Sephaniah
Hay mipanggep hi liblu an Sephaniah
Hi Sephaniah ya profetas Apu Dios handih numpatulan Josiah ad Judah. Kediyen tiempo ya kadangyan nadan tatagud Judah. Man-u te inun-unud dah APU DIOS (2 Patul 22-23) mu nakatang ya abu, te ugge nabayag ya inwalong da ot nadan adi makulug an dios ot ya abuy inun-unud da. Ot ipainilan APU DIOS an kastiguwona didan tatagud Judah ya Jerusalem gapuh liwat da, mu adida pinhod an muntutuyu. (Kinali handih 586 B.C. ya dinadag di iBabilon di Jerusalem.)
Man-ut impainilan APU DIOS an dadagonay iJerusalem mu insapatana bon didan hi udum hi algo ya ihwang na nadan niwahit an tatagunah udum hi boble ya ibangngad na didad Israel ta bendisyonana dida.
Hay nitudok ketuwen liblu:
1. Ahi kastiguwon APU DIOS nadan tatagud Judah gapuh liwat da. (1:1—2:3)
2. Ahi kastiguwon APU DIOS damdamay udum an boble. (2:4—3:8)
3. Hinammad APU DIOS an kinalin ahina amungon nadan Judyun niwahit hi udum an boblet ibangngad na didat mumboble da bod Israel ya Judah an boble da tuwali. (3:9-20)
1
1 Hi Sephaniah an profetas ya imbabalen Kushi an imbabalen Gedaliah an imbabalen Amariah an imbabalen Hesekiah. Kinalin APU DIOS ke hiyah tuwe handih numpatulan Josiah an imbabalen Amon ad Judah.
Hay kinalin APU DIOS an atonah iJudah
2 “Ha-oy an DIOS ya dadagok am-in di wada tuh luta. 3 Dadagok di tatagu, aaggayam, hahamuti ya dodolog. Ta madadag am-in nadan gaga-ihon tatagu ta maid di matdaan takon di oha. Ha-oy an DIOS di nangalin tuwe.
4 Kastiguwok am-in di iJudah ya iJerusalem. Ya ma-idok am-in di nganneh diyen panginomnoman dan Baal takon nadan papadin mun-appit ke hiya ta maid di ahi munnomnom ke dida. 5 Dadagok damdama nadan tatagun mundayaw hi algo ya bulan nah atop di bale da, nadan mundayaw ya munsapatah ngadan ku yaden deke on nunsapata da bo nah dios an hi Molek, 6 nadan nangiwalong ke ha-on ya nadan adi mumpabaddang ke ha-on ta itugun kun diday maphod an aton da.”
7 Dumin-ong kayun tataguh hinangngab APU DIOS an Kabaelanan am-in te dandanin madatngan di algon punhumalyaanan am-in hi tagu. Ta kastiguwona nadan tatagunan ipaboltanah buhul dan mamaten dida.
8 Kanan APU DIOS di “Kediye ya kastiguwok nadan opisyal, nadan linalakin imbabalen di patul ya am-in di mangat hi at-atton nadan adi mangulug ke ha-on. 9 Ya kastiguwok am-in nadan mangun-unud hi pangi-en nadan adi mangulug ke ha-on, nadan mangako ya pumate ta pulhon day limmun di ibba dan tagut ie dah balen di ap-apu dat mad-uman pay di kinadangyana.
10 Ha-oy an APU DIOS ya isapatak an waday ahi madngol an mungkoga nah Hoob di Pundologan ya nah ka-bohwat an Jerusalem. Ya waday ahi madngol an kay gangon nan mungkagden bilid. 11 Dakayun numboble nah da-ul di ongal an boble, kumga kayu te ahi maten am-in di mumpunggattang.
12 Paddungnay itabin kuy dilag ta hinapok am-in di Jerusalem, ta ek hamakon nadan makallinggop an tatagun abunay umubuubun dan kanan dah adol day ‘Maid di maat APU DIOS, maphod weno ad-adin ditaku.’ Muden diday kastiguwok. 13 Ahi mama-id di kinadangyan da ya madadag di babale da. Ta adida mo mihaad hi babale da ya adida mo inumon di mainum an kapyaon dah grapes an intanom da.”
14 Gagala mon madatngan nan algon gintud APU DIOS hi panadaganan dakayu. Himpappangeh diyen maat, ta hidiye nan takon nadan katultulidan an tindalu ya mama-id di namnama da. 15 Kediye ya namahig di ligat gapuh boh-ol APU DIOS ta mabulubulun di tatagu ya madismaya dan paddungnay mungkukulabut ya munhihilong hidiyen algo. 16 Kediye bon algo ya madngol di tangguyub an kipainilaan di gubat. Ya madngol di tukuk di titindalun manggop nadah nahamad an boblen naaladan ya nadah pungguwalyaan nah boble.
17 Kanan APU DIOS di “Ipaalik di punligatan am-in di tatagut kay da nakulap an uggeda inilay pangayan da. Man-uke ya nunliwat dan ha-on. Ta ahi miduyag di dala dan kay danum ya mipamgah wahit nadan mungkabuluk an adol dah luta.”
18 Kediyen algon pangipatib-an APU DIOS nah kay apuy an boh-ol na ya madadag am-in di lutat maid maptok ya napoppog di biyag am-in di matagun wadah di. Takon nadan kakadangyan ya adida mihwang te adi kabaelan di balituk da ya silber dan mangihwang ke dida.