ⴰⴷⵍⵉⵙ ⵉⵇⴻⴷⴷⵙⴻⵏ ⴰⵡⴰⵍⴻⵏ ⵉⵡⴻⵥⵏⴻⵏ 16

1 ⴱⵏⴰⴷⴻⵎ ⵖⴰⵔⴻⵙ ⵉⵅⴰⵔⵔⵉⵚⴻⵏ

ⴷⴻⴳ ⵡⵓⵍ ⵏⵏⴻⵙ,

ⵎⴰⵛⴰ ⵜⴰⵎⵡⴰⵔⵔⵉⵜ ⵏ ⵢⵉⵍⴻⵙ

ⵜᵉⵜⵜⴰⵙ-ⴷⴷ ⵣⵉ ⵙⵉⴷⵉ. ◘

2 ⵎⴰⵔⵔⴰ ⵉⴱⵔⵉⴷⴻⵏ ⵏ ⵡⴻⵔⵢⴰⵣ

ⵚⴼⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,

ⵎⴰⵛⴰ ⵙⵉⴷⵉ ⵉⵜⵜⵇⴻⴵⴰⴱ ⴱⵓⵃⴱⴻⵍⴰⵜ. ◘

3 ⵙⴰⵔⵙ ⵍⴻⵅⴷⴰⵢⴻⵎ ⵏⵏⴻⵛ ⵉ ⵙⵉⴷⵉ,

ⵅⴻⵏⵏⵉ ⴰⴷ ⵜⵜⵡⴰⵙⵙⵎⴻⵜⵜⵏⴻⵏ ⵉⵏⵡⴰⵢⴻⵏ ⵏⵏⴻⵛ. ◘

4 ⵙⵉⴷⵉ ⵉⵅⵍⴻⵇ-ⴷⴷ ⵎⴰⵔⵔⴰ ⵉ ⵍⵖⴰⵔⴰⴹ ⵏⵏⴻⵙ,

ⵄⴰⴷ ⵓⵍⴰ ⴷ ⴰⵄⴻⴼⴼⴰⵏ ⵉⴳⴳⴰ ⵉ-ⵜ ⵉ ⵡⴰⵙⵙ ⵏ ⵍⵖⴰⵔ.◘

5 ⴽⵓⵍ ⴰⵎⵄⴻⴼⴼⴰⵔ ⴷ ⵏⵏⵄⵉ ⵉ ⵙⵉⴷⵉ, ⴰⴼⵓⵙ ⵅⴰⵙ,

ⵏⴻⵜⵜⴰ ⵡⴰⵔ ⵉⵜⵜᵉⵜⵜⵡⴰⴱⴰⵔⵔⵉ ⵄⴻⵎⵎⴰⵔⵚ. ◘

6 ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ

ⴰⴷ ⵉⵜⵜⵡⴰⵙⵙⴻⵚⵍⴻⵃ ⵅ ⵍⵖⴻⵛⵛ,

ⵓ ⵙ ⵜⵉⴳⴳⵯⵓⴷⵉ ⵏ ⵙⵉⴷⵉ

ⵉⵜⵜⵃⴻⵢⵢⴰⴷ ⵡⴻⵔⵢⴰⵣ ⵅ ⵍⵖⴰⵔ.

7 ⵎⴰⵍⴰ ⵓⵙⵉⵏ-ⴷⴷ ⵉⴱⵔⵉⴷⴻⵏ ⵏ ⵉⵊⵊ ⵏ ⵡⴻⵔⵢⴰⵣ

ⵅ ⵍⵅⴰⴹⴰⵔ ⵏ ⵙⵉⴷⵉ,

ⴰⴷ ⵢⴰⵔⵔ ⵏⴻⵜⵜⴰ ⵓⵍⴰ ⴷ ⵍⵄⴻⴷⵢⴰⵏ ⵏⵏⴻⵙ

ⴰⴷ ⴽⵉⴷⴻⵙ ⴳⴳⴻⵏ ⵍⴻⵀⵏⴰ.

8 ⵉⵃⵔⴰ ⴷⵔⵓⵙ ⴰⴽ-ⴷ ⵜⵙⴻⴳⴷⴰ

ⵅ ⵡⴰⵟⵟⴰⵙ ⵏ ⵍⵖⵉⴵⴻⵜ ⴱⵍⴰ ⵍⵃⴻⵇⵇ. ◘

9 ⵓⵍ ⵏ ⴱⵏⴰⴷⴻⵎ ⵉⵜⵜⵅⴰⵔⵔⴻⵚ ⴰⴱⵔⵉⴷ ⵏⵏⴻⵙ,

ⵎⴰⵛⴰ ⵙⵉⴷⵉ ⵉⵏⴻⴷⴷⴻⵀ ⵉⵚⵓⵔⴰⴼ ⵏⵏⴻⵙ. ◼

10 ⵍⵃⵓⴽⵎ ⴱⵍⴰ ⴰⴷⵡⴰⵍ ⵅ ⵉⵢⴻⵏⵛⵉⵛⴻⵏ ⵏ ⵓⵊⴻⴵⵉⴷ,

ⴰⵇⴻⵎⵎⵓⵎ ⵏⵏⴻⵙ ⵡⴰⵔ ⵉⵅⴻⵟⵟⵉ ⴷⴻⴳ ⵡⴻⵃⴽⴰⵎ.

11 ⵍⵎⵉⵣⴰⵏ ⵏⵉⵛⴰⵏ ⴷ ⵟⵟⴰⵡⵢⴰⵜ ⵏ ⵍⵎⵉⵣⴰⵏ ⵏⵉⵛⴰⵏ

ⴰⵇⴰ ⴰⵜⴻⵏ ⵏ ⵙⵉⴷⵉ,

ⵎⴰⵔⵔⴰ ⵉⵥⵔⴰ ⵏ ⵍⴻⵡⵣⴻⵏ ⴷⵉ ⵜⴻⵛⵢⴰⵔⵜ

ⴷ ⵍⵅⴻⴷⵎⴻⵜ ⵏⵏⴻⵙ. ◘

12 ⴷ ⵏⵏⵄⵉ ⵉ ⵉⵊⴻⴵⵉⴷⴻⵏ ⵅⵎⵉ ⵖⴰ ⴳⴳⴻⵏ ⵍⵖⴰⵔ,

ⵎⴰⵖⴰⵔ ⵍⵄⴰⵔⵛ ⵉⵜⵜⵡⴰⵙⵙⴻⵎⵜⴻⵏ ⵣⵉ ⵜⵙⴻⴳⴷⴰ.

13 ⵉⵢⴻⵏⵛⵉⵛⴻⵏ ⵉ ⵉⵛⵛⵓⵔⴻⵏ ⵙ ⵜⵙⴻⴳⴷⴰ

ⵜⵜⴻⵄⵊⵉⴱⴻⵏ ⵉ ⵓⵊⴻⴵⵉⴷ,

ⵓ ⵡⴻⵏⵏⵉ ⵉⵙⵙⴰⵡⴰⵍⴻⵏ ⵏⵉⵛⴰⵏ, ⵉⵜⵜⴻⵅⵙ ⵉ-ⵜ ⵏⴻⵜⵜⴰ.

14 ⴰⵙⵄⴰⵔ ⵏ ⵓⵊⴻⴵⵉⴷ ⴰⵎ ⵍⵎⴰⵍⴰⴽⴰⵜ ⵏ ⵍⵎⴻⵡⵜ,

ⵎⴰⵛⴰ ⴰⵔⵢⴰⵣ ⴰⵎⵉⵖⵉⵙ ⵉⵣⴻⵎⵎⴰⵔ

ⴰⴷ ⵖⴰⵔⴻⵙ ⵜⵜ ⵉ-ⴷⴷ ⵢⴰⵔⵔ. ◘

15 ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵉⵜⵜⵉⵙⵙⵉⵇⴻⵏ ⵏ ⵓⵊⴻⴵⵉⴷ

ⵜⴻⴵⴰ ⵜⵓⴷⴰⵔⵜ,

ⴰⵔⴹⴰ ⵏⵏⴻⵙ ⴰⵎ ⵓⵙⴻⵢⵏⵓ ⵏ ⵡⴻⵏⵥⴰⵔ

ⴷⵉ ⵜⴻⴼⵙⵓⵜ. ◘

16 ⴰⵇⴰ ⵜⴻⵃⵍⴰ ⵜⴰⵔⴻⵣⵣⵓⵜ ⵏ ⵜⵉⵖⵉⵜ

ⵅ ⵡⵓⵔⴻⵖ ⵉⵜⵜⵉⵙⵙⵉⵇⴻⵏ,

ⵓ ⵎⴻⵛⵃⴰⵍ ⴽⵜⴰⵔ ⴰⴷ ⵜⵉⵍⵉ ⵜⵡⴰⴼⵉⵜ ⵏ ⵍⴻⴼⵀⴰⵎⴻⵜ

ⵙⴻⵏⵏⴻⵊ ⵅ ⵜⵡⴰⴼⵉⵜ ⵏ ⵏⵏⵓⵇⴰⵔⵜ. ◘

17 ⴰⴱⵔⵉⴷ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ

ⵉⵜⵜⵃⴻⵢⵢⴰⴷ ⵅ ⵍⵖⴰⵔ.

ⵡⴻⵏⵏⵉ ⵉⵃⴻⵟⵟⴰⵏ ⴰⴱⵔⵉⴷ ⵏⵏⴻⵙ,

ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ.

18 ⵜⴰⵏⴻⴼⵙⴻⵛⵜ ⵜᵉⵜⵜⵉⵣⵡⴰⵔ-ⴷⴷ ⵉ ⴰⵔⵥⵥⵉⵢⵢⴻⵜ,

ⵓ ⵏⵏⴼⴰⵅⴻⵜ ⵜᵉⵜⵜⴰⵙ-ⴷⴷ ⵇⴱⴻⵍ ⵉ ⵓⵡⴻⵟⵟⵓ. ◘

19 ⵉⵃⵍⴰ ⴰⵇⵏⴰⵄ ⵏ ⴱⵓⵃⴱⴻⵍ

ⴰⴽ-ⴷ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ,

ⵅ ⵓⴱⴻⵟⵟⵓ ⵏ ⵜⴽⴻⵛⵛⴰⴹⵜ ⴰⴽ-ⴷ ⴰⵢⵜ-ⵏⵏⴼⴰⵅⴻⵜ.

20 ⵡⴻⵏⵏⵉ ⵉⵜⵜⵅⴰⵔⵔⴰⵚⴻⵏ ⵎⵍⵉⵃ

ⴷⵉ ⵛⴰ ⵏ ⵜⵎⴻⵙⵍⴰⵛⵜ, ⴰⴷ ⵢⴰⴼ ⵍⵅⴰⵔ,

ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵙⵉⴷⵉ.◘

21 ⵡⴻⵏⵏⵉ ⵖⴰⵔ ⵉⴵⴰ ⵡⵓⵍ ⴷ ⴰⵎⵉⵖⵉⵙ,

ⴰⴷ ⵜ ⵙⴻⵎⵎⴰⵏ ⴱⵓ-ⵡⴻⴼⵜⴰⵏ,

ⵓ ⵜⴰⵥⵢⵓⴷⵉ ⵏ ⵍⵀⴰⵔⴷ ⵏ ⵉⵢⴻⵏⵛⵉⵛⴻⵏ

ⵜⴰⵔⴻⵏⵏⵉ ⴷⵉ ⵍⴻⴼⵀⴰⵎⴻⵜ.

22 ⵍⴻⵄⵇⴻⵍ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ ⵉ ⴱⴰⴱ ⵏⵏⴻⵙ,

ⵎⴰⵛⴰ ⵜⵜⴰⵔⴱⵉⵢⵢⴻⵜ ⵉ ⵉⴱⵓⵀⴰⵍⵉⵢⵢⴻⵏ

ⴷ ⵜⵓⴱⴱⵓⵀⴻⵍⵢⴰ ⵡⴰⵀⴰ.◘

23 ⵓⵍ ⵏ ⵓⵎⵉⵖⵉⵙ ⵉⵜⵜⴰⵔⵔⴰ ⴰⵇⴻⵎⵎⵓⵎ ⵏⵏⴻⵙ ⵉⴼⴻⵀⵀⴻⵎ,

ⵣⴻⴳ ⵉⵢⴻⵏⵛⵉⵛⴻⵏ ⵏⵏⴻⵙ ⴰⴷ ⴼⴻⵀⵎⴻⵏ ⴽⵜⴰⵔ.

24 ⴰⵡⴰⵍⴻⵏ ⵉⵛⴻⵡⵡⴰⵔⴻⵏ

ⴳⴳⵉⵏ ⴰⵎ ⵜⴰⵎⵎⴻⵏⵜ ⵏ ⵜⴻⵖⵔⴰⵙⵜ,

ⴰⵇⴰ ⴰⵜⴻⵏ ⴷ ⵉⵎⵉⵥⵉⴷⴻⵏ ⵉ ⵍⴻⵄⵎⴰⵔ

ⴷ ⵓⴳⴻⵏⴼⵓ ⵉ ⵢⴻⵖⵙⴰⵏ.

25 ⴰⴷ ⵜⴰⵖ ⵉⵜⵜⵖⵉⵍ ⴰⵙ ⵉ ⵛⴰ ⵏ ⵢⵉⵊⵊⴻⵏ

ⴰⵇⴰ ⴰⴱⵔⵉⴷ ⵏⵏⴻⵙ ⵏⵉⵛⴰⵏ,

ⵎⴰⵛⴰ ⴰⵏⴻⴳⴳⴰⵔ ⵏⵏⴻⵙ ⵎⵖⵉⵔ ⵉⴱⵔⵉⴷⴻⵏ

ⵉⵜⵜⴰⵡⵢⴻⵏ ⵖⴰⵔ ⵍⵎⴻⵡⵜ. ◘

26 ⵍⴰⵥ ⵏ ⵓⵛⴻⵡⵡⴰⵍ ⵉⵅⴻⴷⴷⴻⵎ ⴰⵙ ⵉ ⵏⴻⵜⵜⴰ,

ⵎⴰⵖⴰⵔ ⴰⵇⴻⵎⵎⵓⵎ ⵏⵏⴻⵙ ⵉⵏⴻⴷⴷⴻⵀ ⵉ-ⵜ.

27 ⴰⵔⵢⴰⵣ ⵉ ⵡⴰⵔ ⵉⵙⴻⴽⴽⵡⵉⵏ ⵉⵖⴻⵣⵣⴰ ⵍⵖⴰⵔ,

ⵅ ⵉⵢⴻⵏⵛⵉⵛⴻⵏ ⵏⵏⴻⵙ

ⴰⵎ ⵢⵉⵛⵜ ⵏ ⵜⵎⴻⵙⵙⵉ ⵉⵜⵜⵛⴻⵄⵄⴰⵍⴻⵏ. ◘

28 ⴰⵔⵢⴰⵣ ⵉⵛⵛⵓⵔⴻⵏ ⵙ ⵍⴻⵅⴷⴰⵄⴰⵜ

ⵉⵙⵙⴻⴽⴽⴰⵔⴰ ⴰⵎⴻⵏⵖⵉ,

ⵓ ⴰⵅⴱⴰⵔⵊⵉ ⵉⵜⵜⴰⵡⵉ-ⴷⴷ ⵄⴰⴷ ⴰⴱⴻⵟⵟⵓ

ⴰⴽ-ⴷ ⵓⵎⴻⴷⴷⵓⴽⴽⴻⵍ ⵉⵚⴻⴱⵃⴻⵏ ⴰⵟⵟⴰⵙ. ◘

29 ⴰⵔⵢⴰⵣ ⴱⵓ-ⵍⴻⵅⵛⵓⵏⴻⵜ ⵉⵜⵜⵖⴰⵔⵔⴰ ⵊⵊⴰⵔ ⵏⵏⴻⵙ,

ⵉⵏⴻⴷⴷⴻⵀ ⵉ-ⵜ ⵖⴰⵔ ⵉⵊⵊ ⵏ ⵡⴻⴱⵔⵉⴷ

ⵉ ⵡⴰⵔ ⵉⴵⵉⵏ ⵎⵍⵉⵃ.

30 ⵏⴻⵜⵜⴰ ⵉⵜⵜⴻⵇⵇⴻⵏ ⵜⵉⵟⵟⴰⵡⵉⵏ ⵏⵏⴻⵙ

ⵎⴰⵃⴻⵏⴷ ⴰⴷ ⵉⵅⴰⵔⵔⴻⵚ

ⵎⴰⵔⵔⴰ ⴷⴷⴰⵔⴱⴰⵜ ⵏ ⵍⴻⵅⴷⴰⵄⴻⵜ,

ⵉⵜⵜⴽⴻⵎⵎⴻⵛ ⵉⵢⴻⵏⵛⵉⵛⴻⵏ ⵏⵏⴻⵙ,

ⴰⵇⴰ ⴷⴰ ⵉⴳⴳⴰ ⵍⵖⴰⵔ. ◘

31 ⴰⵛⵓⵡⵡⴰⴼ ⵉⵛⴰⴱⴻⵏ ⴷ ⵉⵊⵊ ⵏ ⵜⵜⴰⵊ ⵉⵣⴻⵡⵡⵇⴻⵏ,

ⵜⵣⴻⵎⵎⴰⵔⴻⴷ ⴰⴷ ⵜⵜ ⵜⴰⴼⴻⴷ ⵅ ⵡⴻⴱⵔⵉⴷ ⵏ ⵜⵙⴻⴳⴷⴰ.

32 ⵉⵃⵍⴰ ⴱⵓ-ⵜⵜⴰⵙⵉⵄ ⵏ ⵍⵅⴰⴹⴰⵔ

ⵅ ⵉⵊⵊ ⵏ ⵡⴻⵔⵢⴰⵣ ⵉⵊⴻⵀⴷⴻⵏ

ⵓ ⵡⴻⵏⵏⵉ ⵉⵜⵜⴻⴱⴱⴰⵜⴻⵏ ⴱⵓⵃⴱⴻⵍ ⵏⵏⴻⵙ ⵉⵃⵍⴰ

ⵅ ⵡⴻⵏⵏⵉ ⵉⵃⴻⵡⵡⵙⴻⵏ ⵉⵛⵜ ⵏ ⵜⴻⵏⴷⵉⵏⵜ.

33 ⵜⴰⵇⴻⴷⴷⵓⵃⵜ ⵜⴻⵎⵎⴻⵏⴹⴰⵔ ⴷⴻⴳ ⵡⴻⵃⵙⵉⵏ,

ⵎⴰⵛⴰ ⵎⴽⵓⵍ ⴰⵔⵔⴰⵢ ⵉⵜⵜⴰⵙ-ⴷⴷ ⵣⵉ ⵙⵉⴷⵉ.

◘16:1 16:1 ⴰⵡⵍⵏ. 16:1; 19:21; 20:24; ⵉⵔⵎ. 10:23

◘16:2 16:2 ⴰⵡⵍⵏ. 21:2

◘16:3 16:3 ⵉⵥⵀⴷ. 37:5; 55:23; ⵎⵜ. 6:25; ⵍⴽ. 12:22; 1 ⴱⵟ. 5:7

◘16:4 16:4 ⴰⵢⵓⴱ 21:30

◘16:5 16:5 ⴰⵡⵍⵏ. 6:17; 8:13; 11:21

◘16:8 16:8 ⵉⵥⵀⴷ. 37:16; ⴰⵡⵍⵏ. 15:16

◼16:9 16:9 ⵉⵚⵓⵔⴰⴼ-ⵙ ⵜⵄⵉⴱⵔⴰⵏⵉⵜ ‘ⴰⵚⵓⵔⵉⴼ’.

◘16:11 16:11 ⵍⴰⵡⵉ 19:36; ⴰⵄⵡⴷ. 25:13-16; ⴰⵡⵍⵏ. 11:1; 20:10, 23

◘16:14 16:14 ⴰⵡⵍⵏ. 19:12; 20:2

◘16:15 16:15 ⴰⵡⵍⵏ. 19:12

◘16:16 16:16 ⴰⵢⵓⴱ 28:15; ⵉⵥⵀⴷ. 19:11; 119:72; ⴰⵡⵍⵏ. 3:14, 15; 8:11, 19

◘16:18 16:18 ⴰⵡⵍⵏ. 11:2; 17:19

◘16:20 16:20 ⵉⵥⵀⴷ. 2:12; 34:9; 125:1; ⵉⵛⴰ. 30:18; ⵉⵔⵎ. 17:7

◘16:22 16:22 ⴰⵡⵍⵏ. 13:14

◘16:25 16:25 ⴰⵡⵍⵏ. 14:12

◘16:27 16:27 ⴰⵡⵍⵏ. 12:18

◘16:28 16:28 ⴰⵡⵍⵏ. 15:18; 26:21; 29:22

◘16:30 16:30 ⴰⵡⵍⵏ. 6:13, 14