1 Ning a barsan tagun a Parisaiola, a risana e Nikadimos, a ningnigo anuna tarai Juda. 2 I han tetek e Iesu ana ning a morom pa i atai i mange, “Tena asasaer, mila tasman u mang u a tena asaer ning e God i sune u. Bel ta barsan ir tolsot pas a akinalangla ning u sira toli, ning e God bel ir kes taum onoi.” 3 E Iesu i kelesi mange, “A atong momoli tam, ning tik bel di agon tona pasi, bel ir tol sot sur ir oroi a matanitu ane God.” 4 E Nikadimos i dekeni mange, “Dir agon tona mangmangasa pas tik ning ka bun? Mangmangasa, ir kas ulak ana balana e tana sur ir agon ulaki?”

5 E Iesu i kelesi mange, “A atong momoli tam, esining bel di agon tona pasi ana malum pa ana Talngan Tabu, bel ir tol sot sur ir kas ting na matanitu ane God. 6 Esining di agoni ana palaona, ir laun ana palaona ka, pa esining di agoni ana Talngan Tabu, ir laun ana inguna. 7 Gong u kulkulan ning a atai u mang dir agon tona pas mulo. 8 A wuwu i han taltal ana nuna nemnem, u longor a malwasna, ika bel u tasmani mang i han mitaha, pa ir han utaha. Mang otleng larning tetek la rop ning a Talngan Tabu i agon tona la.”

9 E Nikadimos i dekeni mange, “A utna ne, dir tol mangmangasa i?” 10 E Iesu i kelesi mange, “U a tena asaer anuna tarai Israel. Mangmangasa ning bel u tasman a ututnala ne? 11 A atong momoli tam, mila warwara ana sa ning mila tasmani, pa mila warwara talapor ana sa ning mila ka oroi tari, ika bel mulo tortorot ana numila na warwara talapor. 12 A atai mulo ana ututnala mite lapiu pa bel mulo tortorot onoi. Mulor tortorot mangmangasa ning ar atai mulo ana ututnala misaot ana langit? 13 Bel tik i han pas usaot ana langit, a Nat a Barsan sot ka ning i han purum misaot na langit. 14 Nating e Moses i akulam a soi ana rakai ting na hanua bel. Mang otleng larning dir akulam a Nat a Barsan usaot, 15 sur la rop ning la tortorot onoi lar laun tikin.

16 “E God i maris a rakrakan hanua, pa i saran tar e Natnalik takai sot ka, sur esining ir tortorot onoi, ir laun tikin, pa bel ir hirua. 17 E God bel i sune e Natnalik ute ana rakrakan hanua sur ir warkurai a ginina taraila sur lar mat. I sune i sur ir alaun la. 18 Esining i tortorot onoi, bel dir warkurai i sur ir mat. Ika, esining bel i tortorot, di ka warkurai tari sur ir mat, anasa bel i tortorot o e Nat e God takai sot ka. 19 Ine a kamkama warkurai ning e God i sarani: A talapor ka hanot ana rakrakan hanua, ika a tarai la mang ka sur a mormorom pa a talapor bel, anasa anunla toltol i laulau kol. 20 La rop ning la sira tol a toltol laulaula, la nget ka a talapor, pa bel la han tetek a talapor, sakana dir oroi puasa pas anunla na toltol laulaula. 21 Ika, esining i sira mur a momolna, i hanot ana talapor, sur dir oroi puasa i mang anuna titolla i kamkamna ot ta e God.”

22 Lamur, e Iesu taum ana anuna kakak a asaer la han misaot e Jerusalem sur ning a natar a hanua kaning ot ana papar Judia, pa la kes pas tingia, pa i baptais a taraila. 23 Pa e Jon otleng i baptais tumo e Ainon milau e Salim, anasa a galis a malumla tingia. A tarai la hanot amon teteki sur ir baptais la. 24 A titol ne i hanot ning belot di akas e Jon ana rumai a dodot.

25 Dingla na kakak a asaerla ane Jon la arlak na warwara taum ana ning a te Juda ona munmun ning a tarai Juda la sira toli sur lar toh ana matana e God. 26 La han tetek e Jon pa la atai i mange, “Tena Asaer, a barsan ning mu kes taum pas tumo na ris a malum Jodan, pa u warwara talapor tar ono, kanumo ma i baptais, pa a taraila rop la han teteki.”

27 E Jon i atai la mange, “Ning e God saot na langit bel i saran tar ta utna tetek tik, bel ir kibasi. 28 Mulo ot mulo ka longor tari ning a atongi manglarne, ‘Iau bel e Karisito. E God i sune iau sur ar nigo tana, pa i ir mur.’ 29 A barsan ning i taulai ta hane, anunai ot a hane ning. A halin a barsan ning, ir harnanai pa ir longlongor suri. Ning ir longor a elngena barsan ning i taulai, ir gas kol. Onone anuka gasgas i arlar ana gasgas anuna halin a barsan ning i taulai, pa anuka gasgas i bot sot. 30 I ot ir leklek amon pa iau ar natarna amon.

31 “Esining i han misaot na langit, i leklek kol tana taraila rop. A barsan ning mite lapiu, mitet lapiu, pa i warwara ka ana ututnala mite lapiu. Esining i han misaot na langit, i leklek kol tana taraila rop. 32 Pa i warwara talapor ana sa ning i oroi i pa i longori, ika bel tik i tortorot ana nuna warwara talapor. 33 Ika esining i tortorot ana nuna warwara talapor, i amomoli mang e God a momolna. 34 Esaning e God i sune i, i warwara ana warwara ane God, anasa e God i saran arop tar a Talngan Tabu teteki. 35 E Tamana i mang kol sur e Natnalik, pa i saran arop tar a ututnala uting nakuna. 36 Esining i tortorot ona Nat e God i kibas a lalaun tikin. Ika esining i pilak sen e Natnalik, bel ir kibas a lalaun, anasa a balanakut ane God ka kes tar onoi.”