ⴰⴷⵍⵉⵙ ⵉⵇⴻⴷⴷⵙⴻⵏ ⴰⵢⵓⴱ 21

ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⵚⵓⴼⴰⵔ: ⵍⴻⴼⵍⴻⵃ ⵏ ⵡⴻⵔⵢⴰⵣ ⴰⵄⴻⴼⴼⴰⵏ

1 ⵅⴻⵏⵏⵉ ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:

2 ⵙⵍⴻⵎ ⵎⵍⵉⵃ ⵉ ⵡⴰⵡⴰⵍⴻⵏ ⵉⵏⵓ,

ⵃⵉⵎⴰ ⴰⴷ ⴰⵡⴻⵎ ⵉⵍⵉⵏ ⵉ ⵓⵙⴼⴻⵡⵡⴻⵊ.

3 ⴽⵙⵉⵎ ⴰⵢⵉ, ⵅⴻⵏⵏⵉ ⴰⴷ ⵙⵙⵉⵡⵍⴻⵖ,

ⵓ ⴰⵡⴰⵔⵏⵉ ⵍⴰⵎⵉ ⵙⵙⵉⵡⵍⴻⵖ,

ⵜⵣⴻⵎⵎⴰⵔⴻⵎ ⴰⴷ ⵜⵄⴻⴼⴼⴰⵔⴻⵎ.

4 ⵎⴰ ⴰⵛⴻⵜⵛⵉ ⵉⵏⵓ ⵅ ⵉⵊⵊ ⵏ ⴱⵏⴰⴷⴻⵎ?

ⵏⵉⵖ ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⴷⴷ-ⵉⴽⴽⴰⵔ

ⴰⴷ ⵢⵉⵍⵉ ⴱⵓⵃⴱⴻⵍ ⵉⵏⵓ ⴱⵍⴰ ⵜⵜⴰⵙⵉⵄ ⵏ ⵍⵅⴰⴹⴰⵔ?

5 ⵇⴻⵍⴱⴻⵎ-ⴷⴷ ⵖⴰⵔⵉ ⵓⵛⴰ ⵊⵄⴰⵔⴻⵎ,

ⵙⴰⵔⵙⴻⵎ ⴰⴼⵓⵙ ⵅ ⵓⵇⴻⵎⵎⵓⵎ.

6 ⵎⴰⵍⴰ ⵅⴻⵎⵎⴻⵖ ⵡⴰⵀⴰ ⴷⴻⴳ ⵓⵢⴰ, ⵜⵜⵏⴻⵅⵍⵉⵄⴻⵖ

ⵓ ⵜⵎⴻⵏⵏⴻⵄ ⵜⴰⵔⵊⵉⵊⵉⵜ ⴰⵔⵔⵉⵎⴻⵜ ⵉⵏⵓ.

7 ⵎⴰⵢⴻⵎⵎⵉ ⵜⵜⵖⵉⵎⴰⵏ ⵉⵄⴻⴼⴼⴰⵏⴻⵏ ⴷⴷⴰⵔⴻⵏ,

ⵎⴰⵢⴻⵎⵎⵉ ⴷⴷⴰⴽⴽⵡⴰⵍⴻⵏ ⵉⵡⴻⵙⵙⵓⵔⴰ,

ⵜⵜⵎⴰⵔⵏⵉⵏ ⵄⴰⴷ ⴷⵉ ⵊⵊⴻⵀⴷ ⵏⵙⴻⵏ? ◘

8 ⵜⴰⵔⵡⴰ ⵏⵙⴻⵏ ⵜⵜⵖⵉⵎⴰⵏ ⴱⴻⴷⴷⴻⵏ

ⵣⵣⴰⵜ ⵉ ⵓⵖⴻⵎⴱⵓⴱ ⵏⵙⴻⵏ, ⴰⵇⴰ ⴰⵜⴻⵏ ⵖⴰⵔⵙⴻⵏ,

ⵓ ⵉⵃⴻⵏⵊⵉⵔⴻⵏ ⵉⵖⴻⴷⴷⵓⵜⴻⵏ ⵏⵙⴻⵏ

ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ. ◼

9 ⵜⵓⴷⵔⵉⵏ ⵏⵙⴻⵏ ⴰⵇⴰ ⴰⵜⴻⵏⵜ

ⴷⵉ ⵍⴻⵀⵏⴰ ⵏⵀⵍⴰ ⴰⵏⴻⵅⵍⵉⵄ,

ⴰⵄⵎⵓⴷ ⵏ ⴰⵔⴻⴱⴱⵉ ⵡⴰⵔ ⵜⴻⵏ ⵉⵛⵛⵉⵜ.

10 ⴰⴼⵓⵏⴰⵙ ⵏⵏⴻⵙ ⵉⵜⵜⴰⵔⵔⴰ ⵓ ⵡⴰⵔ ⵉⵅⴻⵟⵟⵉ,

ⵜⴰⴼⵓⵏⴰⵙⵜ ⵏⵏⴻⵙ ⵜᵉⵜⵜⴰⵔⵓ,

ⵄⴻⵎⵎⴰⵔⵚ ⵡⴰⵔ ⵜⵖⴻⵟⵟⴻⵍ ⴰⵄⴻⴷⴷⵉⵙ.

11 ⵜⵜⴻⵊⵊⴰⵏ ⵉⵎⴻⵥⵢⴰⵏⴻⵏ ⵏⵙⴻⵏ

ⴳⴳⵓⵔⴻⵏ ⴰⵎ ⵢⵉⵛⵜ ⵏ ⵜⵃⵉⵎⴰⵔⵜ,

ⵉⵃⴻⵏⵊⵉⵔⴻⵏ ⵏⵙⴻⵏ ⵜⵜⴻⵊⵊⴰⵏ ⵜⴻⵏ ⵏⴻⴳⴳⵣⴻⵏ.

12 ⵏⵉⵜⵏⵉ ⵙⵙⴳⴻⵄⵄⴰⴷⴻⵏ ⵜⵎⵉⵊⵊⴰ ⵏⵙⴻⵏ

ⵖⴰⵔ ⵓⴱⴻⵏⴷⵉⵔ ⴷ ⵍⴳⴰⵎⴱⵔⵉ,

ⴼⴰⵔⵔⵃⴻⵏ ⵖⴰⵔ ⵜⵎⵉⵊⵊⴰ ⵏ ⵜⴻⵎⵊⴰ.

13 ⵙⵙⵄⴻⴷⴷⵓⵏ ⵓⵙⵙⴰⵏ ⵏⵙⴻⵏ ⴷⵉ ⵣⵣⵀⴰⵔ,

ⵎⴰⵛⴰ ⵀⴻⴽⴽⵡⴰⵏ ⵖⴰⵔ ⵍⴰⵅⴰⵔⵜ

ⴷⴻⴳ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ.

14 ⵇⵇⴰⵔⴻⵏ ⵉ ⴰⵔⴻⴱⴱⵉ: ‘ⵃⴻⵢⵢⴻⴷ ⵅⴰⵏⴻⵖ,

ⵎⴰⵖⴰⵔ ⵡⴰⵔ ⴷ ⴰⵏⴻⵖ ⵉⵄⵊⵉⴱ

ⴰⴷ ⵏⴻⵙⵙⴻⵏ ⵉⴱⵔⵉⴷⴻⵏ ⵏⵏⴻⵛ. ◘

15 ⵎⴰⵏ ⵡⴻⵏ ⵉⴵⴰⵏ ⴷ ⴰⵎⵣⴻⵎⵎⴰⵔ ⵅ ⴽⵓⵍⵛⵉ

ⵎⴰⵃⴻⵏⴷ ⴰⴷ ⴰⵙ ⵏⵙⴻⵅⵅⴰⵔ?

ⵎⴰⵏ ⵍⴼⴰⵢⴷⴰ ⵉ ⵖⴰⵔⵏⴻⵖ

ⵎⴰⵍⴰ ⵏⵣⵉⵢⵢⴰⵔ ⵅⴰⵙ ⵙ ⵜⵥⴰⴵⵉⵜ ⵏⵏⴻⵖ?’ ◘

16 ⵅⵣⴰⵔ, ⵣⵣⵀⴰⵔ ⵏⵙⴻⵏ ⵡⴰⵔ ⵉⴵⵉ ⴷⴻⴳ ⵓⴼⵓⵙ ⵏⵙⴻⵏ.

ⵛⵛⵡⴰⵔ ⵏ ⵉⵄⴻⴼⴼⴰⵏⴻⵏ ⵉⴳⴳⵯⴻⵊ ⵅⴰⴼⵉ. ◘

17 ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ

ⵜⵅⴻⵙⵙⵉ ⵅⴻⵏⵏⵉ ⵉ ⵉⵄⴻⴼⴼⴰⵏⴻⵏ ⵜⴼⴰⵡⵜ ⵏⵙⴻⵏ,

ⵓⵛⴰ ⵉⵍⴻⵇⵇⴻⴼ ⵉ-ⵜⴻⵏ ⵓⴹⴻⵢⵢⴻⵄ,

ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ ⵉⴱⴻⵟⵟⴰ ⵏⴻⵜⵜⴰ

ⵅⴰⵙⴻⵏ ⵍⴻⵃⵍⵉⵇ ⴷⴻⴳ ⵡⴻⵖⴹⴰⴱ ⵏⵏⴻⵙ, ◘

18 ⴰⵍⴰⵎⵉ ⵉ ⵖⴰ ⴷⴻⵡⵍⴻⵏ

ⴰⵎ ⵓⵍⵓⵎ ⵣⵣⴰⵜ ⵉ ⵓⵙⴻⵎⵎⵉⴹ,

ⴰⵎ ⵉⵖⴻⴵ ⵜⴻⵅⴹⴻⴼ ⵉ-ⵜ ⵜⵃⴰⵔⵢⴰⴹⵜ?

19 ⵎⴰ ⵜⴻⵇⵇⴰⵔⴻⵎ: ‘ⴰⵔⴻⴱⴱⵉ ⵉⵜⵜⵅⴻⵎⵎⴻⵍ ⵍⵄⵉⵇⴰⴱ

ⵉ ⵍⵎⵓⵄⵚⵉⵢⵢⴻⵜ ⵏⵏⴻⵙ ⵉ ⵉⵃⴻⵏⵊⵉⵔⴻⵏ ⵏⵏⴻⵙ!’

ⴻⵊⵊ ⵉ-ⵜ ⴰⴷ ⴰⵙ ⵜⵜ ⵉⵅⴻⴵⴻⵚ

ⴰⵍ ⵖⴰ ⵢⴰⵛⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ!

20 ⴻⵊⵊ ⵜⵉⵟⵟⴰⵡⵉⵏ ⵏⵏⴻⵙ

ⴰⴷ ⵥⴰⵔⴻⵏⵜ ⴰⵀⴻⵍⵍⴻⴽ ⵏⵏⴻⵙ,

ⴻⵊⵊ ⵉ-ⵜ ⴰⴷ ⵉⵙⵓ ⵙ ⵢⵉⵅⴻⴼ ⵏⵏⴻⵛ

ⵣⴻⴳ ⵡⴻⵙⵄⴰⵔ ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ.

21 ⵎⴰⵖⴰⵔ ⵎⴰⵎⵎⴻⵛ ⵉ ⵖⴰ ⵢⴰⵔⴹⴰ ⵄⴰⴷ

ⴷⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ

ⴰⵡⴰⵔⵏⵉ ⵉ ⵍⵎⴻⵡⵜ ⵏⵏⴻⵙ,

ⵎⴰⵍⴰ ⵜᵉⵜⵜⵡⴰⴳⴳ ⵄⴰⴷ ⵇⴻⴷⴷⴰ ⵏ ⵉⵢⵓⵔⴻⵏ ⵏⵏⴻⵙ? ◼

22 ⵎⴰ ⵣⴻⵎⵎⴰⵔⴻⵏ ⴰⴷ ⵙⵙⵍⴻⵎⴷⴻⵏ

ⵜⵓⵙⵙⵏⴰ ⵉ ⴰⵔⴻⴱⴱⵉ,

ⵡⴻⵏⵏⵉ ⵉⵃⴻⴽⴽⵎⴻⵏ

ⵅ ⵢⵉⵏⵏⵉ ⵉⴵⴰⵏ ⴷⴻⴳ ⵓⵊⴻⵏⵏⴰ ⵢⵓⵄⵍⴰⵏ? ◘

23 ⴰⵇⴰ ⴷⵉⵏ ⵉⵊⵊⴻⵏ ⵉⵎⵎⵓⵜ ⴷⵉ ⵣⵣⵀⴰⵔ ⵉⵎⵓⵏ,

ⴰⵎ ⵉⴷⴷⴰⵔ ⵄⴰⴷ ⵇⴰⵄ ⴷⵉ ⵍⴻⵀⵏⴰ ⵓ ⴷⵉ ⵍⵀⵓⴷⵏⴻⵜ.

24 ⴰⵎ ⵄⴻⵎⵎⴰⵔⴻⵏ ⵍⴻⵎⴷⴰⵡⴻⴷ ⵏⵏⴻⵙ ⵙ ⵓⵖⵉ

ⵓ ⵉⵜⵜⵡⴰⴱⴻⵣⵣⴻⴳ ⵡⴰⴷⵓⴼ ⵏ ⵢⴻⵖⵙⴰⵏ ⵏⵏⴻⵙ.

25 ⵡⴻⵏⵏⴻⵖⵏⵉ ⵉⵎⵎⵓⵜ ⵙ ⵍⴻⵄⵎⴰⵔ ⴷ ⴰⵎⴰⵔⵣⴰⴳ,

ⵡⴰⵔ ⴷⴷ-ⵢⵉⵡⵉ ⵍⵉⵇⵇⵉ ⵉ ⵡⴰⵍⵓ ⵏ ⵍⵅⴰⵔ.

26 ⵎⵓⵏⴻⵏ ⵣⵣⵍⴻⵏ ⵏⵉⵜⵏⵉ ⴷⴻⴳ ⵓⵛⴰⵍ

ⵓ ⵉⴽⴻⵛⵛⴰⵡⴻⵏ ⴷⵍⵉⵏ ⵜⴻⵏ. ◘

27 ⵅⵣⴰⵔ, ⵙⵙⵏⴻⵖ ⵉⵅⴰⵔⵔⵉⵚⴻⵏ ⵏⵡⴻⵎ,

ⵓⵍⴰ ⴷ ⵜⵉⵎⴻⵄⵎⴰⵍⵜ ⵏⵏⵉ ⵣⵉ ⴷ ⴰⵢⵉ ⵜⴷⴻⵍⵎⴻⵎ,

28 ⵅⵎⵉ ⵜⴻⵇⵇⴰⵔⴻⵎ:

‘ⵎⴰⵏⵉ ⵜⴻⴵⴰ ⵜⴰⴷⴷⴰⵔⵜ ⵏ ⵓⵎⵛⴻⵏⵏⴻⵄ

ⵉⵜⵜⵎⴻⵥⵔⵉⵏ ⴷⵉ ⵚⵚⵓⵍⵟⴰ,

ⵎⴰⵏⵉ ⵜⴻⴵⴰ ⵜⵇⵉⴹⵓⵏⵜ ⵙ ⵜⵣⴻⴷⴷⵉⵖⵉⵏ,

ⵜⴰⵣⴻⴷⴷⵉⵖⵜ ⵏ ⵓⵄⴻⴼⴼⴰⵏ?’

29 ⵎⴰ ⵄⴻⵎⵎⴰⵔⵚ ⵡⴰⵔ ⵜⴻⵙⵙⴻⵇⵙⵉⵎ ⵉⵎⵙⴻⴱⵔⵉⴷⴻⵏ?

ⴰⵇⴰ ⵉⵛⴻⵢⵢⴰⵔⴻⵏ ⵏⵙⴻⵏ ⵉⵜⵜⵇⴰⵔⵔⴰⵏ

ⵡⴰⵔ ⵜⵣⴻⵎⵎⴰⵔⴻⵎ ⴰⴷ ⵜⴻⵏ ⵜⴻⵏⴽⴰⵔⴻⵎ:

30 ⵎⴰⵖⴰⵔ ⴰⵄⴻⴼⴼⴰⵏ ⴰⴷ ⵉⵜⵜⵡⴰⵃⴹⴰ

ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ,

ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵣ ⵏ ⵓⴼⵓⴳⴻⵎ

ⴰⴷ ⵜⵜⵡⴰⵡⵢⴻⵏ ⵏⵉⵜⵏⵉ ⴷⵉ ⵍⴰⵎⴰⵏ. ◘

31 ⵎⴰⵏ ⵡⴻⵏ ⵉ ⵜ ⵖⴰ ⵉⵙⵙⴻⵛⵏⴻⵏ ⴰⴱⵔⵉⴷ ⵏⵏⴻⵙ

ⴷⴻⴳ ⵓⵖⴻⵎⴱⵓⴱ ⵏⵏⴻⵙ?

ⵎⴰⵍⴰ ⵉⴳⴳⴰ ⵛⴰ ⵏ ⵜⵓⵄⴻⴼⴼⵏⴰ,

ⵡⵉ ⵜ ⵉ ⵖⴰ ⵉⵅⴻⴵⵚⴻⵏ?

32 ⵏⴻⵜⵜⴰ ⵎⴰⵛⴰ ⴰⴷ ⵉⵜⵜⵡⴰⴽⵙⵉ

ⵖⴰⵔ ⵡⴻⵏⴹⴻⵍ ⵏⵏⴻⵙ ⴷ ⴰⵎⴻⵇⵇⵔⴰⵏ

ⵓ ⵖⴰⵔ ⵜⴻⵡⵔⵉⵔⵜ ⵏ ⵡⴻⵏⴹⴻⵍ ⵏⵏⴻⵙ

ⵉⵜⵜⵄⴻⵙⵙ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ.

33 ⵜⵜⵄⴻⵊⵉⴱⴻⵏ ⴰⵙ ⵉⴱⵓⵔⵙⴰ ⵏ ⵜⴻⵖⵣⵓⵔⵜ,

ⴹⴻⴼⴼⴰⵔⴻⵏ ⵜ ⵎⴰⵔⵔⴰ ⵉⵡⴷⴰⵏ

ⵓ ⵉⵏⵏⵉ ⴷ ⴰⵙ ⵉⵜⵜⵉⵣⵡⴰⵔⴻⵏ,

ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⴻⵏ ⵃⴻⵙⴱⴻⵏ.

34 ⵎⴰⵎⵎⴻⵛ ⵜⴻⵅⵙⴻⵎ ⴰⴷ ⴰⵢⵉ ⵜⵄⴻⵣⵣⴰⵎ

ⵙ ⵡⴰⵡⴰⵍⴻⵏ ⵉⵅⵡⴰⵏ?

ⵣⵉ ⵜⴻⵎⵡⴰⵔⵔⵉⵜ ⵏⵡⴻⵎ ⵡⴰⵔ ⵉⵜⵜⵖⵉⵎⵉ ⵡⴰⵍⵓ

ⵎⵖⵉⵔ ⵍⴻⵖⴹⴰⵔ ⵡⴰⵀⴰ.

◘21:7 21:7 ⵉⵥⵀⴷ. 17:10; 73:12; ⵉⵔⵎ. 12:1; ⵃⴰⴱ. 1:16

◼21:8 21:8 ⵜⴰⵔⵡⴰ-ⵙ ⵜⵄⵉⴱⵔⴰⵏⵉⵜ ‘ⵥⵥⴰⵔⵉⵄⴻⵜ’.

◘21:14 21:14 ⴰⵢⵓⴱ 22:17

◘21:15 21:15 ⵓⴼ. 5:2; ⵎⴰⵍ. 3:14

◘21:16 21:16 ⴰⵢⵓⴱ 22:18

◘21:17 21:17 ⴰⵢⵓⴱ 20:29; ⵉⵥⵀⴷ. 11:6, 7

◼21:21 21:21 ⴰⵡⴰⵔⵏⵉ ⵉ ⵍⵎⴻⵡⵜ ⵏⵏⴻⵙ-ⵙ ⵜⵄⵉⴱⵔⴰⵏⵉⵜ ‘ⴰⵡⴰⵔⵏⵉ ⴰⵙ’.

◘21:22 21:22 ⵉⵛⴰ. 40:13; ⵔⵓⵎ. 11:34; 1 ⴽⵓⵔ. 2:16

◘21:26 21:26 ⴰⵢⵓⴱ 17:14

◘21:30 21:30 ⴰⵡⵍⵏ. 16:4