1 Iwe, lon ena fansoun, lupwen ra aleani än Moses we puken allük ngeni ekewe aramas, ra küna me lon pwe esap wor eman chon Amon ika chon Moap epwe tongeni choni nöün Kot we mwichen aramas. 2 Pun ir resap souni ekewe chon Israel fän pilawa me koluk, lupwen ra towu seni Isip, nge ra fen möni Palam pwe epwe pälüeniir o anümamaueer. Nge äm we Kot a sorei ewe anümamau ngeni feiöch. ✡Tut 23.3-5; Num 22.1-6 3 Lupwen ekewe aramasen Israel ra rongorong ei allük, ra aimwüela seni ar we mwich chokewe meinisin ir mwirimwirin chon ekis.

4 Nge me lom ewe souasor Eliasip mi kefilitä, pwe epwe tümwünü ekewe rumwen iseis lon imwen äm we Kot, a pwipwi ngeni Topia. 5 Iwe, Eliasip a mwütätä ngeni Topia eu rumw watte ia ra iseis ie me mwan ewe asoren mongö, ewe apach mi pwokus, ekewe pisek fän iten imwenfel, ekewe asor fän iten ekewe souasor me ekewe leengolun wiich, wain me apüra fän iten ekewe mwän seni ewe ainangen Lefi, ekewe chon köl me ekewe chon mamasa asamalapen imwenfel. 6 Iwe, lupwen a fis ei lapalap, ngang üsap nom lon Jerusalem, pun lon ilik me ruuen ierin mwün Artaksasta ewe kingen Papilon üa liwiniti ewe king. Nge mürin eu fansoun üa tüngorei ewe king pwe epwe mwüt ngeniei ai üpwe liwinla. 7 Iwe, üa tori Jerusalem. Mürin üa küna ewe lapalap mi ngau Eliasip a föri, pwe a mwütätä ngeni Topia eu rumw me lon imwen Kot. 8 Iwe, üa fokun song o aturawu pisekin Topia meinisin seni lon ewe rumw. 9 Mürin üa allük pwe repwe föri angangen limelim lon ewe rumw, üa pwal aliwinala ekewe pisek fän iten ewe imwen Kot, ewe asoren mongö me ewe apach mi pwokus.

10 Üa pwal küna pwe ekewe aramas resap ngeni ekewe mwän seni ewe ainangen Lefi wiser. Iei mine ir me ekewe chon köl mi wisen föri ewe angang mi pin ra en me liwiniti an tanipi. ✡Tut 12.19 11 Iwe, üa apwüngü ekewe nöüwis o aisiniir, “Pwota ekewe aramas ra likitala ewe imwen Kot?” Iwe, üa amwichafengeni ekewe mwän seni ewe ainangen Lefi o atosefälirelong lon en me an angang. 12 Mürin, ekewe chon Juta meinisin ra uwato ekewe leengolun wiich, wain me apüra seni föün olif lon ekewe rumwen iseis. ✡Mal 3.10 13 Iwe, üa filätä ekoch mwän pwe repwe tümwünü ekewe rumwen iseis: ewe souasor Selemia, Satok ewe sousile allük me Petaia seni chon ewe ainangen Lefi. Nge ewe mi wisen alisiir Hanan nöün Sakur we mwän, nge Sakur nöün Matania. Iwe, a pwä pwe ätekei ir mwän mi allükülük, ra wisen ainetöchü ekewe mongö ngeni märärir kewe. 14 Ai Kot, kopwe chechemeniei fän äsengesin mine üa föri, nge kosap aücheangaua ai kewe föför mi mürina üa föri fän iten imwom me om kewe angang mi fis lon.

15 Lon ekana fansoun üa küna ekoch aramas me lon Juta, ra üchüch wain lon ewe ränin sapat. Pwal ekoch ra iseis wiich, wain, föün wain me fiik pwal sokopaten mettoch won nöür aas o uweereto Jerusalem lon ewe ränin sapat. Iwe, üa fönöör pwe resap amömö ewe mongö lon ewe ränin sapat. ✡Eks 20.8-10; Tut 5.12-14; Jer 17.21-22 16 Mi pwal wor re Tirus ra nom lon Jerusalem, ra uwato ik me sokopaten pisek o amömö ngeni ekewe aramasen Juta lon ewe ränin sapat. 17 Mürin üa apwüngü ekewe aramas tekia seni Juta o üreniir, “Pwota oua föri ei sokun föföringau pwe oua apiningaua pinin ewe ränin sapat? 18 Ifa usun, ämi kewe lewo resap pwal föri ei sokun föför, nge ach we Kot a atoto woch pwal won ei telinimw ekei feiengau meinisin? Nge ämi oua alapala än Kot lingeringer won Israel ren ämi apiningaua pinin ewe ränin sapat.”

19 Iwe, üa allük pwe ekewe asamalapen Jerusalem repwe kapüngüla, lupwen a popuetä pwinila me mwen ewe ränin sapat, nge resap tongeni suksefäl tori wesin ewe ränin sapat. Üa pwal anomu ekoch me lein nei chon angang ren ekewe asamalap, pwe esap wor eman a tongeni uwalong och mettoch lon ewe telinimw lon ewe ränin sapat. 20 Mürin, ekewe chon amömö mi amömö sokopaten pisek ra chök pwinipwin lükün tittin Jerusalem fän eu ika fän ruu. 21 Nge ngang üa fönöör o üreniir, “Pwota oua pwinipwin lükün ewe tit? Are oupwe försefäli, üpwe pöchökül ngenikemi.” Seni ei fansoun resap chüen feito lon ewe ränin sapat. 22 Iwe, üa allük ngeni ekewe mwän seni ewe ainangen Lefi, pwe repwe püsin alimöchüür, repwe feito o mamasa ekewe asamalap, pwe aramas repwe pinini pinin ewe ränin sapat. Ai Kot, kopwe chechemeniei fän äsengesin pwal ei föför üa föri, kopwe ümöümöch ngeniei lon om tong ellet mi fokun lapalap.

23 Lon ekana fansoun üa pwal küna re Juta mi pwüpwülü ngeni fin Astot, Amon me Moap. 24 Iwe, esop seni nöür kewe semirit ra eäni fosun Astot ika och sokun fosun aramas, nge resap tongeni eäni fosun Juta. 25 Iwe, üa apwüngüür o anümamaueer, nge ekoch me leir üa wichiir o ütti meten mökürer. Mürin, üa pesei ngeniir pwe repwe pwon fän akapel iten Kot, pwe resap fokun chüen apwüpwülüa nöür föpwül ngeni nöün ekewe chon ekis alüal, ika angei nöün ekewe chon ekis föpwül pwe pwülüen nöür alüal ika püsin pwülüer. ✡Eks 34.11-16; Tut 7.1-5 26 Üa üreniir, “Ifa usun, Salomon ewe kingen Israel esap tipis pokiten ena sokun fefin? Esap wor eman king usun i me lein kingen ekewe mwü meinisin. An Kot a fokun echeni o seikätä pwe epwe kingen Israel. Iei mwo ei, nge ekewe fin ekis ra tongeni emwenalong Salomon lon tipis. ✡2.Sam 12.24-25; 1.King 11.1-8 27 Ifa usun, äm aipwe apirükemi o föri ekei föför mi fokun ngau, pwe aipwe aleasolap ngeni äm we Kot ren äm pwülüeni ekewe fin ekis?”

28 Iwe, eman seni nöün Jehoiata we mwän, nge Jehoiata nöün Eliasip ewe souasor mi lap, a pwülüeni eman föpwül nöün Sanpalat ewe re Pet-horon. Iei mine üa asüela Jehoiata seni Jerusalem. ✡Ne 4.1 29 Ai Kot, kopwe chechemeni ekei aramas, pun ra alimengaua ewe wisen souasor, ra pwal atai ewe pwon en ka föri ngeni ekewe souasor me ekewe mwän seni ewe ainangen Lefi.

30 Iei usun üa limeti ekewe aramas seni föförün ekewe chon ekis meinisin o akota wisen ekewe souasor me wisen ekewe mwän seni ewe ainangen Lefi, eman me eman ngeni an angang. 31 Iwe, üa pwal akota fansoun ineet ekewe aramas repwe uwato amwüchün ekewe asor me ekewe mwen ua. Ai Kot, kopwe chechemeni ei o afeiöchüei.