15
Jiszs Nide Nounc Angidr
Mzli kc tqvz-ngrgr mz lrpzki, Jiszs rpi-mople bagr mz nzycmne-ebzpxngr kx, “Ninge nounc angidr, x Trtenge nide kx ngi nyzde nrlanc. Lakitxpx-atwrnr-ngrdeng nrlangeng amrlx kcng trpnzngr nradr. X nrlangeng kcng nradr tqycbz lvxoleng murde nado zlwz. X mz nqmq kcpwz, natqnge alqtile x okatrle nimu mz nzale-krmu da kxmrlz. Trpnzngr nrla nounc kx nado mz nide esz'-krde, a' natutrpwz mz noude. Kxmu-kzle lc mz nimu. Na-axvctr-lzbqmamu bange murde namncbo bamu. A' nzmu trna-axvctr-lzbqpwa'muu bange, trpnzngr nramu, murde ninge nou nzlu-krmu.
“Ninge nounc x nimu nrlangeng. Doa kx axvctr-lzbqbz bange x mncbo bade, sa nado zlwz. Trpnzngr da kxmrlz kx nartrngztibzmu nzmu trna-axvctr-lzbqpwa'muu bange. X doa kx lakipx-lzbqm bange, trpnzngr nrade. A' nrlade kxmule lcng takitxtrpwzle nzangcngr mz nyr. A' nzmu na-axvctr-lzbqmamu bange x yrlq-angidramu natqnge, krlzamu nzrlxti-krbzmu mz Gct da kx suti drtwrmu, x sa na-angidabzle. Mz nzaxvctr-lzbq-krmamu bange, dekc nado-zlwz-ngrnamu x na-aelwapx-ngrnamu kx nimu leplz nengeng. X nramung na-aelwapx-kz-ngrdr nzmyalz-esz'ngrkr Trtenge. * Mz nzycmnekr Jiszs, rpile ‘Ninge nqvi lr grep angidr.’ Mz Nzryrngrkxtr nqvi lr grep drtwr ngrde lr Jiu ngr Israel. Mz nzrpi-krde kx nide angidr nqvi lr grep, mwx drtwr ngrde kx lr Israel trnznginipedru nqvi lr grep angidr.
“Mrlztix nimu da kc tqwai nzmrlztikr Trtenge ninge. Mz nzmu-krde lcde, namnclz-zvzmamu mz nivz lrnge. 10 X sa namnclz-zvzmamu mz nivz lrnge nzmu nayrlq-angidramu natqnge. Da kc tqwaix nzyrlq-angidr-krbo natq Trtenge, x mnclz-zvzbo mz nivz lrde. 11 Pipxbo bamu natq lcng murde na-abrtzlvzx nimu x nabzmu na-abrtz zvz. Jon 3:29; 17:13
12 “Natqnge kx nayrlq-angidramu nide sele, ‘Mrlzti-lzbqamu da kc tqwai nzmrlzti-krnge nimu.’ Jon 13:34; 15:17; 1 Jon 3:23; 2 Jon 5 13 Nivz kx myapxbz rlrpx-ngrde nzlu-krde mz nzokatr-krde mzledeng. 14 X sa nanginimu mzlengeng, mz nzyrlq-angidr-krmu natqnge. 15 Mzli ka trpengr nzrpi-krbo nimu kxnzawzng, murde kxnzawz trkrlzleu da kcng tqrtrngztibz kxetu rde. A' nipemu mzlengeng, murde da amrlx kcng tqxlrtrpo mz nao Trtenge, tqpitipebo bamu x krlzpeamu. 16 Trmcpxwamuu ninge, a' mcpxx nimu murde nramu nakqlu zvz. X da kznike rlxtibzmu mz Trtenge mz zmatq r drtqnge, sa na-angidabzle. 17 Yrlq-angidramu natqnge lc, ‘Mrlzti-lzbqamu.’ ” Gct sa naka-txpwzle da mz nzvz-nqblq-krde me pnz drtwrde.
Leplz Neng Jiszs X Lr Nrlc
18 Jiszs rpi-mople bagr kx, “Bzkq kctipxamu mzli kc napxtxpxngr lr nrlc nimu, murde nzpxtxpx-kai-ngrdr ninge. 19 Kqlex nimu murde nablepxbzmu mz lr nrlc. Delc tzpxtxpx-ngrdr nimu. A' nzmu nanginimu lr nrlc, sa namrlztilr nimu murde nzmrlzti-zvzlr lr mrnyzdr. 20 Nadcpx mz drtwrmu da lc tqpibo bamu, ‘Trpnzngr kxnzawz kx myaszlzle kxetu rde.’ Nzmu kx tzatrkatilr ninge kc tqngi kxetu rmu, sa na-atrkati-kzlr nimu mz nzngini-krmu kxnzawz nengeng. A' nzmu nayrlqlr natqnge, sa nayrlq-kzlr natqmu. Matiu 10:24; Luk 6:40; Jon 13:16 21 Lr nrlc sa na-atrkatilr nimu mz nzngini-krmu leplz nengeng, murde trnzkrlzlru Gct kc tqatwzlr-ngrmle ninge. 22 Nzmu trnaxlrlru natqnge, trpnzngr alwx ngrdr. A' alwx ngrdr tutr mz nzpxtxpx-krdr natqnge. 23 Murde doa kx pxtxpx-ngrde ninge pxtxpx-kz-ngrde Trtenge. 24 Kxmule-esz' nzmcpelr nzale-krnge da kcng tqmatq-esz'ngr, kx trpnz-moungr kx rkrlz nzalengr, a' alwx ngrdr tutr mz nzpxtxpx-zvz-krdr nigr ncdr Trtenge. 25 Da lcng nzatutrlr natq kcng mz Nzryrngrkxtr, tqrpile kx, ‘Nzpxtxpx-krdr ninge trpnzngr noude.’ ” Sam 35:19; 69:4
Kxokatr Kc Tqngi Mqngrkxtr
26 Jiszs rpi-mople bagr kx, “Sa na-atwzlr-ngrmc Kxokatr bamu. Krlc Mqngrkxtr, kc tqngi nou da angidr amrlx, tqvzpxm mz Trtenge. Mzli kc navzo-ngrmle, sa na-aelwapx-ngrbzle ninge bamu. 27 X mzli lcde, nayapwxtipxamu ninge, murde mnctrpa'mu bange abzo mz mzli kc ayrnrngr tqwz-ngrne mz nrlc.

*15:8 Mz nzycmnekr Jiszs, rpile ‘Ninge nqvi lr grep angidr.’ Mz Nzryrngrkxtr nqvi lr grep drtwr ngrde lr Jiu ngr Israel. Mz nzrpi-krde kx nide angidr nqvi lr grep, mwx drtwr ngrde kx lr Israel trnznginipedru nqvi lr grep angidr.

15:11 Jon 3:29; 17:13

15:12 Jon 13:34; 15:17; 1 Jon 3:23; 2 Jon 5

15:17 Gct sa naka-txpwzle da mz nzvz-nqblq-krde me pnz drtwrde.

15:20 Matiu 10:24; Luk 6:40; Jon 13:16

15:25 Sam 35:19; 69:4