18
God te durakea na komu sule Babylon
1 Imurina soko raini, inau tu righia ghua a sakai na angel te horu mai kokou. Gaia te loghoa na maana te sule, ma nina rongoragha te maramahia na maramana udolu. 2 Agaia te ghaeghahe nia na manga te sule,
“Babylon te durake;
Eo, na komu sule keri te durake!
Itaeni Babylon te vagha didira na vatei polo na lei tidalo dika mana nikudira na lei manu dika.Isaiah 13:21; 21:9; Jeremiah 50:39; 51:8; Na Livu 14:8
3 Na lei kema soko tara inubulebulea na wine tana lei nina kabalaghi.
Na lei vunaghi haba ni maramana tara ngelengele kolua, na pukuna tara taonighi na nilabuna;
Mana pukuna Babylon te liona ngangata na lei lologho te utoutoa me dato na mateni ke,
keri ge na lei tinoni hunuhunulu tana maramana tara nia tughuruvaghi nina lologho, mara kabu uto.”Isaiah 23:17; Jeremiah 51:7
4 Mi kakeri, nau tu rongovia ghua a sakai na talama ni manga te horu mai kokou, me ghaeghahe,
“Ighau lei nigua na vure, kau rughuhoru mai sania Babylon!
Kau bei hoghohaghe gea tana lei paluna
me ke bei kaleghau gea na totoro ke kalea.Isaiah 48:20; Jeremiah 50:8; 51:6, 45
5 Na lei paluna te sonisavu me datogha me sara i kokou,
ma God te ghanaghana olighi me gonidila ge ke detei nina na lei gehegehe dika.Vuivuni 18:20-21; Jeremiah 51:9
6 Ko toroa gaia, vagha gaia te torora rana vure keha.
Ko vahea na totoro te au vaa na pukuna lei nina gehegehe dika.
Dorea nina seu nia na beti maomao te laga vulea va
na hava te nia hevei horu vanira rana vure keha.Buka Linge 137:8; Jeremiah 50:29
7 Gaia te kabu togholuvu me togotogo,
keri te vagha ge kau tughuolia itaeni kolua nia na vahaghitaili mana dikalio.
Gaia te talunaghoa heghena me ghaghua, ‘Inau tu vinahogho ta nigua na malei sopou ni vunaghi.
Inau tu mua kabu vaghau na vaivine matesasani.
Mi nau tu mua pukua na dikalio.’
8 Mana pukuna keri, na mate mana vahaghitaili mana dikalio mana ngengere,
Mana lake ke ghani taghalaghinia tana sakai na dani vamua,
na pukuna a Lord God puku ni maana te detea.”Isaiah 47:7-9
9 Mana lei vunaghi haba tana maramana tara hogholavaghi ta lei nina nilabu te hahi, mara nia togotogo nina kabu uto ke, kara tangihia tana bona kara righia na ahu ke dato mai itatana ke ghani sanighi na lake. 10 Ma gaira kara tughuru sagauvia nia na mataghu ta nina totoro te sule. Ma gaira kara tangi ngangaraha, ma kara ghaghua,
“Arovia! Arovia Babylon na komu sule te rongoragha!
Anina dete God ke mai vuvungana te vagha keri tana pile bona vamua.” Jeremiah 51:8; Ezekiel 26:16-17
11 Ma gaira na lei tinoni hunuhunulu tana maramana, kara tangi ma kara dikalio vania, na pukuna te taho siki sakai ke pelui didira na lei lologho.Ezekiel 27:31, 36 12 Eo, gaia te pelui na lei gold mana silver mana vatu utoutoa mana tolu ni davi, na lei vata ni tivi te dato na mateni vaghai na silika, maia ghua na lei tivi uto tara pura mara boibongi mara sisi, mana lei ghaiuruuru, mana lei totobo tara sarighi nia na livo ni elephant, mana lei ghai te dato na mateni, mana lei totobo ni brass mana lei totobo ni halo, mana lei totobo nia na vatu utoutoa tara holoa nia na mavolo. 13 Ma gaia ghua te pelui na ghuighuli ni ghaiuruuru te nea na vanga uto ge uruurua, na ghaiuruuru tara holoa nia myrrh mana frankincense, mana wine, mana kokolo ni olive, mana pulaoa, mana wheat, mana lei buluka, mana sheep, mana horse, na taitakiro, mana lei seka.Ezekiel 27:12-13, 22 14 Na lei tinoni hunuhunulu kara bosa vania Babylon, “Na lei totobo utoutoa to dolovi ngangatai tara sivi tua. Na lei nimua na lologho mana lei totobo ghaugharugha to talu datoi na mateni ka, kara mua ghoi nimua oli ghua. Kara sivi kasila tua!” 15 Na lei tinoni hunuhunulu tara lologho ngangata na pukuna tara sabirighi na lei totobo raini vania Babylon. Kara tughuru sagauvia na pukuna tara nia mataghu nina na totoro te sule. Ma gaira kara tangi ma kara dikalio.Ezekiel 27:31, 36 16 Kara bosa vania,
“Arovia! Arovia Babylon na komu sule te rongoragha!
Te utoutoa na reireina vagha na vaivine te nia pupulu na tivi te boibongi, mana tivi te sisi dengidengi,
me nia vaguvagu na gold mana lei vatu utoutoa, maia na tolu ni davi.
17 Anina dete God ke mai vuvungana te vagha keri tana pile bona vamua.”Isaiah 23:14; Ezekiel 27:26-30
Gaira tara righitaonighi na lei vaka ni hunuhunulu kolura didira na lei tinoni lutu, maira na lei tinoni tara tona ilokani, maira tara holai didira na rongo tana didira lutu vaka, kara tughuru sagauvia. 18 Mi tana bona tara bungutia va na ahu te dato, ma kara ghaghua, “Taho siki komu sule tana maramana te haba vulea va na komu sule eni!” 19 Ma gaira kara sonighi na ravu tana uludira, ke tughunitatea didira na dikalio te sule. Ma gaira kara tangimate mara ghaghua,
“Arovia! Arovia Babylon na komu sule te rongoragha!
Gaia te neghita ge a lologho udolu ta nina na lologho te sule.
Mi taeni anina dete God ke mai vuvungana te vagha keri tana pile bona vamua.”Ezekiel 27:30-34
20 Ghau tau kabu i kokou, kau rivurivu, na pukuna te durake tua na komu sule keri. Mi ghau ghua lei nina tinoni tabu God, kau togotogo kolura na lei manevetena, mana lei prophet. Keri ke, itaeni God te detematea, na pukuna na hava te gonighi vanighau. Eruani Vetena 32:43; Jeremiah 51:48
21 Mi kakeri, na angel te loghoa na maana sule, te ghate datoa na vatu te sule ngangata, me sonihorua tana horara, ge ghu me ghaghua,
“Babylon na komu sule, kara sonihoru kehagho
vagha tu nea iga na soni horuana na vatu eni,
mi ghoe ko taghagho ke va me va.Jeremiah 51:63-64; Ezekiel 26:21
22 Me ke taho tua na rongoviana na ghalevughalo,
me taho na lovu uvete, linge mana lovu tavuli lokamu.
Me ke taho ghua na lei tinoni lutu kara lutui ga na lei totobo ilokamu;
me ke taho ghua na ghiriani na lei vuavua ni wheat ge kara gonia na pulaoa.Ezekiel 26:13; Isaiah 24:8
23 Me ke taho na bulu ke ghoi ruruhu ilokamu Babylon,
me ke taho ghua na taulaghi ga.
Na lei nina tinoni hunuhunulu tara subo au tana maramana,
ma gaia te pegopegora me kibora na lei kema.Jeremiah 7:34; 25:10; Isaiah 23:8
24 Tana lokana na lei butobuto ni komumu,
na ghabudira na lei prophet ma nina vure tabu God te tave iga.
Mi ghoe to matera subo na vure tana maramana udolu.
Na pukuna na lei totobo raini ke, God te torogho, Babylon.”Jeremiah 51:49
18:2 Isaiah 13:21; 21:9; Jeremiah 50:39; 51:8; Na Livu 14:8
18:3 Isaiah 23:17; Jeremiah 51:7
18:4 Isaiah 48:20; Jeremiah 50:8; 51:6, 45
18:5 Vuivuni 18:20-21; Jeremiah 51:9
18:6 Buka Linge 137:8; Jeremiah 50:29
18:8 Isaiah 47:7-9
18:10 Jeremiah 51:8; Ezekiel 26:16-17
18:11 Ezekiel 27:31, 36
18:13 Ezekiel 27:12-13, 22
18:15 Ezekiel 27:31, 36
18:17 Isaiah 23:14; Ezekiel 27:26-30
18:19 Ezekiel 27:30-34
18:20 Eruani Vetena 32:43; Jeremiah 51:48
18:21 Jeremiah 51:63-64; Ezekiel 26:21
18:22 Ezekiel 26:13; Isaiah 24:8
18:23 Jeremiah 7:34; 25:10; Isaiah 23:8
18:24 Jeremiah 51:49