Wat Da Smart Guys Tell
Proverbs
1
How Come Need Wat Da Smart Guys Tell
1 ✡1:1: 1Kings 4:32Inside dis book, get da importan kine stuff fo make us guys tink, da kine Solomon like tell us. (Him King David boy, da king fo da Israel peopo.)
2 Dis book az fo give you da smarts fo do da right ting erytime,
An fo live da way you suppose to live,
An fo help you undastan fo real kine
Da kine stuff you gotta know.
3 Dis book goin help you undastan wass right,
So den you goin do da right ting erytime,
An know how fo figga out wass good an wass bad
An make same kine to erybody.
4 Dis book fo da peopo dat donno notting an easy fo bulai dem.
Goin help um come mo akamai,
An help da young guys fo know stuff
An fo tink strait.
5 Da smart peopo dat know awready wat fo do,
Dey goin lissen up mo an moa,
An erytime dey goin undastan even mo betta.
Da peopo dat lissen good,
Dey goin find out wat dey gotta do.
6 Whoeva make lidat cuz dey read dis book,
Dey goin undastan da importan kine tings
An even da stuff dat da smart guys make hard fo figga out.
Az da kine stuff fo make you tink plenny.
7 ✡1:7: Job 28:28; Songs 111:10; Smart 9:10Fo know stuff fo real kine,
Main ting, you gotta get awesome respeck fo Da One In Charge
Fo you stay sked wen you tink bout him!
Ony da peopo dat do bad kine stuff, no bodda dem.
Dey figga az wase time, fo learn wass importan fo do
An fo stick wit wass right.
Da Faddah Tell Da Boy
Fo Find Out Wass Importan
Fo Find Out Wass Importan
8 Wen I talk to my boy, I tell um, “Eh my boy,
Lissen up all da tings I teach you.
Same ting, wen yoa muddah teach you someting,
No foget wat she tell you.
9 If you lissen, make you look good,
Jalike one nice lei on top yoa head,
Jalike one fancy kine chain fo put on yoa neck.”
10 I tell my boy, “Eh lissen up! If some pilau buggahs try make you come wit dem,
Jus go tell um, you no like.
11 No matta dey tell, ‘Try come wit us.
We goin hide an go jump whoeva stay come,
Den we kill um. Cuz no mo notting else fo do, aah?
12 No matta dey alive, we take um, brah,
Jalike da Mahke Peopo Place take da mahke peopo.
No matta dey feel good, we take um out,
Jalike dey fall down inside one big hole.
13 We goin steal all choice kine stuff dat cost plenny
An put um inside oua house.
14 Go chance um wit us, brah!
We go share share togedda, aah?’ ”
15 An I tell my boy no hang out wit dis kine peopo!
You jus tell um no way, brah!
No go wit dem an do stuff da way dey do um!
16 Cuz ery place dey go, dey ony go dea fo do bad kine stuff.
An dey go fas, cuz dey like make peopo bleed an mahke.
17 Eh! Wase time, you know, fo put one net
In front da birds, an dey watching you.
18 Dese guys, dey try jump somebody,
But dey da ones goin bleed,
Dey da ones goin mahke.
19 Dass wat happen to all da peopo dat go all out fo come rich.
Bumbye dey get plenny stuffs, but dey no mo da real kine life.
Lissen To Da Wahine Dat Know Wat Fo Do
20 ✡1:20: Smart 8:1-3Da stuff peopo get inside
Wen dey know wat fo do erytime,
Try tink bout um, jalike dass one lady,
An dis lady, she make big noise in front plenny peopo!
She go da big place wea all da peopo hang out,
An talk loud kine fo erybody hear!
21 She stan on top da main streets wit choke plenny peopo an yell to erybody,
She talk to da peopo dat hang out wit da town leadas,
Ova dea by da big gate fo da town. She tell:
22 “Eh, you guys dat donno notting an easy fo bulai!
You guys like stay lidat, o wat?!
An you buggahs dat no mo respeck fo nobody cuz you tink you real smart,
You like stay lidat?!
You stupid buggahs dat figga you no need learn notting,
How come you no like wen peopo try tell you da trut?!
23 You guys come back da right way an lissen, I goin tell you fo real kine wass wrong!
An ho! I tell you wat stay inside me,
Da kine stuff dat befo time I no can tell you.
An I goin help you fo undastan wat I tell.
24 “Cuz I wen yell plenny times awready fo you guys come,
But you neva like.
Neva mind I wen make fis fo wack you guys,
You guys neva lissen.
25 I wen tell you guys wass good fo you
An you foget awready.
I wen tell you fo real kine wass wrong,
An you guys neva like dat.
26 Az why, wen you guys get all bus up,
Me, I goin laaaugh, laugh, laugh!
Wen bad tings happen,
Da kine dat make you real sked so you no can handle,
I goin make fun a you guys!
27 Dat time, you guys goin get real sked an you no can handle, jalike you inside one hurricane,
An wen you get all bus up, goin blow you guys away jalike da hurricane wind,
An you guys goin come all stress out cuz you no can do notting,
An you goin get wipe out cuz a all da tings dat give you plenny presha.”
28 She tell:
“Dem guys, let um try yell fo me help dem,
I no goin lissen!
No matta dey try hard fo find me,
Dey no goin find me.
29 Cuz dey piss off dat get stuff dey gotta learn,
Dey not sked Da One In Charge, dey make up dea mind awready.
30 Dey no lissen da tings I tell um.
Weneva I tell um ‘Az bad, wat you wen do,’
Dey tell az ony junk wat I tell dem.
31 Stuff goin happen to dem
Cuz dey live dat way.
Eryting dey figga fo do,
Goin come back on top dem,
Da same stuff an even mo stuff.
32 Da peopo dat easy fo bulai,
Dey goin go away from me,
Az dea fault
Wen dey get all bus up an mahke from dat.
Da stupid peopo, dey ack jalike notting bad goin happen,
An cuz a dat, someting goin wipe um out.
33 But da peopo dat lissen me,
Dey goin stay good an notting goin hurt dem,
An dey no need come all sked inside an shake all ova
Cuz dey tink maybe someting bad goin happen.”
Dass wat da wahine tell dat erytime know wat fo do.