Selusien koa helamu ten
2 Timoti
?Isei mutis selusien koanik?
Pol mutis selusien koanik en sua 67 AD (sua keil koa katau en avong Iesu avasi) ka vi selusien ekor onen. Navong mutis selusien mulamu va min Timoti ka Taetas, mul sao veah en vangi Kristin keil en taon houlu. Ka navong va en out Rom, avuli kati ka aso risi va en eim takeih.✡2Tim 1:8,16 Navong va en kot, alei rahit usite onen ka avit, hervitei tuetin, kei hemat. Navong kur longlongien teni, mutis leta tamun keke va min Timoti vit hekalah hemai helesi. Avaseini keke kilea hemat, tisien ekor koanik onen Pol mul rie lati keke demkatien onen keih,✡2Tim 1:3-14 en vati li mok hihiseien keil ten Sios hemal vasi,✡2Tim 3:10-17 ka en vati li mok keke moulien onen metai keil ten Sios hetolas lisenges.✡2Tim 2:1-26
?Isei vuli selusien koanik mulamu?
Pol mutis selusien koanik va min Timoti,✡2Tim 1:2 ka en vati keke koakeil ten sios ten out Efeses avalonge.✡2Tim 4:22 Selusien koa helamu ten 1 Timoti vit kilea Timoti vi isei.
?Pol mutis selusien koanik vensa?
Pol en vati valei ris Timoti – Pol kilea keke hervitei tuetin uasi hemat,✡2Tim 4:6-8 sakini kei en vat valei ris Timoti helamu en avong hemat en hen me-Rom keil.✡2Tim 1:4; 4:9,21
Pol en vati vasel kat Timoti keke avong takeih mul mai – Pol lei kilea keke avong takeih mul mai ven koakeil amusil kat Iesu, sakini en vati keke keil ilomal hekeih en demkatien one.✡2Tim 1:8; 2:3
Pol en vati vasel kat Timoti valei kat revi hihiseien keil onen – Pol vis Timoti helei kat revi hihiseien onen navong san selusien onen Ahi,✡2Tim 1:14 ka hel hehitehiten selusien onen Ahi.✡2Tim 3:14; 4:2
Pol en vati vasel kat Timoti avong tamun usil meatin keil ten luvosien – Meatin ten luvosien keil amul veah ka Pol sel kat ris Timoti nousil kattei keil ka nasel retavoaitei natal min keil.✡2Tim 2:16-26
Mari rendemien tai ten selusien koanik mul en 2 Timoti 2:15
Kum hetahos hesakini kokilea kovalomal en meten Ahi suval meatin toumien koa romemoutei ven umen onen. Kihi meteisau navong komul kovisein meatin keil en selusien ten anatinien onen Ahi.
Mari rendemien tamun ten selusien koanik mul en 2 Timoti 3:16-17
Selusien keil vasi koa mul en Tus Votut ka ven Ahi. Selusien keil enek atahos tahihiseien, ten selkatien, ten hit luvat sise koa mal, ka tahisein meatin keil keke anoumontei mun sakien tatisa keil one. Tus Votut mul sak mesein meatin keil onen Ahi keke akilea avoum vasin tounah koa vatahos.
?Asa mul en tus koanik?
1. Hihiseien usil koakeil akur umen onen Ahi. (1:1–2:26)
2. Selkatien min Kristin keil keke avalomal vakeih en demkatien one en avong keil takeih. (3:1–4:22)
1
Hitkileaen onen Pol usil leta koanik
1 Inau Pol namutis leta ekek. Inau navi eiloheh tai onen Iesu Kristo musil rendemien onen Ahi koa vat kati keke hesan moulien min koakeil aling demkatien one en Iesu Kristo.
2 Namutis minuk Timoti, koa kosuval more natkuli. Navisi keke envatien, enmahisien, ka tomat onen Ahi Tamer ka Iesu Kristo, Asuv orer, hel en moulien onom.
Pol sel kat Timoti keke hehuli kat revi umen koa Ahi sani mini
3 Timoti, en vongien ka en meneai, ek rovobongentei keik en hisien keil onak, namul namasmas Ahi venuk. Ahi koanik, namusil kati suval avu onak keil telamu amumoni, ka nakilea namusil kati en sise koa mal. ✡Plp 3:5; Umen 23:1; 24:16 4 Namundem kat si metom koa motmot navong lorasil, ka ek vati malesuk eris vasakinau mahilelau en sien. 5 Namundem kat more demkatien onom koa vi anatin. More demkatien vatinek koa mul en avu onom Loes ka mama onom Iunis, nakilea mul enuk emun. ✡Umen 16:1 6 Ven tounah enek, nasel katuk kiles kum hetal min sanien koa Ahi sani minuk navong naling hek enuk, kiles kilihlihi hekeih hesuval vi ahang keke hean hemai hemariso. ✡1Tim 4:14 7 Kum hekeih veni Ninin Votut koa Ahi sani min ialu rosakintei ialu lovametau. !Vuo! Ninin onen mul sakin ialu lovoum vatal min keihoen onen, eralu hehat meatin sav, ka lokilea lovalei kat revi sakien keil oralu. ✡Rom 8:15
8 Sakini, konamemoutei kovahitehiten selusien usil Iesu, Asuv orer. Ka konamemoutei enau mun koa namul en eim takeih veni navi meatin onen Iesu. !Vuo! Hetal min keihoen koa Ahi hesani minuk, kusil sise ten mahien suval inau ven more longlongien usil Iesu. ✡Rom 1:16 9 Ahi kulat ir ran tisaen ka san moulien hau min ir. Kei vise lat ir rovahi meatin keil onen. Rovitei ven tounah koa romumoni. !Vuo! Kei mumoni mukonek musil rendemien onen ka ven more envatien onen en ir. Mulamu en avong Ahi mumon out netan, kei vat kati keke hesan Iesu hemai hehi sise keke hesakin more envatien onen hekistal en ir. ✡Efes 2:8-9; Taet 3:5 10 Ka kosa, mai vi anatin ka kistal min ir navong Iesu Kristo, koa mutut ir, mita en out netan. Kei vitan en keihoen ten matien, ka more longlongien usili rie lat sise ten moulien hau min ir. ✡1Kor 15:55,57; Hib 2:14
11 Ka ven Ahi en vati keke more longlongien koanek heka vasi out, kei rie lat nau navi eiloheh onen, navitehiteni min meatin vasi keil, ka navisein keil eni. ✡1Tim 2:7 12 Ka ven koanek, namul nakur mahien en eim takeih enek. Ka kovaseini namul en eim takeih, narmundemkotei veni nakilea revi isei koa naling desien onak mul ien. Ka nakilea mok keke kei kur keihoen vinvin vakur koe asa koa kei lingi en hek numoni hetokol keite ten tounah vasi. 13 Keik emun kihuli kat selusien ten anatinien koa naviseinuk eni tuai. Sakien keil koa koles nau namumoni ka asa koa kolonge nau naviteni, keik emun kumoni. Ka kihuli kat sakien ten demkatien ka envatien suval koakeil amusil kat Iesu Kristo. 14 Kilosil kat revi umen koa Ahi lingi mul en hem, kilei kati hetal min keihoen onen Ninin Votut koa mul en ir. ✡1Tim 6:20
15 Keik kolong kilea tuai keke tuak vasi keil en provins ten out Esia, suval Fukelas ka Hemongenes, keil vasi arasil ranau. ✡2Tim 4:16 16 Onesiforas, kei sasen mul mai venau en hati avong enek, ka mul vou lat rendemien onak. Ahi hesan enmahisien mini ka min koakeil en teim sen ven kei romemoutei vasao enau en eim takeih koanik. 17 Anatin, navong rokol mari meteimal ten out Rom, kei mul lekatnau va vio … votin out koa naro ien. 18 Ka navong emun koa namum en out Efeses, kokilea keke kei kataunau houlu. Sakini, navis Asuv Iesu keke en hemahisi en keite ten tounah vasi navong meatin keil heha en Mari Kot onen.✡Siud 1:21