Selusien koa helamu ten
2 Tesalonaeka
?Isei mutis selusien koanik?
Pol, koa vi eiloheh tai onen Iesu Kristo mutis leta koanik✡2Tes 1:1 en sua 51 vuo 52 AD (sua keil koa katau en avong Iesu avasi), navong mul veah visein Kristin keil en taon ten out Korin.
?Isei vuli selusien koanik mulamu?
Pol mutis selusien koanek va min Kristin keil koa amul en out Tesalonaeka. Meatin houlu amundemi avit Timoti san leta ten 1 Tesalonaeka min keil ka mai ris ven Pol, Pol mutis leta koanek min keil koa selus usil tounah vatinek en leta koa mulamu.
?Pol mutis selusien koanik vensa?
Pol en vati vasel kat keil avahatimal en sakvisien keil koa amul avisu eni – Kristin keil en out Tesalonaeka amul veah avisu en avong keil takeih ven demkatien one.✡2Tes 2:4 Ka Pol viteni min keil keke avong takeih keil enek rie lati keke avi onen Ahi anatin.✡2Tes 1:5-12
Pol en vati vatalimal en rendemien one usil tounah koa hekistal en avong ekor keil – Kristin keil en out Tesalonaeka arkilea revitei usil avong ekor keil ka avong koa Iesu hemai ris eni. Sakini, Pol vit luvati min keil keke, en avong ekor keil, meatin keil imai liluvos ihit avit avi Kristo onen Ahi.✡2Tes 2:3-12 Pol vit luvati mun keke navong Iesu hemai ris, hesan mahien min koakeil asesein Ahi ka koakeil arlong kattei Kristo, ka houmon mari kot en meatin vasi keil.✡2Tes 1:5-10
Mari rendemien tai ten selusien koanik mul en 2 Tesalonaeka 2:1-2
Tuemeitel ka ahinameitel keil, emeitel vati metvaselus min kami usil avong koa Iesu Kristo, Asuv orer, hemai ris eni ka helah vituain ir rovato vatali. Metpeah kami li, minamaentei rendemien onami nakonakon ka minasil entei selusien taluvosien koa vit Asuv Iesu mai ris tuai.
Mari rendemien tamun ten selusien koanik mul en 2 Tesalonaeka 3:5
Metvisi keke Asuv Iesu hesakin kami miheilea revi mok envatien onen Ahi ka hesakin kami mihelomal hekeih en demkatien onami hesuval koa Iesu Kristo mun mumoni.
?Asa mul en selusien koanik?
1. Pol vati lat rendemien onen Kristin keil en out Tesalonaeka ven sakvisien keil koa amul avisu eni. (1:1-12)
2. Pol visein keil usil avong koa Iesu hemai ris eni. (2:1-17)
3. Pol sel kat keil usil sakien tetahos keil koa mal avousili. (3:1-18)
1
Hitkileaen onen Pol usil leta koanik
1 Inau, Pol, ral min Saelas*Saelas, isen tamun vi Silvanus. ka Timoti, metmutis leta ekek vat min kami, meatin keil koa mivi onen Ahi Tamer ka onen Asuv Iesu Kristo koa mimul en sios ten out Tesalonaeka. ✡1Tes 1:1 2 Metvis Ahi Tamer ka Asuv Iesu Kristo luhesan more envatien ka tomat onealu hel en moulien onami. ✡Rom 1:7
Pol vit luvati keke navong Iesu hemai ris eni, helei rahit usite onen meatin vasi keil
3 Tuemeitel ka ahinameitel keil, lises metmasmas Ahi ven kami. Ka mal keke metvoumoni vamukonek veni demkatien onami mul mai keih imok ka envatien koa tetai en kami mirie lati ven meatin sav keil mul moul marite. ✡1Tes 1:2; 2Tes 2:13 4 Sakini, komeitel metvasi kami min Kristin keil en sios vasi keil onen Ahi. Metrun min keil usil kami, mukave mimul mimulomal keih en demkatien onami, avaseini sakvisien keil ka mahien keil koa mimul mikuri. ✡2Kor 7:4; 1Tes 2:19; Rev 1:9
5 Demkatien takeih onami navong sakvisien keil umai ven kami mul rie lati keke navong Ahi houmon kot en meatin keil, houmoni en sakien koa mal revi. En avong enek kei hehitehiteni keke mivinvin keke miheto hetal mini veni mimul mikur mahien ven hiasuvien onen. ✡Plp 1:28; Luk 20:35; 1Tes 2:12 6 Ahi houmon asa koa hemal, ka hesa kes mahien min koakeil asan mahien min kami. ✡Rom 12:19; Rev 18:6,7 7 Ka kei hesan sehien min kami koa mimul mikur mahien ka min komeitel emun. Houmoni en avong koa Asuv Iesu hekistal ran out nesa hetal min angelo takeih keil onen. ✡Sak 14:5; Mat 25:31; 1Tes 3:13; 4:16 8 Keil imita hetal min ahang takeih keke avasan mahien min koakeil asesein Ahi ka koakeil arlong kattei more longlongien usil Asuv Iesu. ✡Sam 79:6; Aes 66:15; Ser 10:25; Rom 2:8; 1Pit 4:17 9 Navong Ahi houmon kot en keil, hesan mahien koa sakras vavus min keil. Hemukonek, keil ito soutin ran hetetamenien ten keihoen onen Asuv Iesu lises ka lisenges. ✡Aes 2:10,19,21 10 Tounah keil enek hekur out navong kei hemai keke meatin keil onen ihati lat isen hehina nesa. Anatin, koakeil akur anatin eni ilesi ka itimanin en hetetamenien onen. Ka kami mun miheto hetal min keil veni mimul mikur anatin en selusien koa komeitel metviteni min kami. ✡Sam 88:8; Aes 49:3; Kol 3:4; 1Tes 3:13; Sam 67:3-6
11 Ka veni emeitel vati mok miheto hetal min koakeil enek, lises metvis Ahi orer voumon kami mivavinvin mivakur moulien koa kei vise kami mivakuri. Metvisi mun hesan keihoen min kami keke mihoum vasin tounah keil koa tahos emi vati mivoumoni veni miling demkatien onami en Iesu Kristo. ✡Kol 1:9 12 Metmul metvis ven tounah keil enek keke koakeil ales asa koa Asuv Iesu mul mumoni en moulien onami ihati lat isen. Ka kei suk hehati lat isomi. Metkilea keke tounah keil enek hekur out ven more envatien onen Ahi orer ka Asuv Iesu Kristo. ✡Aes 24:15; 66:5; Mal 1:11
*1:1: Saelas, isen tamun vi Silvanus.
✡1:4: 2Kor 7:4; 1Tes 2:19; Rev 1:9
✡1:5: Plp 1:28; Luk 20:35; 1Tes 2:12
✡1:7: Sak 14:5; Mat 25:31; 1Tes 3:13; 4:16
✡1:8: Sam 79:6; Aes 66:15; Ser 10:25; Rom 2:8; 1Pit 4:17
✡1:9: Aes 2:10,19,21
✡1:10: Sam 88:8; Aes 49:3; Kol 3:4; 1Tes 3:13; Sam 67:3-6
✡1:12: Aes 24:15; 66:5; Mal 1:11