joiata, Johanan me Jatua a mak iteiten ekewe mwän seni ewe ainangen Lefi, ir mwänirelan än semer kewe cho, a pwal mak iteiten mwänirelan än ekewe souasor cho. Ei iteit a wes lon mwün Tarius ewe kingen Persia. 23 Nge iteiten ekewe mwän seni ewe ainangen Lefi, ir mwänirelan än semer kewe cho, a chök makelong lon ewe puken uruwo tori ränin Johanan nöün Eliasip we mwän. 24 Iwe, ikkei iten samolun ekewe mwän seni ewe ainangen Lefi: Hasapia, Serepia me Jesua nöün Katmiel we mwän, nge märärir kewe ra ü awenewener pwe repwe kölün mwareiti Kot o kilisou ngeni, usun Tafit ewe aramasen Kot a fen allük, eu mwich a likatatap mürin pwal eu mwich le köl. 25 Nge Matania, Pakpukia, Opatia, Mesulam, Talmon me Akup ra chon mamasa asamalapen ekewe imwen iseis arun asamalapen ewe imwenfel. 26 Ätekei ra föri ar angang lon ränin manauen Joiakim nöün Jesua we mwän, nge Jesua nöün Jehosatak, lon ränin manauen ewe kepina Nehemia, pwal lon ränin manauen ewe souasor Esra ewe sousile allük.

27 Iwe, lupwen fansoun efinünen ewe tittin Jerusalem ra kütta ekewe mwän seni ewe ainangen Lefi lon lenier kewe meinisin o emwenireto Jerusalem, pwe repwe föri efinünen ewe tit fän pwapwa, fän kölün kilisou, fän ar pisekin kaktai, fän tikin kitar me ükülele. 28 Iwe, ekewe chon köl seni familien chon ewe ainangen Lefi ra chufengen seni ekewe leni pwelin ünükün Jerusalem, seni ekewe sop ia ekewe chon Netofa ra nom ie, 29 pwal seni Pet-kilkal me ekewe fanü Kepa me Asmafet. Pun ekewe chon köl ra aüetä telinimw fän iter pwelin ünükün Jerusalem. 30 Iwe, ekewe souasor me ekewe mwän seni ewe ainangen Lefi ra püsin alimöchüür, ra pwal alimöchü ekewe aramas o föri angangen alimelim ngeni ekewe asamalap me ewe tit.

31 Mürin üa amwichafengeni ekewe samolun Juta won ewe tit o filätä ruu mwichen köl mi chocho, pwe repwe fetal won ewe tit o kölün kilisou. Eu mwich a fetal ngeni pelifich tori ewe Asamalapen Pipi. 32 Iwe, Hosaia a tapwela mürir fiti esopun ewe mwichen samolun chon Juta, 33 pwal Asaria, Esra me Mesulam, 34 Juta, Peniamin, Semaia me Jeremaia, 35 pwal ekoch souasor fän nöür kewe rappwa ra tapwela mürir me Sekaria nöün Jonatan we mwän, Jonatan nöün Semaia, Semaia nöün Matania, Matania nöün Mikaia, Mikaia nöün Sakur, nge Sakur nöün Asaf. 36 Iwe, märärin kewe ra tapwela mürin: Semaia, Asarel, Milalai, Kilalai, Maai, Netanel, Juta me Hanani fän ar pisekin ettik ra apirü seni förien Tafit ewe aramasen Kot. Nge Esra ewe sousile allük a akom mwer. 37 Iwe, lupwen ra tori ewe Asamalapen Chönüttu, ra fetal wenewenetä won ewe latö mi feitä ngeni ewe telinimwen Tafit o fetal won ewe al mi feitä won ewe tit asen imwen Tafit, ra pwal feila ngeni ewe Asamalapen Koluk mi nom ötiu.

38 Iwe, ewe aruuen mwich mi kölün kilisou a pwerela ngeni peliefengin me won ewe tit, nge ngang üa tapwela mürir fiti esopun ewe mwichen samolun ekewe aramas. Äm aia fetal asen ewe imw tekia Lenien Umw o fetal ngeni ewe tit mi chölap. 39 Seni ikenan aia feila asen ewe Asamalapen Efraim o feila ngeni ewe Asamalapen Lom, ngeni ewe Asamalapen Ik me ewe imw tekia imwen Hananel, pwal ngeni ewe imw tekia itan Ipükü tori ewe Asamalapen Sip. Iwe, aia kaüla ren ewe Asamalapen Chon Mamas. 40 Iei usun ekewe ruu mwich mi kölün kilisou ra tori ewe imwen Kot. Pwal ngang me esopun ewe mwichen nöüwis aia nom rer, 41 pwal ekewe souasor Eliakim, Maseia, Miniamin, Mikaia, Elioenai, Sekaria me Hanania ra ütä fän nöür kewe rappwa, 42 pwal Maseia, Semaia, Eleasar, Usi, Jehoanan, Malkia, Elam me Eser. Nge ekewe chon köl ra köl fän emwenien Jesraia. 43 Lon ena rän ra eäni asor chomong mönün asor, ra pwal meseik, pun Kot a föri pwe repwe meseik fän pwapwa mi watte. Pwal ekewe fefin me semirit ra meseik. Iwe, aramas ra rongorong me toau än chon Jerusalem pwapwa.

44 Iwe, lon ena fansoun ra filätä mwän repwe tümwünü ekewe rumw ia ra iseis ie ekewe lifang, ekewe mwen ua me ekewe leengol. Ra wisen ionifengeni seni ekewe tanipi mi nom ünükün ekewe telinimw ewe kinikin a fen pwüngüla lon allük o isenalong lon ekewe rumwen iseis fän iten ekewe souasor me ekewe mwän seni ewe ainangen Lefi. Iwe, ekewe chon Juta ra pwapwa ren angangen ekewe souasor me ekewe mwän seni ewe ainangen Lefi, ✡1.Kron 25.1-8; 1.Kron 26.12 45 pun ra föri angangen ar we Kot me ewe angangen limelim. Pwal ekewe chon köl me ekewe chon mamasa asamalapen imwenfel ra föri ar angang usun Tafit me Salomon nöün we mwän ra allük. 46 Pun seni me lom lon ränin manauen Tafit me Asaf a wor chon emweni ekewe chon köl mi kölün mwareiti me kilisou ngeni Kot. 47 Iwe, lon ränin manauen Serupapel pwal lon ränin manauen Nehemia, chon Israel meinisin ra ngeni ekewe chon köl me chon mamasa asamalapen imwenfel wiser iteiten rän. Iwe, ra aimwüela wisen ekewe mwän seni ewe ainangen Lefi, nge ekewe mwän seni ewe ainangen Lefi ra aimwüela wisen ekewe mwirimwirin Aaron.