1 6:1 Kolosi 3:20Kakakla, mulo anuna Leklek, mulor longor tana tamtamamulo pa na kabatnamulo, anasa i tostos sur mulor toli larne. 2 A Buk Tabu i atongi mange, “Ur hanrawai e tamam pa e tnam.” Ine a ningnigo na warkurai ning a lele i kes taum onoi. 3 I atongi mang, “Ning ur toli larne, ir wakak tetek u pa ur laun bongnan u te na rakrakan hanua.” Lo 5:16

4 6:4 Kolosi 3:21; Buk Song 78:4; Gutpela Sindaun 22:6Pa mulo na tamtamana a kakakla, gong mulo angangas la, ika ning mulor tai alar la, mulor alasan la, pa mulor asaer la ana ngas ning a Leklek ir gas ono.

5 6:5 Kolosi 3:22-23; Taitus 2:9-10; 1 Pita 2:18Ning u a tena titol oros, ur longor tetek anum a ningnigo mite na rakrakan hanua, pa ur matmataut pa ur hanrawai i. Ur longor ana momolna ting na balam, larning u longor tetek e Karisito. 6 Gong u muri ka anuna warwara ning i oroi u, sur ur agasgas tari ka. Ur titol larning u a tena titol oros ane Karisito, pa ur tol a titol ning e God i mang suri, pa ur saran momol tar anum a lalaun ana titol. 7 Ur titol taum ana gasgas tetek anum a ningnigo, larning u titol ot tetek a Leklek, pa bel tetek a tarai. 8 6:8 2 Korin 5:10; Kolosi 3:24-25Anasa mulo ka tasmani mang a Leklek ir saran a arlou tana tarai rop ana wakak a titolla ning la toli, la ning na tena titol oros pa la otleng ning bel na tena titol oros.

9 6:9 Kolosi 4:1; Rom 2:11Pa mulo na ningnigola, mulor toli mangotleng larning tetek anumulo na tena titol oros. Gong mulo amatmataut la, anasa mulo ka tasmani mang, takai ka a Leklek kanisaot na langit, anunla pa anumulo otleng. Pa bel i purpurngis.

10 Anuk a ararop a warwara i mange: Mulor tur rakrakai ona tnan rakrakai ana Leklek. 11 6:11 Rom 13:12; 2 Korin 10:4Mulor mermer rop taum ana mermer na harum anun e God, sur mulor sairas a larlarla ane Satan. 12 6:12 1 Pita 5:8-9Anasa bel dala harum taum ana tarai, dala harum taum ana ningnigola anuna laulau a ingunla, a ingunla ning la tong akes a rakrakai sur lar warkurai, a ingunla ning la tong akes a rakrakai ana mormorom te na rakrakan hanua, pa a laulau a ingunla miting na solsol.

13 I maining mulor mermer taum ana mermer na harum ane God, sur ning a laulau a pukakiar ir hanot, mulor tolsot sur mulor tur rakrakai. Pa ning mulo ka sang tar mulo larning, mulor tur rakrakai ot. 14 6:14 Aisaia 11:5; 59:17; 1 Tesalonika 5:8Mulor tur rakrakai, mulor dot akes mulo ana momolna, arlar ana let. Pa mulor alar mulo ana tostos a toltol, arlar ana puka aen ning a tena harum i sira alar a malwasna ono. 15 6:15 Rom 10:15Mulor sang sur a tinan ana Wakak a Warwara na balmolmol, larning a tena harum i sira akas naur a su ting na naur a hana. 16 Pa lamur, mulor tong akes a tortorot, arlar ana palang ning a tena harum i sira suah alari ono, sur mulor alar a irnga na turai ane Satan. 17 6:17 Hibru 4:12Pa mulor nuk pasi mang e God ka alaun pas mulo, arlar ana tena harum i suah a kukuh na harum. Pa mulor los pas a liwan a harum ana Talngan Tabu, i a warwara ane God. 18 6:18 Luk 18:1; Kolosi 4:2; 1 Tesalonika 5:17Mulor araring taum ana rakrakai ana Talngan Tabu ana pukakiarla rop, taum ana urmatana niaring rop. Mulor kes na sang, pa mulor sira araring bolbolos sur a taraila rop ane God.

19 6:19 Kolosi 4:3-4; 2 Tesalonika 3:1Mulor araring otleng hok, sur e God ir saran tar a warwarala tak sur ar atongi, pa gong a matmataut ning ar apuasa a ututnala ning nating la mumun pa onone la hanot talapor ting na Wakak a Warwara. 20 6:20 2 Korin 5:20; Pilimon 1:9E God ka suah tar iau sur ar tena warawai ana Wakak a Warwara, pa ana titol ne a kes na karabus. Mulor araring hok sur ar warawai, pa bel ar matmataut, larning i wakak sur ar toli.

21 6:21 Aposel 20:4; Kolosi 4:7-8; 2 Timoti 4:12E Tikikus, a wakak a tasindala pa momol a tena titol anuna Leklek, ir atai mulo ana ututnala rop, sur mulor tasmani mang kane a laun mangmangasa pa asaning a sira toli. 22 I maining a sune i tetek mulo, sur mulor tasmani mang mila kes mangmangasa, pa ir wunan mulo.

23 A balmolmol tetek mulo na tastasikla, pa marmaris taum ana tortorot ta e God, a Tamandala pa Leklek e Iesu Karisito. 24 A marmaris ir kes tetek la rop ning la mang sur anundala Leklek e Iesu Karisito taum ana marmaris ning bel ir rarop.