Pauro Yaromi Bei Moiro Yai Ta Firemon Munom Ganom I Boi Tome
Firemon yaromi Korosi tei moiro tai ta ta munmane ako moiro te Yesu fi ki si tome. Yaromi nuwi kokonan gan ta i kam Onisima yaromi tai kunei nere Firemon moingui tei ma dere tongi fure Roma tei fume. Ena ari suwo koropane bei moiro Onisima okom akore kan iki fiasi deingoro ena Pauro ama kan iki tei moimie. Ena Pauro gunom kam di mari de tongoro Onisima nomanem si awa tere Yesu fi ki si tome.
Ena Pauro te Onisima ama yo moiro ena okome “Onisima furo Firemon moingui tei namie,” diro munom ganom i Firemon boi tome. Pauro ka epe Firemon di tome: “Onisima unangua ena ne denum minum gore di to! Yaromi ne nuwi kokonan gan towane moikemba yaromi Yesu ama fi ki si tongua ena ne arinum ama moimie,” epe di tome.
1
Na Pauro. Te nonon emenom Timoti gere no surai bei moiro munom ganom ya ne Firemon boi eropuiye. Koma na Kirisito Yesu kokonanom beika ena ari yokamai na nakire kan iki tei de nareime. Ena ne Firemon Yai Gumam kokonan ama benga te no surai denom minom ne mun fi erepuka ena munom ganom i boi eropuiye.* Ef 3:1 Te no surai ama bei moiro nonon kepenom Apia oparomi te yai ta Akipa mapunom niki dongua kura boi tongua yaromi te ari yai opai “Yai Gumam kam firapune,” diro ne ikinumdi tei kuku boinga yokamai munom ganom i ama boi eropuiye.* Kor 4:17; 2 Ti 2:3 Ena na ka make ei tere “O Yai Gumam, no yokamai aunom, ne te no Ari Wanopanom Yesu Kirisito bei moiro Firemon yaromi te ariyoma yokamai bei nokapu de erere te bei wira di ero!” epe diro ka make ei teiye.* Gar 1:3
Pauro yaromi Firemon mun fi tome
4-5 Ena kakom kakom na fikai ne bei moire ari yai opai Yai Gumam gama yo tere moinga yokamai muruwo denum minum mun fi erere te ne Ari Wanopanum Yesu fi ki si tenga ena na ka make ei moika kakom kakom ne kanum dairo na Yai Gumanam yaromi mun fi teiye.* Ro 1:8-9 Ena na moiro “Nonon yokamai Kirisito moingui tei moipunga tai kan nokapu wom muruwo ipunga tarom i ne kananie,” diro ka make epe ei teiye: “Ne koro koro furo fi ki si tenga mapunom ari yai opai muruwo di mari de erowane,” diro na ka make ei teiye.* Fir 1:9; Kor 1:9 Kawom, na emenamyo, ne ari yo teinga yokamai denum minum mun fi erere te yokamai denom minom bei erowai te erenga ena na denam minam mun ori wom fika moko faimie.* 2 Ko 7:4
Pauro bei moiro nuwi kokonan gan ta Onisima ekurowangua kam Firemon mina wako tome
Ena na denam minam moko iwa fungua te na Kirisito si dauika ena na yoporam boiro “Ne tai mapunom ta fainguamere epe beyo!” epe duwaika i fanamba te na ka epe duwaro kam fikeiye. Ena no surai denom minom towane towane mun fi eropuka na ka i wira diro ne di erowaiye. Kawom, na Pauro na yai dumanom eiro te na Kirisito Yesu kam di mari deika yarom kan faika na kam epe di erowaiye.* Fmn 1:1 10 Ena na bei moiro “Ne furo na wanam Onisima yaromi bei nokapu de to!” diro mina wakoro di ereiye. Na kan iki fairo yaromi gunom kam di teika ena yaromi fi ki si tongua na wanam epemere u mari fume.* 1 Ko 4:15; Kor 4:9 11 Te ne mora fingai yaromi kam i “Yaromi ari akire di erome,” mapunom epe dumba koma yaromi kokonan beiro ne akire di erekeme. Te epena yaromi kokonan nokapu beiro na akire di naromie. Te okome yaromi uro ne ama akire di erowamie.
12 Ena epena na denam minam Onisima yaromi mun fi teipa na yaromi awi ne moingi tei de erowaiye. 13 Koma na furo gunom kam di mari deika ena yokamai na kan si nareingoro kan iki faiye. Ena na kan iki faika kakom tei na epe di fikai “Ne tawa moranga akire di narowanba ne tawa moikenga ena na Onisima yaromi ako moraikoro akire di narowangua faname,” epe di fiye.* Fir 2:30 14 Epe di fipa ne bei moire “O” duwangua ena na bei moiro yaromi ako ki si tekenaipa na bei moiro yaromi awi ne moingi tei dowaiye. Na ne yoporam boiro ka di erowaika ena ne “O” duwanga i faikenamba na di fikai ne bei moiro Onisima akire di towangua mapunom nokapu wom nenen firangamere epe benanga i fanamie.* 2 Ko 9:7 15 Te na di fikai Yai Gumam “Onisima yaromi okome kakom kakom uro ne moingi tei morame,” di firo ena bei moiro yaromi awi dongoro u na moiki tei uro kakom gurom towane toka tawa moi naromie. 16 Ena kawom epena yaromi u ne moingi tei unangua yaromi koma nuwi kokonan gan moinguamere epe yo moikename. Tamanume. Yaromi tai mapunom i ime dere ena Yesu fi ki si tongua iran i epena no emenom ama kawom moingoro ena no denom minom yaromi towapunga fanamie. O, na nanan denam minam yaromi mun fi teipa te ne bei moiro “Yaromi na nuwi kokonanam gan moire te Ari Wanopanom fi ki si tongua na emenam ama moime,” di fire ena ne denum minum yaromi fi moko iwa de towane.* 1 Ti 6:2
17 Ena ne na fi narowangai na ne gere Kirisito yaromi kokonanom kounom kounom bei morapuka ena ne bei moiro na nakukurowangamere epe Onisima yaromi unangua kukuro! 18 Te yaromi bei moiro tai ta ne mokom bai erekenangua ena yaromi kam i ma dere tokoi na kanam i enanga iran i na tai i ne mokom bai erowaiye. 19 Na Pauro na ka munom i na okonamdi tei boika dumie. Ena na nanan tai ne mokom bai erowaiye. Kawom ne fino? Koma na ne akire di ereika ena ne kakom kakom moi kuwom suwanga akaiyom inie. Te na kokonan epe bei ereika ne mokom bai narere akiro di narowanga i fanamba na ka i di erekenaiye. Ena epe mere Onisima yaromi furo ta ne mokom bai erekenangua i ama faname.* 1 Ko 16:21; Gar 6:11 20 Aiye, emenamyo, na di fikai ne na gere Ari Wanopanom yaromi moingui tei ama moipuka ena ne Onisima kukurowanga epemere na akire di narowane. Ena ne Kirisito kam dourom boinga bei moiro na denam minam bei erowai te naro! 21 Te na yoporam boiro di fikai “Ne na kanam i dourom boiro Onisima ekurowanie,” diro na ka munom ganom i boi ereiye. Te na ama kanikai ne na kanam i dourom boranga te mapunom ta ama benanga i moko iwa name. 22 Ena na ka ta tokoi duwaiye. Ne yokamai muruwo Yai Gumam ka make ei teinga ena na “Ne moingi tei unaiye,” di fika iran ne akai wauna tei kenom bei naro!* Fir 1:25; 2:24
Ka onam dumie
23 Ena yai ta Epafara “Ne moi denio?” di erome. Yaromi Kirisito Yesu gunom kam di mari dongua ena yokamai kan si teingoro na yaromi gere no surai kan iki tei faipuiye.* Kor 1:7; 4:12 24 Te na ari kokonan towane ipunga yokamai Mako te Aritaka te Demasi te Luka yokamai ama bei moiro “Ne moi denio?” di ereime.* Kor 4:10, 14; 2 Ti 4:10-11
25 Ena na ka make eire “No Ari Wanopanom Yesu Kirisito uro ne yokamai denom minom bei nokapu de erowame,” diro ka make ei teiye. Na kanam mora epe.

*1:1: Ef 3:1

*1:2: Kor 4:17; 2 Ti 2:3

*1:3: Gar 1:3

*1:4-5: Ro 1:8-9

*1:6: Fir 1:9; Kor 1:9

*1:7: 2 Ko 7:4

*1:9: Fmn 1:1

*1:10: 1 Ko 4:15; Kor 4:9

*1:13: Fir 2:30

*1:14: 2 Ko 9:7

*1:16: 1 Ti 6:2

*1:19: 1 Ko 16:21; Gar 6:11

*1:22: Fir 1:25; 2:24

*1:23: Kor 1:7; 4:12

*1:24: Kor 4:10, 14; 2 Ti 4:10-11