Da Govmen Guys Dat Work Fo Solomon
1 Dass how was, wen Solomon was da King fo all da Israel peopo. 2 An now, dis da lis wit his main govmen guys:
Azariah Zadok boy was da Main Pries Guy.
3 Eli-Horef, Shisha boy an his braddah Ahijah, dey take kea da palace records.
Jehoshafat Ahilud boy write da history, eryting dat wen happen.
4 Benaiah Jehoiada boy, da army leada.
Zadok an Abiatar, dey da prieses.
5 Azariah Nathan boy, in charge a da districk govna guys.
Zabud Nathan boy was one pries, an one good fren dat da King trus.
6 Ahishar stay in charge a da palace.
Adoniram Abda boy, in charge a da guys dat no mo pay, dat gotta work fo da king.
7 Solomon get twelve districk govna guys. Dey stay in charge a all da Israel peopo. All dem get da job fo bring from dea districk all da food da King an his peopo need fo eat. Ery districk take one month from ery year. 8 Dis da names fo da twelve govna guys.
Ben-Hur, fo up country Efraim side.
9 Ben-Deker, fo Makaz, Shaalbim, Bet-Shemesh, an Elon-Bet-Hanan side.
10 Ben-Hesed, fo Arubot side, wit Sokoh an all da Hefer land.
11 Ben-Abinadab, fo all da Nafot-Dor land. (He marry Solomon girl Tafat.)
12 Baana Ben-Ahilud, fo Taanak, Megiddo, all da Bet-Shean land nex to Zaretan, down side from Jezreel, an from Bet-Shean ova to Abel-Meholah, an from dea across to Jokmeam.
13 Ben-Geber, fo Ramot-Gilead side. He get da small towns dat Jair Ben-Manasseh wen build Gilead side, an da Argob lands Bashan side, sixty big towns dat get strong wall aroun dem an bronze bars fo hold da town gates shut.
14 Ahinadab, Iddo boy, fo Mahanaim side.
15 Ahimaaz, fo Naftali side. (He wen marry Solomon girl Basemat.)
16 Da odda Baana, Hushai boy, fo Asher an Bealot side.
17 Da odda Jehoshafat, Paruah boy, fo Issakar side.
18 Shimei Ela boy, fo Benjamin side.
19 Geber Uri boy, fo Gilead side, da place wea befo time Sihon was king fo da Amor peopo, an da place wea Og was King, Bashan side.
An had anodda govna guy dat stay in charge a da whole land.
20 All ova da Judah an Israel land, get choke plenny peopo, jalike da sand on top da beach. Dey all get plenny fo eat an drink, an dey stay good inside. 21 ✡ 4:21: Start 15:18; 2Rec 9:26Solomon was da King in charge a all da local kine kings from da Eufrates Riva to da Filisha land, an all da way to da Egypt borda. Da local kine kings bring rich kine gifs fo Solomon an dey work fo him all da time Solomon stay alive.
22 Fo feed all da palace peopo, ery day Solomon get 30 donkey load fancy kine wheat flour, 60 donkey load regula kine wheat flour, 23 ten cows dat dey feed inside da pen, twenny cows dat eat ony grass, hundred sheeps an goats, an three kine deer, an gooses dey feed plenny.
24 Solomon get all dat, cuz he da King ova all da local kine kings dat live da west side a da Eufrates Riva, all da way from Tifsah to Gaza. Wen Solomon was da King, eryting go good fo him from all da peopo da west side a da Eufrates, an all aroun him. 25 All da time Solomon stay alive, da Judah an Israel peopo no need worry bout notting, from da Dan land north side to Beer-Sheba town south side. Erybody can sit down unda dea grape vine an fig tree.
26 ✡ 4:26: 1Kings 10:26; 2Rec 1:14; 9:25Solomon get 4,000 place fo keep da horses dat pull his war wagons, an 12,000 horse.
27 Da twelve districk govna guys take turn ery month. Dey suppose to make shua King Solomon get plenny food fo his peopo fo eat, an fo all da odda peopo dat come by King Solomon an eat wit him. An dey erytime bring him wat he need. 28 Dey bring barley, an wheat stalk too, fo da horses dat pull da war wagons, an da odda horses. Ery govna guy bring da food he suppose to bring.
Erybody Hear Bout
How Solomon Know Wat Fo Do
How Solomon Know Wat Fo Do
29 God help King Solomon fo know wat fo do erytime, an fo undastan wass good an wass bad bout all kine stuff, cuz he gotta tink bout plenny stuff, jalike get choke plenny sand on top da beach. 30 Dass how King Solomon know wat fo do, mo betta den all da smart guys dat live da east side, an all da Egypt smart guys. 31 ✡ 4:31: Songs 89He know wat fo do mo betta den any odda guy, mo den Ethan da Ezrahi guy, an da three Mahol boys Heman, Kalkol, an Darda. Da peopo from all da odda countries aroun dea wen hea bout how awesome King Solomon stay. 32 ✡ 4:32: Smart 1:1; 10:1; 25:1; Love 1:1He wen tell 3,000 smart kine tings peopo tell fo peopo know wat fo do, an he make 1,005 song. 33 He know fo tell bout all da plants, from da big cedar tree dat grow Lebanon side, to da small oregano plant dat grow outa one wall. He know how fo tell bout da animals, da birds, da snakes an lizards, an da fish. 34 Peopo from all da odda countries wen come fo lissen King Solomon, fo find out how he know wat fo do erytime. All da odda kings dat wen hear how Solomon know wat fo do erytime, wen sen dea guys fo lissen him.
✡4:21 4:21: Start 15:18; 2Rec 9:26
✡4:26 4:26: 1Kings 10:26; 2Rec 1:14; 9:25
✡4:31 4:31: Songs 89
✡4:32 4:32: Smart 1:1; 10:1; 25:1; Love 1:1