O Jozua
1
O prikazis te predžal prekal o Jordan
Paloda, so muľa le RAJESKERO služobňikos o Mojžiš, o RAJ prevakerďa ko Jozua, ko čhavo le Nunoskero, savo sas služobňikos le Mojžišoskero: “Miro služobňikos o Mojžiš hino mulo. Av tu the savore kala manuša a predžan prekal o paňi Jordan andre phuv, so dav le Izraelitenge. Diňom tumenge savoro, pre soste thovena tumare pindre, avke sar oda phenďom le Mojžišoske. Caľi phuv le Chetitanengeri la južna pušťatar dži ko verchi Libanon the le bare paňestar, so hino o Eufrat, dži ko Stredozemno Moros pro zapados ela tumari. Ňiko na obačhola anglal tu, medik dživeha. Avava tuha, avke sar the le Mojžišoha. Šoha (ňikda) tut na mukava. Av zoralo a ma dara tut ňisostar! Tu ľidžaha kale manušen, hoj te zalen peske andro ďeďictvos kadi phuv, pal savi diňom andre vera lav tumare phure dadenge. Ča av zoralo a ma dara tut ňisostar! Ľiker tut pal o zakonos, so tuke diňa miro služobňikos o Mojžiš. Ma odvisar tut lestar aňi pre čači (pravo) aňi pre baľogňi (ľavo) sera, hoj tut te el bach všadzik, kaj džaha. Ma preačh te genel kada zakonoskero zvitkos! Gondoľin pal leste rat-džives, hoj te doľikeres savoro, so hin andre pisimen, bo ča akor avela tuke sa avri a ela tut bach. Či na phenďom tuke, hoj te aves zoralo a ňisostar pes te na daras? Ma izdra a ma podde tut! Bo o RAJ, tiro Del, ela tuha všadzik, kaj ča džaha.”
10 Paľis o Jozua phenďa le veľiťeľenge upral o manuša: 11 “Predžan prekal o taboris a phenen le manušenge: ‘Pririchtinen tumenge o chabena, bo pal o trin dživesa predžana prekal o Jordan andre odi phuv, hoj peske la te zalen. Bo odi phuv tumenge dela o RAJ, tumaro Del, hoj te el tumari.’ ”
12 O Jozua phenďa le kmeňenge Ruben, Gad the jepaš kmeňoske Menašše: 13 “Ma bisteren pre oda, so tumenge prikazinďa le RAJESKERO služobňikos o Mojžiš: ‘O RAJ tumaro Del, tumen dela smirom a anela andre phuv, so tumen dela pro vichodos le Jordanostar.’ 14 Tumare romňija, čhavore the savore stadi ačhena ade andre phuv pro vichodos le Jordanostar, so tumenge diňa o Mojžiš. Ale savore tumare zorale murša, save hine pririchtimen pro mariben, predžana prekal o Jordan anglal savore aver kmeňi, lenge te pomožinel, 15 medik na zalena e phuv, so lenge dela o RAJ, o Del, a medik the len na anela andro smirom. Paľis pes šaj visaren pale andre peskeri phuv pro vichodos le Jordanostar, so tumenge diňa le RAJESKERO služobňikos o Mojžiš; ela tumari.”
16 On phende le Jozuaske: “Keraha savoro avke, sar phenďal. Džaha všadzik ode, kaj amen bičhaveha. 17 Avke, sar šunahas le Mojžiš, šunaha the tut! Ča mi el tuha o Raj, tiro Del, avke sar le Mojžišoha. 18 Dojekh, ko na šunela oda, so tu prikazines – choc te so leske phenďalas – a na kamľahas oda te kerel, mi merel! Ča av zoralo a ma dara tut ňisostar!”