28
How Fo Know Wat Fo Do Erytime
1 “Fo shua, peopo know wea fo mine silva.
An dey know wea fo go fo take da junks outa gold.
2 Can take iron outa da dirt.
Can melt rocks fo get coppa.
3 Wen peopo take light inside da dark mines,
No stay dark no moa.
Dey look inside da mos far places down dea.
Dey look fo da right kine stones inside da mos dark places.
4 Dey open up mine tunnels far from wea da peopo live.
Inside da kine places dat peopo dat wen travel know
But foget how fo go dea.
Dey swing from ropes wen dey work,
One side to da odda side, far from erybody.
5 Food come from on top da groun,
But undaneat, gotta use fire fo change wat get.
6 Da stones undaneat da groun get blue jewel kine stones inside.
Da groun down dea get plenny small kine piece gold.
7 Da scavenja birds donno how fo go to da mines.
Da hawks no see um.
8 Da proud wild animals no go ova dea.
Even da lions no go aroun dea.
9 Peopo bus ass fo go afta da mos hard rocks.
Dey dig inside da bottom a da mountains.
10 Dey cut tunnels thru da cliffs.
Dey look hard fo see da rich kine stuff.
11 Dey put dam wea da rivas start,
Fo bring da stuff dat stay hide dea
Outside wea get light.
12 “But wea can find out how fo know wat fo do erytime?
Wea da place fo find out how fo undastan stuff?
13 Peopo donno wat az worth, fo know wat fo do erytime.
Dey no goin find all dat in dis world wea peopo live.
14 Jalike da deep ocean tell, ‘No stay inside me!’
Jalike da ocean tell, ‘Not by me!’
15 You no can pay, even wit da bestes kine gold,
Fo know wat fo do erytime.
You no can buy wit plenny silva.
16 You no can weigh enuff gold from Ofir fo buy um,
O buy um wit da kine jewel stones dat cost plenny.
17 No can line up enuff gold o glass.
No can trade fo um wit dishes da kine dey make from pure gold.
18 Coral an crystal, no even tink bout dat.
Fo know wat fo do erytime, cost you mo den red coral.
19 Da topaz from Sudan no cost mo den dat.
No can buy um wit pure gold.
20 “So, wea you goin find out how fo know wat fo do erytime?
Wea da place fo undastan plenny stuff?
21 Eryting dat stay alive, no can see da place.
Even da birds in da sky no can.
22 Inside da Deep Dark Hole
An da Mahke Peopo Place,
Da peopo ova dea ony hear litto bit
Bout how fo know wat fo do erytime.
23 God undastan wea fo go fo find um.
He da ony one dat know wea can learn
Wat fo do erytime.
24 Cuz he look at da mos far places on da earth.
He see eryting unda da whole sky.
25 Da time God tell how strong da wind stay blow,
An measure how much watta stay get,
26 Wen God make da rules bout da rain,
An da way fo da thundastorms go,
27 Az was da time he look at wat mean fo know wat fo do erytime.
He look at um, an tes um. Den he tell, ‘Dass it!’
28 ✡28:28: Songs 111:10; Smart 1:7; 9:10An he tell da peopo,
‘You know wat?! If you get choke respeck an stay sked a da Boss Up Dea,
Den you goin know wat fo do erytime!
An if you stay away from da bad kine stuff,
Dat goin show you undastan plenny!’ ”