1 Wal yu garra rimaindim ola Kristjan pipul deya langa det kantri blanga lisin langa ola gabman en langa ola bos deya langa det pleis, en dei garra duwit langa olabat, en dei garra oldei jidan redi blanga dum gudbala ting olataim. 2 En dei nomo wandi tok nogudbalawei langa enibodi, en dei nomo wandi faidabat langa enibodi. Dei garra kain langa ebribodi, en dei garra oldei jidan kwaitbalawei langa ebribodi.

3 Wal basdam wi nomo bin sabi, en wi nomo bin lisin langa God wed. Wibin oldei go najawei, en wibin wandim olkain nogudbala ting blanga meigim wi sedisfaid. En wibin lafta duwit. Wibin oldei laigim ola ting blanga najalot pipul, en wibin oldei wandi ardim olabat, dumaji wi nomo bin laigim najalot pipul, en dei nomo bin laigim wi du.

4 Bat God bin shoum wi imbin laigim wi detmatj, en imbin gud langa wi, 5 en imbin seibum wi. Im nomo bin seibum wi, dumaji wibin dumbat gudbala ting. Wibin oldei dumbat nogudbala ting. Imbin seibum wi, dumaji imbin fil sori blanga wi, en imbin seibum wi garram det Holi Spirit blanga im. Det Holi Spirit bin klinim wi, en imbin meigim wi bon igin, en imbin gibit wi nyubala laif.

6 Wal God bin gibit wi det Holi Spirit thru Jisas Krais. En Jisas Krais na bin seibum wi, en God nomo bin holdimbek det Holi Spirit brom wi. 7 God bin lagijat langa wi, dumaji imbin wandim wi, en imbin meigim wi jidan streitbala langa im wulijim wi garra jidan laibala garram im olagijawan. En wi wandi jidan laibala olagijawan.

8 Wal ol dislot wed iya weya ai dalimbat yu, im trubala. En ai wandim yu garra kipgon dalimbat ola pipul ol dislot ting na. Yu garra meigim detlot pipul hu bilib langa God oldei jinggabat blanga dumbat ola gudbala ting. Ol dislot ting im gudbala, en im album ebribodi. 9 Bat wen detlot pipul agamin nogudbalawei blanga olabat femili lain, en wen olabat graul gija en tok miselp blanga olabat ronwan lowa, wal yu nomo joinin langa olabat. Yu kaan joinin langa detkain ting, dumaji im nogud, en im oldei ardimbat pipul. 10-11 En if enibodi dum detkain ting en meigim trabul langa tjetj, wal yu garra wonim olabat tutaim. Afta tharran if dei kaan tjeinjim det wei blanga olabat, wal yu garra libum olabat. Dumaji yu sabi detkain pipul nomo jinggabat streitbalawei, en ol detlot nogudbala ting weya dei dumbat shoum olabat gilti.

12-15 Wal Taidas, yu garra album det men neim Apalas en det lowamen neim Senas. Dubala bin kaman blanga bisitim yu, en wen im taim blanga dubala blanga kipgon, yu garra meiksho dubala garram ebrijing dubala wandim blanga roud. En wi garra lenim ola Kristjan pipul blanga wek gudbalawei olataim wulijim dei garra abum ola enijing dei wandim blanga album enibodi. Dei nomo wandi weistimbat taim dumbat nogudbala ting.

Wal ebribodi iya langa mi tok gudei langa yu. En wen yu luk ola Kristjan pipul deya, yu dalim olabat melabat tok gudei langa olabat du.

Wal bambai ai garra jandim wanbala men langa yu, maitbi Atemas o maitbi Titjakas. En wen ai jandim im langa yu, wal yu garra kaman kwikbala langa mi langa det taun gulum Nikapalas, dumaji aibin jinggabat blanga jidan deya kolwethataim.✡Eks 18:24; 20:4; 1 Karin 16:12; Ifi 6:21-22; Kalosh 4:7-8; 2 Tim 4:12

Wal God garra kain langa yumob en lukaftumbat yumob.

Binij na.