Nau Kôranh Brah Ngơi Nau Tâm Rnglăp Mhe 1 Pêtrôs 5

Bunuyh i mât uănh phung nsing

1 Lŏng phung i kôranh ta phung nsing, gâp dja jêng kôranh ma phung nsing đŏng, jêng bunuyh i lĕ say ma măt nau jêr jŏt Brah Krist, ndrel ma jêng bunuyh i mra sŏ dơn ndrel nau chrêk lơp nôk Păng nhhơ săk, gâp dăn lah ma phung i kôranh ta phung nsing* 2 ăn mât njrăng phung nsing i tâm ban ma be biăp phung Kôranh Brah ăn ueh ma lĕ nuih n'hâm, mâu ôh di tâm ban ma bu nchâp, kŏ mâu di đŏng ma kơnh geh prăk, yơn ma ăn geh nuih n'hâm nđơr ma jan, ndri mơ di ta năp măt Kôranh Brah.* 3 Phung bunuyh i Kôranh Brah de jao ăn mât njrăng nây, lơi ôh dŏng nau dơi ma tŭn jot khân păng, yơn ma ăn leo nau ueh ma khân păng i tâm ban ma be biăp phung.* 4 Jêh ri ta nôk Kôranh Chiăp be biăp tât ta dja, Păng mra ăn ndơ nkhôm* i hôm nâng i geh nau chrêk lơp.*

Bunuyh i nsing ma Kôranh Brah

5 Ơ phung drôh ndăm ăn tâm ban kơt nây đŏng, ăn iăt nau mpôl kôranh†. Ăn dâng lĕ khân ay may njŭr êng săk khân ay may nơm, yorlah

‘Kôranh Brah tâm rdâng đah bunuyh i n'hi êng săk,

Yơn ma Păng yô̆ nđach ma bunuyh i njŭr êng săk ŭch iăt nau Păng’†.*

6 Lah ndri ăn khân ay may njŭr êng săk ta nâm Kôranh Brah nơm i geh nau dơi dô, gay ma Păng n'hao khân ay may, tât di mong Păng tay.* 7 Jêh ri njuyh dâng lĕ nau nklŏn rvê khân ay may ta Păng, yorlah Păng hô ngăn mân ma khân ay may.*

8 Ăn gŭ rngeh, jêh ri njrăng săk ăn gŭ di keh, yorlah Satăng i nơm rlăng đah khân ay may tâm ban ma yao mŭr ngrông, ndăch jŭm bunuyh, ŭch ma sa hêk.* 9 Lơi ôh iăt jan tâng nau păng, ăn khân ay may gŭ nâp rkâk, ăn geh nau nsing nâp, yorlah khân ay may lĕ gĭt jêh, phung oh nô khân ay may ta nau nsing lam neh ntu dja, khân păng geh nau jêr jŏt kơt khân ay may đŏng.* 10 Kôranh Brah dŭt geh nau ueh ăp ntil ngăn, Păng lĕ kuăl jêh khân ay may nây, gay ma ăn khân ay may sŏ dơn nau chrêk lơp i hôm ƀaƀơ n'ho ro yor ma ndơ Brah Krist lĕ jan nơh. Jêh khân ay may lĕ dơn nau jêr jŏt i du ƀlât nây, Păng mra rdŏk njêng khân ay may, ăn n'hâm suan ma khân ay may, ăn khân ay may dăng katang, ndrel ma ăn khân ay may gŭ nâp rkâk.* 11 Ăn nau dơi Păng hôm ƀaƀơ n'ho ro! Ơ ăn geh kơt nây ngăn ro‡.

Nau ntĭnh n'glĕ dŭt

12 Nô Silas§ i gâp kơp jêng oh nô ta nau nsing răp jăp ngăn, păng kơl gâp nchih samƀŭt gleh i dja, ndrel ma njuăl. Gâp nchih samƀŭt dja gay ma n'hao nuih n'hâm khân ay may, ndrel ma ăn khân ay may gĭt n'hêl nau ueh ngăn ngên Kôranh Brah. Ăn khân ay may gŭ nâp ta nau ueh i nây.* 13 Phung nsing ma Kôranh Brah i gŭ ta ƀon i bu kuăl Ƀaƀilôn đŏng, i lĕ Kôranh Brah de kơih kơt khân ay may nây, khân păng ôp nau ueh lăng khân ay may, jêh ri nô Markôs i gâp kơp tâm ban ma kon gâp nơm, dăn ôp nau ueh lăng khân ay may đŏng.* 14 Ăn khân ay may tâm ôp nau ueh lăng ndrăng nơm ma nau ueh rah rơch*. Dăn Kôranh Brah ăn nau đăp mpăn dâng lĕ khân ay may i gŭ ndrel Brah Krist.

*5:1 5:1: Luk 24:48; Rôm 8:17; 2Kô 1:7

*5:2 5:2: Yôh 10:12; 21:15-17; Kar 20:28; 1Ti 3:1-7; 6:5

*5:3 5:3: 1Kô 11:1; 2Kô 1:24

*5:4 5:4: ‘Ndơ nkhôm’, mâu lah ‘Môk kađăch’.

*5:4 5:4: Yak 1:12; NTM 3:11

†5:5 5:5: ‘Kôranh’, mâu lah ‘Bu ranh’.

†5:5 5:5: Hôr 3:34

*5:5 5:5: Êph 5:21; Mat 23:12; Yak 4:6

*5:6 5:6: Yak 4:10

*5:7 5:7: NMƠ 55:22; Mat 6:25-34; Phi 4:6

*5:8 5:8: Luk 22:31; 2Kô 2:11; 1Tê 2:18; 5:6

*5:9 5:9: Rôm 13:11-12; Êph 6:11; Yak 4:7; 2Ti 3:12

*5:10 5:10: 1Pê 1:5-6

‡5:11 5:11: ‘Ơ ăn geh kơt nây ngăn ro’, mâu lah ‘Amen’.

§5:12 5:12: Ta nau ngơi Grek geh rnha păng lah: ‘Silvanus’, jêng rnha bar ơ̆, păng bunuyh hăn ndrel Pôl ŏk ngăn (Kar 15:40).

*5:12 5:12: 2Tê 1:1

*5:13 5:13: Kar 12:25

*5:14 5:14: Ta nau ngơi Grek lah: ‘Ma nau chŭm kloh ueh’. Bân aƀaơ ri mâu hôm gĭt n'hêl moh geh nau khlay ma nau chŭm i nây.