ⴰⴷⵍⵉⵙ ⵉⵇⴻⴷⴷⵙⴻⵏ ⴰⵡⴰⵍⴻⵏ ⵉⵡⴻⵥⵏⴻⵏ 13

ⴰⵡⴰⵍⴻⵏ ⵉⵡⴻⵣⵣⵏⴻⵏ ⵏ ⵙⵓⵍⵉⵎⴰⵏ - ⵜⴰⵙⵖⴰⵔⵜ 1ⴱ

1 ⵉⵊⵊ ⵏ ⵎⵎⵉⵙ ⴷ ⴰⵎⵉⵖⵉⵙ

ⴷ ⵚⵚⵉⴼⴻⵜ ⵏ ⵓⵡⴻⴱⴱⴻⵅ ⵏ ⴱⴰⴱⴰⵙ,

ⵎⴰⵛⴰ ⴰⵎⴻⵙⵜⴻⵀⵣⵉⵢ

ⵡⴰⵔ ⵉⵜⵜⴻⵙⵍⵉ ⵖⴰⵔ ⵓⵜⴻⵅⵜⵉⵅ.

2 ⵣⵉ ⵍⵖⵉⴵⴻⵜ ⵏ ⵡⴰⵡⴰⵍⴻⵏ ⵏⵏⴻⵙ

ⴰⴷ ⵢⴻⵛⵛ ⴱⵏⴰⴷⴻⵎ ⵍⵅⴰⵔ,

ⵎⴰⵛⴰ ⵍⴻⵄⵎⴰⵔ ⵏ ⵉⵖⴻⴷⴷⴰⵔⴻⵏ

ⴰⴷ ⵢⴻⵛⵛ ⵍⵄⵓⵏⴼ. ◘

3 ⵡⴻⵏⵏⵉ ⵢⴻⵙⵙⴰⵔⴻⵏ ⴰⵇⴻⵎⵎⵓⵎ ⵏⵏⴻⵙ,

ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ,

ⵎⴰⵛⴰ ⵡⴻⵏⵏⵉ ⵢⴰⵔⴻⵣⵣⵎⴻⵏ

ⵉⵢⴻⵏⵛⵉⵛⴻⵏ ⵏⵏⴻⵙ ⴰⵟⵟⴰⵙ,

ⵉⵜⵜⵔⴰⵊⴰ ⵜ ⵓⵀⴻⵍⵍⴻⴽ.

4 ⵍⴻⵄⵎⴰⵔ ⵏ ⵓⵎⴻⵄⴳⵓⵣ ⵢⴰⵔⵊⴻⴼ,

ⵡⴰⵅⵅⴰ ⴰⵢⴰ ⵡⴰⵔ ⵉⵏⴻⴼⴼⴻⵄ ⴷⵉ ⵡⴰⵍⵓ,

ⵎⴰⵛⴰ ⵍⴻⵄⵎⴰⵔ ⵏ ⵢⵉⵏⵏⵉ ⵉⵜⵜⵛⴻⵟⵟⴰⵔⴻⵏ

ⴰⴷ ⵉⵜⵜⵡⴰⵙⵙⵊⵉⵡⵏⴻⵏ.

5 ⴰⵡⴰⵍⴻⵏ ⵏ ⵉⵅⴰⵔⵔⵉⵇⴻⵏ

ⵉⵛⴰⵔⵔⴻⵀ ⵉ-ⵜⴻⵏ ⵓⵎⵙⴻⴳⴳⴻⴷ,

ⵎⴰⵛⴰ ⴰⵄⴻⴼⴼⴰⵏ ⵉⵙⵙⴰⵔⵣⴰⴳ ⵉⵅⴻⴼ ⵏⵏⴻⵙ

ⵓ ⵉⵙⵙⴼⴻⵟⵟⴰⵃ ⵉⵏⵏⴻⵖⵏⵉ.

6 ⵜⴰⵙⴻⴳⴷⴰ ⵜⵃⴻⵟⵟⴰ

ⵡⴻⵏⵏⵉ ⵉⴳⴳⵓⵔⴻⵏ ⴰⴱⵔⵉⴷ ⵏⵏⴻⵙ ⵏⵉⵛⴰⵏ,

ⵎⴰⵛⴰ ⵜⵓⵄⴻⴼⴼⵏⴰ ⴰⴷ ⵜ ⵉⵙⵙⵀⴻⵍⵍⴻⴽ ⴰⵎⴻⴷⵏⵓⴱ. ◘

7 ⴰⵇⴰ ⴷⵉⵏ ⵉⵏⵏⵉ ⵉⵜⵜⴰⵔⵔⴰⵏ ⵉⵅⴻⴼ ⵏⵙⴻⵏ

ⴷ ⴱⵓ-ⵡⴰⴳⵍⴰ, ⵡⴰⵅⵅⴰ ⵡⴰⵔ ⵖⴰⵔⵙⴻⵏ ⵡⴰⵍⵓ,

ⵓ ⴰⵇⴰ ⴷⵉⵏ ⵉⵏⵏⵉ ⵉⵜⵜⴰⵔⵔⴰⵏ ⵉⵅⴻⴼ ⵏⵙⴻⵏ

ⴷ ⵉⵎⴻⵣⵍⴰⴹ, ⵡⴰⵅⵅⴰ ⵖⴰⵔⵙⴻⵏ ⴰⵟⵟⴰⵙ. ◘

8 ⴷⴷⴻⵢⵢⴻⵜ ⵉ ⵍⴻⵄⵎⴰⵔ ⵏ ⵛⴰ ⵏ ⵢⵉⵊⵊⴻⵏ

ⴷ ⴰⴳⵍⴰ ⵏⵏⴻⵙ,

ⵎⴰⵛⴰ ⴰⵎⴻⵣⵍⵓⴹ ⵡⴰⵔ ⵉⵜⵜⴻⵙⵍⵉ ⵛⴰ

ⵓⵍⴰ ⴷ ⵉⵊⵊ ⵏ ⵓⵀⵓⴷⴷⵉ.

9 ⵜⴰⴼⴰⵡⵜ ⵏ ⵉⵎⵙⴻⴳⴳⴰⴷⴻⵏ ⴰⴷ ⵜⴰⵔⵖ ⵙ ⵍⴻⴼⵔⴰⵃⴻⵜ,

ⵎⴰⵛⴰ ⵍⴻⴼⵏⴰⵔ ⵏ ⵉⵄⴻⴼⴼⴰⵏⴻⵏ ⴰⴷ ⵉⵅⵙⵉ. ◘

10 ⵣⵉ ⵜⵏⴻⴼⵙⴻⵛⵜ ⵉⵜⵜⴰⵙ-ⴷⴷ ⵎⵖⵉⵔ ⵓⵎⴻⵏⵖⵉ,

ⵎⴰⵛⴰ ⵉⵏⵏⵉ ⵉⴽⴻⵙⵙⵉⵏ ⴰⵛⴰⵡⴰⵔ, ⵖⴰⵔⵙⴻⵏ ⵜⵉⵖⵉⵜ.

11 ⴰⴳⵍⴰ ⵏ ⴷⴻⵖⵢⴰ, ⴰⴷ ⵢⵉⵍⵉ ⴷⵔⵓⵙ,

ⵎⴰⵛⴰ ⵡⴻⵏⵏⵉ ⵉⵢⴰⵔⵔⵡⴻⵏ ⵙ ⵓⴼⵓⵙ,

ⴰⴷ ⵢⴰⵔⴱⴻⵃ. ◘

12 ⵍⴰⵢⴰⵙ ⵢⵓⵢⵍⴻⵏ ⵉⵙⵙⵄⵉⴵⴰ ⵓⵍ,

ⵎⴰⵛⴰ ⵜⵡⴰⵔⵔⵉⵜ ⵏ ⵎⴻⵥⵔⵉ ⵉⵛⵛⵓⵔⴻⵏ,

ⴰⵇⴰ ⵜⵜ ⴷ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ. ◼

13 ⵡⴻⵏⵏⵉ ⵉⵙⵙⴻⵃⵇⴰⵔⴰⵏ ⴰⵡⴰⵍ,

ⴰⴷ ⵣⵣⴰⵢⴻⵙ ⵉⵜⵜⵡⴰⵇⵇⴻⵏ,

ⵎⴰⵛⴰ ⵡⴻⵏⵏⵉ ⵉⵜⵜⴻⴳⴳⵯⴻⴷⴻⵏ ⵜⴰⵡⵚⴻⵢⵢⴻⵜ,

ⴰⴷ ⵉⵜⵜⵡⴰⵅⴻⴵⴻⵚ.

14 ⵜⴰⵖⵓⵔⵉ ⵏ ⵓⵎⵉⵖⵉⵙ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ,

ⵎⴰⵃⴻⵏⴷ ⴰⴷ ⵢⴰⵍⵡⴻⵍ ⴱⵏⴰⴷⴻⵎ

ⵉ ⵜⴻⵅⵛⵉⴼⵉⵏ ⵏ ⵍⵎⴻⵡⵜ. ◘

15 ⵍⴻⵄⵇⴻⵍ ⵉⵚⴻⴱⵃⴻⵏ ⵉⵜⵜⴰⵡⵉ-ⴷⴷ ⴰⵔⴹⴰ,

ⵎⴰⵛⴰ ⴰⴱⵔⵉⴷ ⵏ ⵉⵖⴻⴷⴷⴰⵔⴻⵏ

ⴰⵇⴰ ⵉⵇⵙⴻⵃ ⴰⵟⵟⴰⵙ.

16 ⴽⵓⵍ ⵉⵊⵊⴻⵏ ⵡⴻⵏⵏⵉ ⵉⴼⴻⵜⵜⵏⴻⵏ,

ⵉⵅⴻⴷⴷⴻⵎ ⵙ ⵜⵓⵙⵙⵏⴰ,

ⵎⴰⵛⴰ ⴰⴱⵓⵀⴰⵍⵉ ⵉⵜⵜⴱⴻⵣⵣⴰⵄ ⵜⴰⵖⵢⵓⵍⵉ ⵏⵏⴻⵙ.◘

17 ⴰⵎⵙⴻⵅⵅⴰⵔ ⴰⵄⴻⴼⴼⴰⵏ ⵉⵡⴻⵟⵟⴰ ⴷⵉ ⵍⵖⴰⵔ,

ⵎⴰⵛⴰ ⴰⵎⵙⴻⵅⵅⴰⵔ ⴷ ⴰⵎⵜⵉⵇⵇⵉ

ⵉⵜⵜⴰⵡⵉ-ⴷⴷ ⴰⴳⴻⵏⴼⵓ.

18 ⵣⵣⵍⴻⴹ ⴷ ⵍⴻⴼⴹⵉⵃⴻⵜ ⴰⵇⴰ ⴰⵜⴻⵏ

ⵉ ⵡⴻⵏⵏⵉ ⵢⵓⴳⵉⵏ ⵜⵜⴰⵔⴱⵉⵢⵢⴻⵜ,

ⵎⴰⵛⴰ ⵡⴻⵏⵏⵉ ⵉⴽⵙⵉⵏ ⴰⵡⴻⴱⴱⴻⵅ

ⵖⴰⵔ ⵡⵓⵍ ⵏⵏⴻⵙ, ⴰⴷ ⵉⵜⵜⵡⴰⵡⴻⵇⵇⴰⵔ. ◘

19 ⵉⵊⵊ ⵏ ⵓⵙⵉⵜⴻⵎ ⵉⵛⵛⵓⵔⴻⵏ ⴷ ⴰⵎⵉⵥⵉⴷ ⵉ ⵍⴻⵄⵎⴰⵔ,

ⵎⴰⵛⴰ ⵉ ⵉⴱⵓⵀⴰⵍⵉⵢⵢⴻⵏ ⴷ ⵏⵏⵄⵉ

ⵎⴰⵃⴻⵏⴷ ⴰⴷ ⵃⴻⵢⵢⴷⴻⵏ ⵅ ⵍⵖⴰⵔ.

20 ⵡⴻⵏⵏⵉ ⵉⴳⴳⵓⵔⴻⵏ ⴰⴽ-ⴷ ⵉⵎⵉⵖⵉⵙⴻⵏ,

ⴰⴷ ⵉⴷⵡⴻⵍ ⴷ ⴰⵎⵉⵖⵉⵙ,

ⵎⴰⵛⴰ ⵡⴻⵏⵏⵉ ⵉⵜⵜⴻⵎⵚⵓⵔⵔⵓⴼⴻⵏ

ⴰⴽ-ⴷ ⵉⴱⵓⵀⴰⵍⵉⵢⵢⴻⵏ, ⴰⴷ ⵜ ⵉⵍⵇⴻⴼ ⴷⴷⴻⴵ.

21 ⵍⵖⴰⵔ ⴰⴷ ⵉⴹⴼⴰⵔ ⵉⵎⴻⴷⵏⴰⴱ,

ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵜ ⵅⴻⴵⴹⴻⵏ ⵙ ⵍⵅⴰⵔ.

22 ⵡⴻⵏⵏⵉ ⵉⵚⴻⴱⵃⴻⵏ ⵉⵜⵜⴻⵊⵊⴰ ⵜⴰⵙⵖⴰⵔⵜ

ⵉ ⵡⴰⵢⵢⴰⵡⴻⵏ ⵏⵏⴻⵙ,

ⵎⴰⵛⴰ ⴰⴳⵍⴰ ⵏ ⴰⵢⵜ-ⴱⵓ-ⴷⴷⵏⵓⴱ

ⵉⵜⵜⵡⴰⵅⴻⵎⵎⴻⵍ ⵉ ⵓⵎⵙⴻⴳⴳⴻⴷ. ◘

23 ⴰⵔⴱⴻⵔ ⵏ ⵉⵎⴻⵣⵍⴰⴹ

ⵉⵜⵜⴰⵡⵉ-ⴷⴷ ⵎⴰⵛⵛⴰ ⵙ ⵡⴰⵟⵟⴰⵙ,

ⵎⴰⵛⴰ ⴰⵇⴰ ⴷⵉⵏ ⵉⵏⵏⵉ ⵉⵜⵜⵡⴰⵀⴻⵍⵍⴽⴻⵏ

ⵍⴰⵎⵉ ⴷⵉⵏ ⴰⵏⵇⴰⵙ ⵏ ⵍⵃⴻⵇⵇ. ◘

24 ⵡⴻⵏⵏⵉ ⵉⵎⴻⵏⵏⵄⴻⵏ ⴰⵄⵎⵓⴷ ⵏⵏⴻⵙ,

ⵉⵛⴰⵔⵀ ⵎⵎⵉⵙ,

ⵎⴰⵛⴰ ⵡⴻⵏⵏⵉ ⵜ ⵉⵜⵜⴻⵅⵙⴻⵏ,

ⵉⵜⵜⴻⴽⴽⴰⵔ ⴰⴽⵉⴷⴻⵙ ⵉⵜⵜⵡⴻⴱⴱⴻⵅ ⵉ-ⵜ ⴷⵉ ⵍⵡⴻⵇⵜ. ◘

25 ⴰⵎⵙⴻⴳⴳⴻⴷ ⴰⴷ ⵉⵛⵛ

ⴰⵍ ⵖⴰ ⵉⵊⵊⴰⵡⴻⵏ ⵍⴻⵄⵎⴰⵔ ⵏⵏⴻⵙ,

ⵎⴰⵛⴰ ⴰⵄⴻⴷⴷⵉⵙ ⵏ ⵉⵄⴻⴼⴼⴰⵏⴻⵏ

ⴰⴷ ⵉⵇⵇⵉⵎ ⵉⵜⵜⴻⵃⵡⴰⵊⴰ ⵍⴻⴱⴷⴰ.

◘13:2 13:2 ⴰⵡⵍⵏ. 12:14

◘13:6 13:6 ⴰⵡⵍⵏ. 10:29; 11:3, 5, 6

◘13:7 13:7 ⴰⵡⵍⵏ. 12:9

◘13:9 13:9 ⴰⵢⵓⴱ 18:5, 6; 21:17; ⴰⵡⵍⵏ. 4:18

◘13:11 13:11 ⴰⵡⵍⵏ. 10:2; 20:21

◼13:12 13:12 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’).

◘13:14 13:14 ⴰⵡⵍⵏ. 10:11; 14:27

◘13:16 13:16 ⴰⵡⵍⵏ. 12:23; 15:2

◘13:18 13:18 ⴰⵡⵍⵏ. 15:32

◘13:22 13:22 ⴰⵢⵓⴱ 15:29; 27:17

◘13:23 13:23 ⴰⵡⵍⵏ. 12:11; 18:9

◘13:24 13:24 ⴰⵡⵍⵏ. 23:13