Jehoshafat Win Ova Da Moab
An Da Ammon Armies
An Da Ammon Armies
1 Afta dat, da Moab an da Ammon guys wit some a da Meun guys come fo make war agains Jehoshafat.
2 Some guys come an tell Jehoshafat, “One big army stay come agains you from Edom, from da odda side a da Big Salt Lake. Dey stay Hazazon Tamar side awready.” (Get da name En-Gedi too.) 3 Jehoshafat come sked. He make up his mind fo go in front Da One In Charge an aks him wat goin happen. An he tell all da Judah peopo fo skip food wen dey pray. 4 Da Judah peopo come togedda fo tell Da One In Charge fo help dem. Dey come from ery town inside Judah fo tell Da One In Charge dey need help.
5 Den Jehoshafat stan up in front all da Judah an Jerusalem peopo dat come togedda by da Temple Fo Da One In Charge, da front part a da new open lanai. 6 He tell:
“You Da One In Charge, you da God fo oua ancesta guys. Fo shua you da God dat tell us wat fo do from inside da sky. You da One in charge a da kings ova all da peopos. You strong an get plenny powa fo fight. No mo nobody can stan up agains you. 7 ✡ 20:7: Isa 41:8; James 2:23You, oua God, da One wen chase out da peopos dat wen live inside dis land. Dey run away in front yoa peopo, da Israel peopo. You give da land to da peopo dat come from yoa fren Abraham, fo come dea property foeva. 8 Dey wen make house inside dis land, an dey build one spesho place hea, fo peopo know wat kine god you. Dey tell, 9 ‘If bad tings happen to us—war, o one bad kine sick, o no mo food—den us guys goin come stan in front you hea, in front dis Temple dat show wat kine god you. We goin yell to you wen we get hard time, an you goin lissen an get us outa trouble.’
10 ✡ 20:10: Rules2 2:4-19“But now, get guys from Ammon, Moab, an da Seir Range. Da time us guys come outa Egypt, you no let us Israel peopo go inside dea land. So oua peopo go aroun dem, an no wipe out dose guys. 11 Now, look how dey pay back us guys, bad fo good! Dey stay come fo chase us guys outa yoa land dat you wen give us fo come oua property. 12 You oua God, so try punish dem! Cuz us no mo powa fo go agains dis big army dat stay come fo attack us guys. Us guys, we donno wat we gotta do, but we trus you fo help us!”
13 All da guys inside Judah, wit dea bebes an wifes an odda kids, dey stay stan dea in front Da One In Charge.
14 Den da Spirit from Da One In Charge take ova one guy dat stay stan dea in da middo a all da peopo. His name Jahaziel, Zekariah boy (his ancesta guys Benaiah, Jeiel, an Mattaniah). He one Levi guy dat come from Asaf.
15 ✡ 20:15: Rules2 20:1-4He tell, “King Jehoshafat, an erybody dat live inside Judah an Jerusalem, lissen up! Dis da message from Da One In Charge fo you guys: ‘No come sked o bum out, cuz a dis big army. Cuz da war not fo you guys fo fight, but fo God fo fight. 16 Tomorra, march down agains dem. Dey goin stay climb up da Ziz Pass, an you goin find dem by da mauka end a da gulch wea can see da Jeruel Boonies. 17 ✡ 20:17: Outa 14:13-14But az not yoa kuleana, fight dis war! Line up, stan strong, an watch how Da One In Charge goin get you guys outa trouble. You Judah an Jerusalem guys, no sked, an no lose fight! Go out fo face dem tomorra, cuz Da One In Charge goin stay wit you guys.’ ”
18 Jehoshafat go down an put his face on top da groun, an all da Judah an Jerusalem peopo go down too fo show love an respeck in front Da One In Charge. 19 Den some Levi guys from da Kohat an Korah ohanas stan up fo tell wit one strong voice dat Da One In Charge, da God fo da Israel peopo, he da greates.
20 Early morning time dey go from Jerusalem to da Tekoa Boonies. Wen dey all ready fo go, Jehoshafat stan up an tell, “You Judah an Jerusalem guys, lissen me! Trus yoa God, Da One In Charge, an he goin make you stay solid! Trus da guys dat talk fo him, an you guys goin come out okay!” 21 Afta Jehoshafat tell da peopo wat fo do, he put singa guys fo go in front da guys dat stay ready fo make war. Da singa guys sing fo Da One In Charge. Dey tell good tings bout him cuz he good an spesho, an az why he awesome. Dey sing lidis:
“Tell Da One In Charge ‘Mahalo!’
Cuz he stay tight wit his peopo foeva!”
22 Same time da singa guys start fo sing loud an tell good tings bout Da One In Charge, get odda guys dat stay hide nea da odda army. Was Da One In Charge put um ova dea. Dey go jump da guys from Ammon, Moab, an da Seir Range dat stay come fo fight da Judah peopo. Da guys dat stay hide jam up da odda guys lidis: 23 Firs ting, da Ammon an Moab guys attack da Mount Seir guys an wipe um all out. Afta dey pau kill all da Mount Seir guys, den all da Ammon an Moab guys help fo wipe out each odda.
24 Wen da Judah guys come da towa wea can look ova da boonies, dey turn an look fo da big army. An you know wat dey see?! Ony get mahke bodies laying all ova groun! No mo nobody from dose odda guys wen get out alive. 25 Az why Jehoshafat an his army guys go fo rip off da mahke guys stuffs, an dey find plenny tings ova dea dat dey use fo fight, an clotheses, an tings dat cost plenny. Get plenny mo stuffs fo carry away den dey can handle. Take dem three days fo pick up all da stuffs. 26 Day numba four, da Judah guys all come togedda inside da Valley Wea God Make Good Tings Happen, cuz dass da place wea dey tell good kine stuff bout Da One In Charge. Az why still yet today, dey call um da Valley Wea God Make Good Tings Happen.
27 Den Jehoshafat lead all da Judah an Jerusalem guys back Jerusalem side. Da One In Charge make dem stay real good inside, cuz da guys dat hate dem wen come wipe out. 28 Dey go inside Jerusalem, wit bass harps, small harps, an metal trumpets, an go da Temple Fo Da One In Charge.
29 Den all da kings an da peopos inside da odda countries come sked a God, cuz dey hear how Da One In Charge wen fight da guys dat stay agains da Israel peopo. 30 So da peopo dat get Jehoshafat fo dea king no need fight no moa, cuz his God make him no need worry bout da trouble all aroun.
Jehoshafat Pau Stay Da King
(1 Kings 22:41-50)
31 Jehoshafat was thirty-five year ol wen he come da Judah king. He stay king inside Jerusalem fo twenny-five year. His muddah Azubah, Shilhi girl. 32 He make jalike his faddah Asa, an no go away from um. He do wat stay right, da way Da One In Charge see um. 33 Ony one ting—da sacrifice places fo da idol kine gods on top da hills, stay still yet, an da peopo still no go all out fo da God fo dea ancesta guys.
34 Da odda stuff Jehoshafat wen do, from da start to da end, Jehu, Hanani boy, wen write all dat inside da Book Bout Wat Da Israel Kings Wen Do.
35 Laytas, Jehoshafat, da Judah king, make one deal wit Ahaziah, da Israel king. Wen Jehoshafat do dat, wat he do was wrong. 36 Jehoshafat go togedda wit Ahaziah fo build plenny big boat, da same kine peopo use fo go trade Spain side. But dis ones, dey build um by da Red Sea, Ezion-Geber side. 37 Eliezer, Dodavahu boy from Mareshah, he talk fo God, an tell dat someting bad goin happen fo Jehoshafat. He tell um: “Cuz you wen make one deal wit Ahaziah, Da One In Charge goin bus up da boats you wen make.” Den da boats broke, an no can use um fo trade.