1 Mi nau tu righia na parako mana maramana vaolu, na pukuna na diki parako mana maramana toro taghara tua. Me taho na tahi ga.Isaiah 65:17; 66:22; 2 Peter 3:13 2 Jerusalem vaolu, na komu sule te tabu, mi nau tu ghoi righia te horu mai kokou itatana God, vagha na tahula te pitudilaa na holopangotiana tauna ta nina sonikolu.Isaiah 52:1; 61:10; Na Livu 3:12 3 Mi nau tu rongovia na talama ni manga te sule te horu mai tana malei sopou ni vunaghi haba te vagha eni, “Itaeni God te kabu kolura nina lei tinoni tana komuna. Gaia ke kabu kasila tana ghobudira, gaira kiri nina puku ni tinoni God. God heghena tua ke kabu kolura me ke didira na God.Ezekiel 37:27; Buka Vetena 26:11, 12 4 Me ke ghudurikehai na kolobu ni matadira, me taho siki tinoni ke mate, pe ke dikalio, pe ke tangi, pe ke vahaghitaili na pukuna na maramana haulaghi mana lei totobo dika tara soko tua.”Isaiah 25:8; 35:10; 65:19

5 Ma gaia te sopou tana malei sopou ni vunaghi haba te bosa, “Inau tu goni vaovaolui lei totobo udolu!” Vaho ge ghoi bosa vaniu so me ghaghua, “Ko gere horui na lei bosa raeni. Ko tangomana ge ko taluutunighi na pukuna na hava ku bosai vanigho te utuni.” 6 Ma gaia te bosa me ghaghua, “E soko tua. Inau na Alpha maia na Omega - na vuivuni mana sosoko. Arahei tara haga inu ke, inau ku vahera na vuravura ni beti ni vola, ma kara mua pelua.Isaiah 55:1 7 Ma rahei tara lagavule kara lavighi na lei vauto, mi nau ku didira na God, ma gaira na lei dalegu.2 Samuel 7:14; Buka Linge 89:26-27 8 Hauva, arahei tara niu maa, ma tara mua taluutuniu, ma arahei tara goni hahighi na lei totobo, ma tara labumate tinoni, ma tara kabalaghi, ma tara kibokibo, ma tara tualaghi tuturu vania na titinoni, ma tara holohaba na lei god keha, ma tara sorisori, God ke soni horura tana kolo ni lake - gaia eni ruani na mate.”

9 Keri ke, asakai tadira e vitu na angel te tabei e vitu na popo te vonughighi e vitu na lei vahaghitaili sosoko, te mai me bosa vaniu te vagha eni, “Ko mai, mu ku tatea vanigho na tahula, gaia ke tauna na Dale Sheep.” 10 Ma nina maana na Tarunga Tabu te maanapungisiu, mana angel te lavidatou kouna na ghotu datogha, me tatea vaniu Jerusalem vaolu, na komu tabu te horu mai ta God i kokou. Ezekiel 40:2 11 Ma nina rongoragha God te hinaria na komu eni ge vitiviti, me lioliogha vagha na vatu utoutoa tara holoa nia jasper te maghora vagha na gilasi. 12 Mana peona na komu sule keri te volapa me datogha, me loghoi hangavulu rua na mataula tara righitaonighi sopa sakai na angel. Mana ahadira e hangavulu rua na kema ni Israel tara gerei tana lei mataula kiri, sakai na aha ta sopa sakai na mataula. 13 Me tolu na mataula paleva uluna, me tolu paleva bokona, me tolu paleva launa, me tolu paleva longana. Ezekiel 48:30-35 14 Mana peona na komu tara kisua ivuvungani e hangavulu rua na vatu sule mara gerei ga na ahadira ra hangavulu rua nina manevetena na Dale Sheep.

15 Mana angel te bosa vaniu te tabea na totoghona gold, ge ke kagea nia na komu sule keri maia na peona, me hangavulu rua na mataulana.Ezekiel 40:3 16 Mana komu te kaekage ngangata na halavuna, darona mana volapana. Mana angel te kagea na komu sule nia nina ghai ni kakage, me kagea te vagha sakai na mola erua hangalatu na togha (1,200,000) ni ghoto*sakai na mola erua hangalatu na togha ni ghoto Tana leu ni Greek tara talua hangavulu erua na togha (12,000) na stadia. na darona, mana volapana mana datoghana. 17 Mana angel ghua te kagea na peona, me tolu hangavulu tolu na ghoto†tolu hangavulu tolu na ghoto Tana leu ni Greek - sakai hangalatu vati hangavulu vati na cubit. na datoghana, taonia tara nea haia iga na kageana na lei totobo na vure. 18 Na peona na komu tara gonia nia na vatu utoutoa tara holoa nia jasper, mana komu sule tara gonia nia na puku ni gold te marabu vagha na gilasi. 19 Na peona na komu tara gonia nia na lei vatu utoutoa. Na diki tara hola nia jasper, eruani tara holoa nia sapphire, e toluni tara holoa nia agate, me vatini emerald. 20 E limani onyx, e ononi carnelian, e vituni chrysolite, e aluni beryl, e hiuani topaz, e hangavuluni chrysoprase, e hangavulu sakaini jacinth, me hangavulu ruani amethyst. 21 E hangavulu rua na mataula haghe tara gonighi nia na tolu ni davi sule, sopasopa mataula haghe tara gonighi nia sasakai na tolu ni davi. Mana halautu sule ilokana na komu, tara gonia nia na puku ni gold te maghora vagha na gilasi. Isaiah 54:11-12

22 Mi nau tu mua righia siki Valetabu ilokana na komu, na pukuna Lord God puku ni maana, maia na Dale Sheep toro kabu haia tua iga, ma rogaira tua nina Valetabu. 23 Na komu sule keri te mua loghoa na aho pana vula ge ke maramahia na komu, na pukuna nina rongoragha God te hinaria, mana Dale Sheep tua na buluna.Isaiah 60:19-20 24 Mana lei kema ni maramana kara ole kolili tana mararana, mana lei vunaghi haba ni maramana kara nia hevei vania na komu eni didira na lologho.Isaiah 60:3 25 Na lei mataula kara mua vovongo tana sosokona na dani, na pukuna te taho iga na bongi. 26 Mana lei kema ni maramana kara nia hevei didira na lologho mana lei totobo utoutoa vania God ilokana na komu eni.Isaiah 60:11 27 Hauva, taho iga siki totobo dika, pa siki sakai te gonighi na nilabu dika me gueguelo, ge ke haghevia na komu sule ge ke kabu iga. Ma rahei vamua tara loghoi na ahadira tana buka ni vola nina na Dale Sheep kara kabu iga. Isaiah 52:1; Ezekiel 44:9