Selusien koa helamu ten
1 Tesalonaeka
?Isei mutis selusien koanik?
Pol, koa vi eiloheh tai onen Iesu Kristo mutis leta koanik 1Tes 1:1; 2:18 en sua 51 AD (sua keil koa katau en avong Iesu avasi), navong ro mulamu en taon ten out Korin 1Tes 3:1-2; Umen 18:1-18 en ualien onen koa elu keke vahitehiten more longlongien usil Iesu Kristo min meatin keil. Umen 15:36–18:22 Amundemi avit Pol mutis leta koanek mulamu en leta sav vasi keil onen.
?Isei vuli selusien koanik mulamu?
Pol mutis selusien koanik va min Kristin keil koa amul en taon ten out Tesalonaeka. En ualien onen koa elu, Pol va en taon ten out Pilipae ka vitehiten more longlongien usil Iesu Kristo min meatin keil ekonek. Ka tei en meatin keil amumoni keih mini ka alingi en eim takeih. Navong mul en eim takeih enek, alu mulu. Ka navong amaeni vaha vamaluv, Umen 16:16-40 aring koe keke natotei mun en out Pilipae. Sakini, Pol keilu Saelas luva en meteimal ten out Tesalonaeka. Umen 17:1-4 Ka ekonek, tei en Siu keil avi elu en Pol, sakini aviles rendemien onen meatin keil keke avalikat Pol vaha ran out Tesalonaeka. Umen 17:5-11
Navong Pol rokol taon ten out Korin, ro ral min Kristin keil ekonek avati teindan outel (18). Umen 18:11 Ka navong mul mum en out Korin, Pol longe keke demkatien onen tei en Kristin hau keil en out Tesalonaeka mul mot, sakini mutis leta koanek va min keil vahati lat ris rendemien one ka vasuv kat demkatien one.
?Pol mutis selusien koanik vensa?
Pol en vati vatalimal en rendemien one keke mal Kristin keil avahisu en avong keil takeih – Kristin keil en out Tesalonaeka avisu en avong keil takeih en hen me-Tesalonaeka sav keil etin. 1Tes 2:14 Ka Pol viteni min keil keke mal Kristin keil ihisu en avong keil takeih ven demkatien one. 1Tes 2:14-16
Pol en vati vatalimal en rendemien one usil umen onen – Tei en Kristin keil en out Tesalonaeka aselus karen Pol avit kei mul luvos keil keke vakur tounah ran keil. 1Tes 2:3 Ka Pol viteni min keil keke sa maen hihiseien keil onen min keil ka rovistei keil ven mani. 1Tes 2:4-12
Pol en vati vatalimal en rendemien one usil mearisien onen Kristin keil ran matien ka mukave Iesu hemai ris eni – Kristin keil en out Tesalonaeka amundemi keke Iesu hemai hekalah. Ka navong tei en keil umat, amundemko. 1Tes 4:13 Ka Pol vati lat rendemien one vit anatin keke Iesu hemai ris, ka navong hemai, koakeil umat tuai imoul eris ran matien en hati avong koa koakeil amoul veah ihina en out nesa. 1Tes 4:14-18 Sakini, Pol sel kat keil avasak mesein keil veni. 1Tes 5:1-22
Mari rendemien tai ten selusien koanik mul en 1 Tesalonaeka 3:12-13
Metvisi keke Asuv Iesu hesakin envatien onami hemoul hemarite mok ka hemai hemariso hesuval vati envatien onomaitel ven kami keke emi hehathat kami eris ka emi hehat meatin sav vasi keil emun. Ka metvisi mun keke hesakin rendemien onami hekeih imok keke mihehi votut ka mihetolas en meten Ahi Tamer navong Iesu, Asuv orer, hemai hetal min meatin keil onen koa avi votut.
Mari rendemien tamun ten selusien koanik mul en 1 Tesalonaeka 4:14
Ir rokilea keke Iesu mat ka moul eris ran matien. Sakini, rokur anatin keke navong Iesu hemai ris eni, Ahi hesakin koakeil umat tuai koa aling desien one eni, keil emun imoul eris hetal mini.
?Asa mul en selusien koanik?
1. Pol masmas Ahi ven demkatien onen Kristin keil en out Tesalonaeka. (1:1-10)
2. Pol vit usil umen onen ral min keil ka mukave mul vati lat keil en hisien onen lisenges. (2:1–3:13)
3. Pol sel kat keil usil vati moulien koa Ahi si veni. (4:1-12)
4. Pol vit kilea min keil usil hemukave Iesu hemai ris eni. (4:13–5:11)
5. Selusien ekor. (5:12-28)
1
Hitkileaen onen Pol usil leta koanik
Inau, Pol, ral min Saelas* Saelas, isen tamun vi Silvanus. ka Timoti, metmutis leta ekek vat ven kami, meatin keil koa avi onen Ahi Tata ka Asuv Iesu Kristo koa mimul en sios ten out Tesalonaeka. Metvisi keke more envatien ka tomat onen Ahi hel en moulien onami. 2Tes 1:1; Umen 17:1
Pol masmas Ahi ven more moulien ka demkatien onen Kristin keil en out Tesalonaeka
Lises metmasmas Ahi ven kami vasi ka lises metling kami en hisien onomaitel. Plp 1:3-4; Kol 1:3; 2Tes 1:11 Navong metvis min Ahi Tamer en usite onami, metmundem kat tounah keitel ekek: mukave demkatien onami mul sakin kami mimum keih, mukave envatien onami mul sakin kami mikataun meatin sav keil, ka mukave desien onami en amairisien onen Asuv Iesu Kristo mul sakin kami mimulomal keih navong sakvisien keil mul umai. 1Kor 13:13; Kol 1:4-5 Tuemeitel ka ahinameitel keil, metkilea keke Ahi en vat kami ka rie lat kami tuai mivahi onen. Metkilea keke Ahi rie lat kami veni navong metkur more longlongien vat ven kami, romaiteis en selusien enges. Vuo, mai mun ral min keihoen onen Ninin Votut ka mikilea revi anatinien teni navong metselus min kami. Kami milei kilea sakien ten moulien onomaitel navong metro ral min kami keke metvakataun kami. 1Kor 2:4-5; 4:20 Ka kami mileisungein sakien keil onomaitel ka sakien keil onen Asuv Iesu keke navong mahien mai en kami ven demkatien onami, mikur selusien onen Ahi ral min sien koa Ninin Votut sani min kami. 1Kor 4:16; 2Tes 3:9; Umen 17:5-9 En sakien koanek, kami mimai mivi metai min Kristin vasi keil koa amul en provins keilu ten out Masedonia ka Akea keke akilea avaleisungein sakien onami. 1Pit 5:3 Kami mivitehiten selusien usil Asuv Iesu min meatin sav keil koa akuri uva rokol meatin keil en provins keilu ekek, ka muli va en out savsav keil emun. Anatin, longlongien usil demkatien onami musel suval amaru keke meatin sav keil koa aro soutin amul araengoni. Sakini, tounah tovuol keke komeitel metvahiteni mun usil demkatien onami veni meatin keil akilea tuai eni. Rom 1:8 Anatin, meatin vasi keil koa aro soutin ran kami en out keil ekek amul aselus usil mukave kami mikur revi komeitel navong metsao en kami. Avit usil mukave miviles ran nana keil keke miva netan min Ahi, kei koa moul ka vi anatin. Umen 17:4 10 Keil avit usil mukave mimul mirosin Natnali vaka en out nesa koa Ahi rali lati ran matien. Anatin, avit usil mukave mirosin Iesu koa heting koe ir ran mahien koa hemai ven vurohien onen Ahi va kat tisaen keil. Taet 2:13; Umen 17:31; 1Tes 5:9

^ 1Tes 1:1; 2:18

^ 1Tes 3:1-2; Umen 18:1-18

^ Umen 15:3618:22

^ Umen 16:16-40

^ Umen 17:1-4

^ Umen 17:5-11

^ Umen 18:11

^ 1Tes 2:14

^ 1Tes 2:14-16

^ 1Tes 2:3

^ 1Tes 2:4-12

^ 1Tes 4:13

^ 1Tes 4:14-18

^ 1Tes 5:1-22

*1:1: Saelas, isen tamun vi Silvanus.

1:1: 2Tes 1:1; Umen 17:1

1:2: Plp 1:3-4; Kol 1:3; 2Tes 1:11

1:3: 1Kor 13:13; Kol 1:4-5

1:5: 1Kor 2:4-5; 4:20

1:6: 1Kor 4:16; 2Tes 3:9; Umen 17:5-9

1:7: 1Pit 5:3

1:8: Rom 1:8

1:9: Umen 17:4

1:10: Taet 2:13; Umen 17:31; 1Tes 5:9