1 A kum wakak na paspasang, dat sa rakon pas a kum liliman ri, ra i wakak sur dat in utalapor pas dat gusun a kum utna rop ra i udur a pinindat ma a niondat. Ma dat in talapor rop, uni dat urur doko torom o God.

2 Mot in nem met nama balamot. Ka met pam tar tu sakino torom taio, ka met ben raro tar taio, ma ka met toro pas tu utna tan taio. 3 Ka watung a wasiso ri sur an takun mot uni, awu. Numugu a sa inanos tar mot lena, met nem doko mot. Mot sa kis una nuknuki met, sur dat in laun tomo ma dat in mat tomo. 4 A nurnur un mot. Ma a warango doko mot. Anumot a nilaun i uragot iau. Anung a gasgas i bukus una numet a kum mamaut.

5  2 Kor 2:13Ra met wanpat tong una papor Masedonia, ka met mana lar pas. Met barato a susut na mamaut sakit una kum papori met. Met barato a wasiso na kankan anun a taro torom met, ma nin ubalamet met taramo a nginara. 6 Ikut, o God ra i ser umarom a taro ra det tupunuk, i umarom met nama inawan pat anun o Taitus torom met. 7 Ma awu sur a inawan pat kut anun o Taitus ra i umarom met, met gas kai ra met longoro i lena, mot udekdeki. I inanos met lena, mot nem doko i sur mot in tama iau, ma mot tupunuk, ma mot nuknuk doko sur iau. A wasiso ri, i ugasgas doko iau.

8  2 Kor 2:4Anung ara pas munung i sa utupunuk tar mot. Ikut, ka tupunuk uni. Numugu a tupunuk uni, ikut uniri, a tasmani lena, anumot a tupunuk uni ke suano i. 9 Uniri a gas, awu sur i kibino ra mot tupunuk, awu. A gas uni anumot a tupunuk i ben pas mot sur mot in nukpukus. Anumot a tupunuk i elar nama nemnem anun o God, uni i ben pas mot sur mot in nukpukus. I mo ra ka met ban laulau mot. 10  Mt 27:3-5; Ibr 12:16-17A tupunuk ra o God i nemi, i utupunuk a taro sur det in nukpukus. Ra det in nukpukus, o God in ulaun det. Dat in gas una ngas na tupunuk ra. Ikut a tupunuk tagun a rakrakon bual, i pam pati kut a minat.

11 Tama i, a tupunuk ri tan o God i pam pat a susut na wakak na utna un mot: A labino nemnem i kis unin balamot sur mot in langolango gusun a sakino. Ma mot nem doko i sur mot in ukodos pas mot sur gong tu etakun in los mot. Mot kankan torom o naro ra i pam a sakino, ma mot ngara. Mot nem doko i sur dat in emarom melet, mot dekdek pas mot, ma mot nemi sur mot in ukodos a utna ra i raro. A lingmulus, anumot a petutna i ese i lena, mot tokodos una utna ri. 12 Numugu a tumtumus torom mot, awu sur i kibino una musano ra di pam a sakino toromi, ma awu sur i kibino kai una musano ra i pam a sakino, awu. A tumtumus sur mot in tama lele pas anumot a tuntunur tomo nam met umatan o God. 13 Ra una kum utna ri mot uragot met.

Mot uragot met, ma met gas doko kai ra met tama i lena, o Taitus i gas, uni mot waruti sur a nuknukino in mana. 14 Ra ke wan utmakai, a warango mot toromi, ma ka mot ban umaimai iau. A kum utna ra met watungi tan o Taitus un mot i lingmulus, elar nam anumet a kum wasiso rop torom mot i lingmulus. 15 O Taitus i gas doko un mot, ra i nuk pasi ra mot rop mot mur anun a wasiso ma mot gas pasi nama nginara. 16 A gas doko, uni a nurnur mulus un mot.