18
O Babilon i sa puku
1 Numur tan a kum utna ri, a tama ara ensel bulung i wan pirso tagisapat una langit. I pam ukai a dekdek na warkurai, ma anun a minamar i utalapor a rakrakon bual. 2 Tam 14:8; Ais 13:21; 34:11-14; Jer 50:39Ma i woiwoi namin labino walngano lena,
“A labino tamon Babilon i sa puku! I sa puku!
Uniri i sa wanpat a nubual anun a kum laulau na nion
ma a nubual na parparau anun a kum laulau na nion
ma a nubual na parparau anun a kum piko ra det dur,
ma a nubual na parparau anun a kum wewegua ra det dur ma det milmiluon.
3 I sa puku, uni a taro tagun a kum gapman rop det sa inum pas a dekdek na wain ina nun a pamuk na petutna.
A kum king tagun a rakrakon bual det pam a pamuk na petutna tomo nami.
Ma a kum tene siuru tagun a rakrakon bual det tene ululeng nama susut na ululeng
tagun anun a kinkinis na tene ululeng.”
4 Ais 48:20; Jer 50:8; 51:6, 45; 2 Kor 6:17A longoro in nalngan ara bulung tagisapat una langit i watungi lenri,
“Anung a taro, mot in pirso gusuni,
sur gong mot lason tomo nami una nun a kum sakino petutna,
ma sur gong kai mot taramo a kum ukadik tomo nami.
5 Stat 18:20-21; Jer 51:9Uni anun a kum sakino petutna i palataun tuk sapat una langit,
ma o God i sa nuk ukai anun a kum sakino petutna.
6 Sng 137:8; Jer 50:15, 29; 2 Tes 1:6A petutna ra i pam tari un mot, mot in balu meleti toromi,
anun a kum pinapam ra i pam tari un mot, mot in balu i elar ut nam aru dino toromi.
A kap ra i pitari torom mot sur mot in inum uni,
mot in ubukusi aru dino sur mot in pitari toromi sur in inum melet uni.
7 Ais 47:7-9Mot in pitar a labino ngunungut ma a labino tupunuk tano,
ra in labo elar nama a ngas na petutna ra i ser ulabo pasi ut, ma i ser ugasgasi una kinkinis na tene ululeng,
I nuki uni lena,
‘Iau a kwin, ma a kis una nung a kiskis na kwin.
Awu sur iau a ula,
kan tupunuk lar pas.’
8 Tam 17:16I mo ra a kum ukadik ri, a minat, a tupunuk ma a munurak
det in nanpat toromi un ara bung sot kut.
Ma din tun ru i nama sungun,
uni a Labino o God i dekdek sakit,
i ra, in pitar tar a warkurai na minabalu toromi.
9 Ese 26:17; 27:30-35“A kum king tagun a rakrakon bual, ra det pam a pamuk na petutna tomo nama ino ra, ma det rarakon tomo una nun a kum ululeng tagun anun a kinkinis na tene ululeng, ra det in tama in nimis tagun a sungun ra di tun a ino ra uni, det in tupunuk ma det in domos. 10 Det in tur bakbak taru mukut gusuni, uni det ngaran a ngunungut ra din ukadiki nami. Ma det in watungi lena,
‘A labino tamon i sa laulau. I sa laulau!
O Babilon, a dekdek na tamon!
Una wonom na noino minit sot kut, ama warkurai na minabalu i sa wanpat.’
11 Ese 27:36“A kum tene siuru tagun a rakrakon bual det in domos ma det in tupunuk suri, uni kataio mo in kul anundet a kum utna na siuru. 12 Ese 27:12, 13, 22A utna na siuru lenri: a gol, a silwa, a kum watat ra matandet i ka doko, ma a kum wakak na kamkabaran, ma a kum wakak na malu, a kum pepol na malu, a kum malu i silika ma a kum merek na malu, ma a kum duwai ra i sangnain wakak, ma a wur ngas na utna ra di pami nama komin a elepan, ma a kum duwai ra matandet i ka doko, ma a bras, a aen ma ara ngas na wat ra matano i ka doko, ra di watungi nama mabel, 13 ma a ramano kum utna i sangnain wakak, ma aru utna kai ra der sangnain wakak ra di watung der nama kinamon, ma a mira, ma a paura di tuni ra a misino i sangnain wakak ra di watungi nama insens, ma a wain, a wel na oliw, a palawa ma a wit, ma a kum bulumakau ma a kum sipsip, a kum os ma a kum karis, ma a kum tene ititula, det a kum mulusino ut.
14 “A kum tene siuru det in watungi lena, ‘A kum utna ra u nem doko i, det sa rorom. Anum a kum ululeng ma anum a kum minamar det kai det sa rorom, ma ka din tama det melet mo.’ 15 Ese 27:31, 36A kum tene siuru ra det ser siuru a kum utna ri, ma o Babilon i udan tar det nama susut na ululeng, det in tur bakbak taru mukut gusuni, uni det ngaran a ngunungut ra di ukadiki nami. Det in tupunuk, det in domos, 16 Tam 17:4ma det in woiwoi lena,
‘A labino tamon o Babilon i sa laulau! I sa laulau!
I ra i emar nama kum wakak na malu ra i pepol ma i merek,
ma di mari nama gol, ma a kum watat ra matandet i ka doko, ma a kum wakak na kamkabaran.
17 Ais 23:14; Ese 27:27-29Una wonom na noino minit kut di sa ban laulau rop ru anum a susut na ululeng doko!’
“Ma a kum kiapten rop ma det ra det wan tuptupukus nama sip, a kum tene pinapam tagun a kum sip, ma det ra det los a mani tagun anundet a pinapam una kum sip, det in tur bakbak taru mukut gusuni. 18 Ese 27:32Ra det in tama in nimisin o Babilon det in woiwoi lena, ‘Osi na tamon i elar nama wakak na tamon ri?’ 19 Det in sapro a kubus una kum lorindet ma det in tupunuk, det in tangis ma det in woiwoi lena,
‘A labino tamon Babilon i sa laulau! I sa laulau!
Det ra det los a mani tagun a kum sip,
det wanpat a kum tene ululeng tagun anun a susut na ululeng!
A wonom na noino minit sot kut ra i sa laulau rop!
20 Ais 44:23; Lo 32:43; Jer 51:48Mot sapat una langit, mot in gas uni!
A taro anun o God ma a kum aposel ma a kum poropet, mot in gas!
O God i sa pitar tar a warkurai na minabalu toromi una kum petutna ra i pam tari un mot.’ ”
21 Jer 51:63-64; Ese 26:21Ma ara dekdek na ensel i los pas a labino wat, i labo elar nama wat na gino wit, ma i woro losop ru i ra i padung sa utasi ra i watungi lena,
“Din woro tustusano ru a labino tamon Babilon elar nama wat ri,
ma ka din tama meleti mo.
22 Ais 24:8; Ese 26:13In nalngan a kum tene pam kelekele ma a kum tene wup kaur ma a kum tene wup tuwuru ma a tinangis ina kum gita,
katutaio melet mo in longoro tari nisam.
Katu tene pinapam na lamandi melet mo in kis nisam.
Ma katutaio melet mo in longoro tar a tinangis ina wat na gino wit nisam.
23 Jer 7:34; 16:9; 25:10Katu talapor na lam melet mo
in lalom pat nisam.
Katutaio melet mo in longoro tar
in nalngan tu matok na nolin nisam, a barman ma a toraro.
Numugu anum a kum tene siuru det a kum lamlabino tene ululeng una rakrakon bual.
U ben raro pas a taro tagun a kum gapman rop nam anum a miliro.
24 Jer 51:49; Tam 17:6A gapin a kum poropet ma a kum taro anun o God,
ma det rop kai ra di um doko det una rakrakon bual,
di tama barato a gapindet tong o Babilon.”
18:2: Tam 14:8; Ais 13:21; 34:11-14; Jer 50:39
18:4: Ais 48:20; Jer 50:8; 51:6, 45; 2 Kor 6:17
18:5: Stat 18:20-21; Jer 51:9
18:6: Sng 137:8; Jer 50:15, 29; 2 Tes 1:6
18:7: Ais 47:7-9
18:9: Ese 26:17; 27:30-35
18:11: Ese 27:36
18:12: Ese 27:12, 13, 22
18:15: Ese 27:31, 36
18:17: Ais 23:14; Ese 27:27-29
18:18: Ese 27:32
18:20: Ais 44:23; Lo 32:43; Jer 51:48
18:21: Jer 51:63-64; Ese 26:21
18:22: Ais 24:8; Ese 26:13
18:23: Jer 7:34; 16:9; 25:10