6
1 Met papam tomo nam o God, ra met saring mot, sur gong mot ukio orosi kut a marmaris anun o God torom mot. 2 Uni o God i watungi lena,
“Ra a du bung i sa sot, a longoro ui,
Ma una bung ra a ulaun pas ui, a warut ui.” Ais 49:8
Tama i, uniri, a du bung i sa sot, uniutri a bung ra o God i ulaun pas mot.
A kum aposel det taramo a susut na mamaut
3 Ka met ser pam tu petutna sur a taro det in watung laulau anumet a pinapam, ma ka det in nurnur. 4 Una numet a kum pinapam rop i ese i lena, met a kum tultul anun o God. Met tur dekdek ra met taramo a kum mamaut ma a kum ngunungut ma a kum ukadik. 5 2 Kor 11:23-27Di um met, ma di uruk met una karabus ma di ukatutur a inaim torom met. Met papam dekdek, ka met inep una kum bung na mirum, ma met taramo a munurak. 6 1 Tim 4:12Anumet a petutna katu dur uni, ma met papam nama mananos. A pinimet ke ser ngoro una taro, met pami kut a wakak na petutna torom det. Met papam nama warut anun a Tokodos na Nion, ma a marmaris mulus. 7 Met watung a lingmulus, ma met papam nama dekdekin o God. Met pam ukai a tokodos na petutna, elar nam anumet a utna na inaim una sot na lamamet ma una kair kai.
8 Ara taro det ru met, ma ara taro awu. Ara taro det watung laulau met, ma ara taro det watung ulabo pas met. Ara taro det nuki lena, met a kum tene torotoro, ikut met watung a lingmulusino. 9 2 Kor 4:10Ara taro det ipul lena kalako risamet, ikut a risamet i labo ut. Det nuki lena, met sa mat, ikut met laun utmakai. Di um met, ikut ka di um doko ru met. 10 Met tupunuk, ikut met ser gas una kum bung rop. Met sibo, ikut met warut a susut na taro sur anundet a susut na utna. Kalako utna anumet, ikut a kum utna rop anumet.
11 Ai, mot a taro Korin, met wasiso talapor mulus torom mot, ma a balamet i bukus nama marmaris torom mot. 12 Ka met turbat anumet a marmaris torom mot, ikut mot, mot turbat anumot a marmaris torom met. 13 1 Kor 4:14A wasiso torom mot ri, elar kut nami ra a wasiso torom a kum nutnutung: Mot in pami lenra torom met lenkutkai ra met pami torom mot. Mot in nem met nama balamot rop.
A tene nurnur gong i tur tomo nam det ra ka det nurnur
14 Ep 5:11Gong mot tur tomo nam det ra ka det nurnur, uni a tokodos na petutna der pasano pepetlai nama sakino petutna? A talapor der in kis tomo pepetlai nama dumirum? 15 O Karisito ma o Satan der in emarom pepetlai? A tene nurnur, der in pasano pepetlai nam taio ra ke nurnur? 16 1 Kor 3:16A kum torotoro na god ka det in tur lar pas una rumu na etabor anun o God. Uni dat ut a rumu na etabor anun o God ra i laun. I elar nami ra o God i sa watung tari,
“An kis tomo nam det,
ma an nan epotor tandet.
Ma iau a God anundet,
ma det anung a taro.” Wkp 26:12
17 Tam 18:4Ma a Labino i watungi kai lena,
“Mot in pirso gusun det, ma mot in kis gisen gusun det.
Ma gong mot patop una kum dur na petutna,
ra iau an gas pas mot.” Ais 52:11
18 Jer 31:9A Labino ra i dekdek sakit, i watungi lena,
“An nanpat a Tamamot,
ma mot a kum nutnutung, a kum musano ma a kum ino.” 2 Sml 7:14