أَذْلِيسْ إِقدّْسنْ أَمزْوَارُو ٦

ثُوعفّْنَا ن إِوْذَانْ

١ ڒَْامِي بْذَانْ إِوْذَانْ أَذْ كْثَارنْ ذِي ثمُّورْثْ ؤُشَا ؤُرْونْثْ أَسنْ-د يسِّيثْسنْ، ◼ ٢ أَقَا ژْرِينْ أَرَّاونْ ن أَربِّي بلِّي يسِّيسْ ن بْنَاذمْ شْنَانْثْ، ؤُشَا كْسِينْ ثِيمْغَارِينْ إِ يِيخفْ نْسنْ زِي مَارَّا ثِينِّي إِخْضَارنْ نِيثْنِي. ◼ ◘ ٣ خنِّي إِنَّا سِيذِي: ”وَارْ إِتّْغِيمِي أَرُّوحْ إِنُو ڒبْذَا ذِي بْنَاذمْ، أَقَا-ث ذ دَّاثْ زِي سِّيبّثْ ن ؤُودَّارْ نّسْ. أَذْ إِڒِينْ وُوسَّانْ ن ثُوذَارْثْ نّسْ مْيَا ؤُ-عِيشْرِينْ ن إِسڭّْوُوسَا.“ ◼

٤ ذڭْ وُوسَّانْ نِّي ثُوغَا ’إِنِيفِيلِيمْ‘، إِخْسْ أَذْ يِينِي ’إِنِّي إِوْضَانْ‘، ذِي ثمُّورْثْ ؤُشَا أَوَارْنِي مَانْ أَيَا عَاوذْ، ؤُمِي د-ؤُذْفنْ أَرَّاوْ ن أَربِّي غَارْ يسِّيسْ ن إِوْذَانْ ؤُشَا ؤُرْونْثْ أَسنْ-د. نِيثْنِي ذ ’جّْوَاهڒْ‘ ن زّْمَانْ نِّي، ذ إِرْيَازنْ س يِيسمْ. ◼ ٥ إِژْرَا سِيذِي بلِّي ڒْْغَارْ ن بْنَاذمْ ذ أَطَّاسْ خْ ثمُّورْثْ ؤُشَا مَارَّا ڒمْوَايَاڒْ ن ؤُخَارّصْ ن وُوڒْ نّسْ ذ أَعفَّانْ كُوڒْ أَسّْ. ◘ ٦ ؤُشَا إِنْذمْ سِيذِي ؤُمِي إِڭَّا بْنَاذمْ ذِي ثمُّورْثْ ؤُشَا إِقّسْ أَسْ وُوڒْ نّسْ. ٧ إِنَّا سِيذِي: ”أَذْ مْحِيغْ خْ وُوذمْ ن ثمُّورْثْ بْنَاذمْ إِ د-خڒْقغْ، بْنَاذمْ أَكْ-ذ ڒبْهَايمْ ذ إِمُودَّارنْ إِتّْبُوعنْ ؤُڒَا ذ إِجْضَاضْ ن ؤُجنَّا، مِينْزِي نذْمغْ ؤُمِي ثنْ ڭِّيغْ.“ ٨ مَاشَا نُوحْ يُوفَا أَرْضَا ذِي ثِيطَّاوِينْ ن سِيذِي.

إِنَا ذ إِمزْرُوينْ ن يِينِّي د-إِتّْوَاخڒْقنْ زِي نُوحْ.

نُوحْ ذ طُّوفَانْ

٩ ثُوغَا نُوحْ ذ أَرْيَازْ ذ أَمْسڭّذْ إِكْمڒْ جَارْ مَارَّا جِّيڒَاثْ نِّي إِدَّارنْ أَكِيذسْ. يُويُورْ نُوحْ أَكْ-ذ أَربِّي. ◘ ١٠ ؤُشَا إِجَّا-د نُوحْ ثْڒَاثَا ن إِحنْجِيرنْ: شَامْ ذ حَامْ ذ يَافَاثْ. ◼ ١١ ثُوغَا ثَامُّورْثْ ذ إِشْثْ ن ڒْْخَارْبثْ ذِي ثِيطَّاوِينْ ن أَربِّي ؤُ ثُوغَا ثَامُّورْثْ ثشُّورْ س لْعُونْفْ. ١٢ إِخْزَارْ أَربِّي غَارْ ثمُّورْثْ، ؤُ خْزَارْ، أَقَا-ت ذ ڒْْخَارْبثْ، مَاغَارْ مَارَّا إِمدَّارنْ س أَرِّيمثْ ن ويْسُومْ ثُوغَا خَارّْبنْ أَبْرِيذْ نْسنْ خْ ثمُّورْثْ.

١٣ إِنَّا أَربِّي إِ نُوحْ: ”أَنڭَّارْ ن مَارَّا إِمدَّارنْ س أَرِّيمثْ ن ويْسُومْ أَقَا-ث زَّاثْ إِ وُوذمْ إِنُو، مِينْزِي ثَامُّورْثْ ثشُّورْ س لْعُونْفْ زَّايْسنْ. أَقَا أَذْ ثنْ ثحِّيغْ أَكْ-ذ ثمُّورْثْ. ١٤ أڭّْ إِ يِيخفْ نّشْ إِجّْ ن ؤُغَارَّابُو س ؤُكشُّوضْ ن ؤُمرْزِي ؤُشَا أڭّْ إِخَّامنْ إِ مَارَّا ڒْْمَاڒْ ذڭْ ؤُغَارَّابُو. غدْجفْ أَغَارَّابُو زِي ذَاخڒْ ؤُ زِي بَارَّا س ثِيزفْثْ. ◼ ١٥ أَمُّو إِتّْخصَّا أَذْ ث ثڭّذْ: ثُوزّڭَّارْثْ ن ؤُغَارَّابُو أَذْ ثِيڒِي ثڒْثْ-مْيَا ن إِغَادْجنْ ؤُ ثِيرُو ن ؤُغَارَّابُو أَذْ ثِيڒِي خمْسِينْ ن إِغَادْجنْ ؤُ ڒُْوعْڒَا نّسْ أَذْ يِيڒِي ثْڒَاثِينْ ن إِغَادْجنْ. ◼ ١٦ إِتّْخصَّا أَذْ ثڭّذْ إِشْثْ ن ثْبُورْجثْ إِ ثْفَاوْثْ ذڭْ ؤُغَارَّابُو ؤُشَا أَذْ ت ثْكمّْڒذْ أَنشْثْ ن إِجّْ ن ؤُغِيڒْ زِي سنّجْ. أَذْ ثڭّذْ ثَاوَّارْثْ ن ؤُغَارَّابُو ذڭْ ؤُغزْذِيسْ نّسْ. أَذْ ثڭّذْ طّبْقثْ ن وَادَّايْ ذ طّبْقثْ وِيسّْ ثْنَاينْ ذِي ڒْْوسْطْ ذ طّبْقثْ وِيسّْ ثْڒَاثَا سنّجْ. ١٧ أَقَا نشّْ أَذْ سّكّغْ سّحْڒثْ ن وَامَانْ خْ ثمُّورْثْ، حِيمَا أَذْ ثحِّيغْ سَاذُو ؤُجنَّا مَارَّا إِمدَّارنْ س أَرِّيمثْ ن ويْسُومْ إِ ذِي إِدْجَا أَرُّوحْ ن ثُوذَارْثْ. مَارَّا مِينْ إِدْجَانْ ذِي ثمُّورْثْ أَذْ إِضْڒقْ إِ بُوحْبڒْ. ١٨ مَاشَا أَذْ سّْبدّغْ ڒْْعَاهْذْ إِنُو أَكِيذكْ ؤُشَا شكْ أَذْ ثَاذْفذْ غَارْ ؤُغَارَّابُو، شكْ ذ إِحنْجِيرنْ نّشْ ذ ثمْغَارْثْ نّشْ ذ ثمْغَارِينْ ن إِحنْجِيرنْ نّشْ أَكِيذكْ. ◘ ١٩ ؤُشَا زِي مَارَّا مِينْ إِدَّارنْ، زِي مَارَّا إِمدَّارنْ س أَرِّيمثْ ن ويْسُومْ أَذْ ثسِّيذْفذْ ثْيُويَا، غَارْ ؤُغَارَّابُو حِيمَا أَذْ دَّارنْ أَكِيذكْ: إِتّْخصَّا أَذْ يِيڒِي ذ أَوْثمْ ذ ثوْثمْثْ. ٢٠ أَذْ غَاركْ د-ثَاسْ ثْيُويَا زِي مَارَّا، حِيمَا أَذْ ثحْضِيذْ ثُوذَارْثْ نْسنْ: زڭْ إِجْضَاضْ عْلَاحْسَابْ مَارْكَاثْ نْسنْ، زِي ڒبْهَايمْ عْلَاحْسَابْ مَارْكَاثْ نْسنْثْ ؤُ زِي مَارَّا إِمُودَّارنْ نِّي إِتّْبُوعنْ خْ ثمُّورْثْ عْلَاحْسَابْ مَارْكَاثْ نْسنْ. ٢١ ؤُشَا شكْ، كْسِي إِ يِيخفْ نّشْ زِي مَارَّا مَاشَّا إِ إِتّْوَاشَّانْ ؤُشَا سْمُونْ إِ-ت غَاركْ، حِيمَا أَذْ أَشْ يِيڒِي ذ مَاشَّا ؤُشَا ؤُڒَا إِ نِيثْنِي.“ ٢٢ ؤُشَا إِڭَّا نُوحْ أَمْ مَامّشْ مَارَّا إِ خفْ ث إِوصَّا أَربِّي، أَمُّو إِ ث إِڭَّا. ◘

◼٦:١ 6:‏1 ’إِوْذَانْ‘ - س ثْعِيبْرَانِيثْ ’بْنَاذمْ‘، ؤُڒَا ذِي أَيثْ وِيسّْ 2.

◼٦:٢ 6:‏2 ’أَرَّاونْ ن أَربِّي‘ - مَانْ أَيَا إِخْسْ أَذْ يِينِي ’لْمَالَاكَاثْ‘. خْزَارْ أَيُوبْ 1:6؛ 2:1، 38:7. مَاشَا لْمَالَاكَاثْ وَارْ زمَّارنْثْ أَذْ أَذْفنْثْ خْ يسِّيسْ ن بْنَاذمْ، مَاشَا أَذْ ثَاغْ س ثْسحَّارْثْ نْسنْثْ ؤُ ؤُمِي بْذَانْثْ أَذْ زذْغنْ ذڭْ إِرْيَازنْ ذ ثمْغَارِينْ (أَمْ جّْنُونْ) ڭِّينْ زَّايْسنْ أَرَّاونْ نِّي إِڭِّينْ أَخْمِي ’جّْوَاهڒْ‘. جّْوَاهڒْ نِّي سّْفسْذنْ جِّيڒْ ن بْنَاذمْ ؤُڒَا ذ زَّارِيعثْ ن ثمْغَارْثْ إِ زِي إِوَاعْذْ سِيذِي أَربِّي أَمْسنْجمْ نّسْ، لْمَاسِيحْ (خْزَارْ أَمز. 3:15). س ؤُينِّي ثُوغَا إِتّْخصَّا إِ سِيذِي أَربِّي حِيمَا أَذْ إِحْكمْ خْ دُّونشْثْ مَارَّا، أَڒَامِي إِڭَّا طُّوفَانْ أَذْ د-يَاسْ خْ ثمُّورْثْ. مْغِيرْ نُوحْ إِ إِقِّيمنْ إِدَّارْ أَكْ-ذ ثْوَاشُونْثْ نّسْ. سِيذِي أَربِّي إِحبّسْ ؤُڒَا ذ لْمَالَاكَاثْ نِّي إِڭِّينْ أَيَا (خْزَارْ 1 بُط. 3:19، 20، 2 بُط. 2:4 ؤُ يَاه. 6، 7).

◘٦:٢ 6:‏2 2 بُط. 2‏:‏4؛ Judas 1‏:‏6، 7

◼٦:٣ 6:‏3 ’نّسْ‘ - س ثْعِيبْرَانِيثْ ’نْسنْ‘.

◼٦:٤ 6:‏4 ’إِنِيفِيلِيمْ‘ - س ثْعِيبْرَانِيثْ إِنَا ذ ’إِنِّي إِوْضَانْ‘. نسّنْ أَقَا-ثنْ ذ إِوْذَانْ إِمْغَارنْ أَطَّاسْ مَاغَارْ نُوفَا أَوَاڒْ-أَ ؤُڒَا ذڭْ وذْلِيسْ إِقدّْسنْ ذِي ڒشْثَابْ ’ذِي ڒخْڒَا‘ 13:33. س ؤُينِّي نسّنْ أَقَا إِسمْ وَانِيثَا إِشيَّارْ غَارْ ’جّْوَاهڒْ‘.

◘٦:٥ 6:‏5 أَمز. 8‏:‏21؛ أَيُوبْ 15‏:‏16؛ أَوڒن. 6‏:‏14؛ إِرْم. 17‏:‏9؛ مت. 15‏:‏19؛ رُوم. 3‏:‏10، 11، 12؛ 8‏:‏6.

◘٦:٩ 6:‏9 أَمز. 5‏:‏22.

◼٦:١٠ 6:‏10 ’شَامْ‘ - إِسمْ-أَ وَانِيثَا إِخْسْ أَذْ يِينِي ’إِسمْ‘. ’حَامْ‘ - إِخْسْ أَذْ يِينِي ’إِڭْوَا‘ نِيغْ ’إِحْمَا‘. ’يَافَاثْ‘ - إِسمْ وَانِيثَا إِخْسْ أَذْ يِينِي ’ونِّي إِتّْوَازدْجعْ أَطَّاسْ‘ نِيغْ ’إِنُّورزْمنْ‘.

◼٦:١٤ 6:‏14 ’ثِيزفْثْ‘ - أَوَاڒْ ’ثِيزفْثْ‘ ذِي ثْعِيبْرَانِيثْ ذَايسْ ڒمْعَانِي. إِزمَّارْ أَذْ يِينِي ’أَفذِّي‘ نِيغْ ’تَّامَانْ ن ؤُفذِّي‘. خْژَارْ ؤُف. 21:30 ؤُ ڒخْڒ. 35:32. س ؤُينِّي مَاڒَا إِتّْوَافْذِي إِجّْ بْنَاذمْ أَقَا مَانْ أَيَا إِخْسْ أَذْ يِينِي بلِّي ؤُڒَا ذ دّْنُوبْ نّسْ أَذْ إِڒِينْ تّْوَاغمْسنْ.

◼٦:١٥ 6:‏15 ’إِغَادْجنْ‘ - إِجّْ ن ؤُغِيڒْ عْڒَاينْ 50 شْمْ نِيغْ أَزْينْ ن مِيثْرُو.

◘٦:١٨ 6:‏18 1 بُط. 3‏:‏20؛ 2 بُط. 2‏:‏5.

◘٦:٢٢ 6:‏22 أَمز. 7‏:‏5؛ عبر. 11‏:‏7.