1 YAWEI, yu irrim langa main preya,

en yu irrim langa mi jinginat langa yu blanga album mi.

2 Wen mi abum trabul, yu nomo tenawei brom mi!

Yu irrim langa mi, en ensim mi kwikbala wen mi jinginat.

3 Main laif im gulijap binij jis laik det smok.

Main bodi im barnbarn jis laik faiya.

4 Mi gulijap binij jis laik draiwan gras.

Ai nomo wandim dagat daga enimo.

5 Mi jinginat adbala dumaji mi ardim brabliwei.

Mi brabli bouniwan, nomo garram bif na.

6 Mi jis laiga wailwan bard langa deset kantri,

en wulijim mukmuk weya jidan langa olwan haus.

7 Wen mi leidan, mi nomo silip,

jis laik det bard weya im jidan miselp ontop langa haus.

8 Main enami olabat oldei tok nogudwei langa mi.

Olabat oldei mokimbat mi en oldei yusum main neim nogudbalawei.

9-10 Dumaji yubin brabli wail langa mi,

yubin pikimat mi en yubin tjakidawei mi.

Main daga im jis laik eshis,

en main tiyas buldan insaid langa main dringk.

11 Jis laik det san weya im godan,

wal lagijat na main laif im jidan.

Mi jidan laik draiwan gras.

12 Bat yu, YAWEI, yu jidan king olagijawan.

Ola femili lain garra jinggabat langa yu.

13 Yu garra gidap en sori blanga Jerusalem.

Det taim bin kaman blanga sori langa im, en dijan na det rait taim.

14 Yu wekinmen olabat laigim Jerusalem brabliwei, nomeda imbin binijap.

Olabat sori blanga im nomeda im ol bitsap.

15 Ola pipul langa ebri kantri garra rispek langa YAWEI.

Ola king langa dijan wel garra rispek im brabliwei blanga im haibala pawa.

16 Wen YAWEI garra bildimap Jerusalem igin,

im pipul olabat garra luk im strongwan pawa.

17 Im garra irrim detlot pipul hu reken imbin libum olabat,

en im garra ensim olabat preya.

18 Raidimdan wanim YAWEI bin dum blanga ola biginini olabat hu garra jidan bambai,

wulijim olabat garra preisim im du.

19 YAWEI bin lukdan brom top brom im seikridwan pleis.

Imbin lukdan brom hebin langa dijan wel.

20 Imbin irrim ola prisana jinginatbat soribalawei,

en imbin larramgo fri ol detlot weya detlot enami bin tok dei garra dai.

21 Langa Jerusalem dei garra toktok blanga im neim,

en deya na dei garra preisimbat im,

22 wen ola pipul brom ebri kantri kaman mijamet en weship im.

23 YAWEI bin meigim mi jidan wikwan wen mi stil yang.

Imbin meigim main laif jidan shotwan.

24 God, nomo deigidawei mi.

Mi nomo olbala yet.

YAWEI, yu jidan olagijawan.

25 Longtaim yubin meigim dijan wel,

en garram yu ronwan bingga yubin meigim ebrijing langa skai.

26 Olabat garra binij bat yu garra stil jidan.

Olabat garra binij jis laik olwan klos.

Yu garra tjakidawei olabat jis laik olwan klos, en olabat garra binij.

27 Bat yu oldei jidan seim en yu laif kaan neba binij.✡Hib 1:10-12

28 Melabat biginini olabat garra oldei jidan seifwan,

en ola femili hu garra kaman bambai garra jidan seifwan garram yu.