1 Sipu barogoso va gorevura se Devita si va baṉaria sa pa doduruna Izireli se Solomone sa tuna.*1 Baṉ 1:1-40

2 Varigara ni sa baṉara Devita sari doduru koimata pa Izireli, meke sari na hiama meke ari tie Livaeti. 3 Nae betoi Devita sari doduru tie Livaeti, koreo na palabatu, sapu toloṉavulu puta vuahenidi meke hola sage. Sa vinarigaradi si toloṉavulu vesu tina. 4 Ka hiokona made tina tie si va hia i sa baṉara pude kopu nia sa tinavete pa korapa Zelepade; onomo tina si pude kopu ni sari na vinaripitui. 5 Made tina tie si na tie kopu koari na sasadana sa Zelepade, made tina tie si kote vala vinahesi koe Zihova, kote tavetavete ni rini sari na likakalae tana va avoso lea kinera sapu va nama vekoi e Devita sa baṉara pude tana vinahesi. 6 Meke va hia i Devita sari na tie Livaeti koari ka ṉeta tuti, keke pa hopeke tuna e Livae: Qerisoni, Kohati, meke Merari.

7 Qerisoni si karua tuna koreo: Ladana, meke Simei. 8 Ladana si ka ṉeta tuna koreo: Zehieli, Zetamu meke Zoili. 9 Arini sari ṉatidi sari na tuti te Ladana. Simei si ka ṉeta tuna koreo: Selomoti, Hazielo, meke Harani. 10-11 Simei si ka made tuna koreo: Zahata si kenuna; Zina si luli la, Zeusi, meke Beria. Zeusi meke Beria si lopu podopodo va soku, ke ta nae guana keke puku tatamana mo.

12 Kohati si ka made tuna koreo: Amaramu, Izihara, Heboroni, meke Uzieli. 13 Sa nana koreo kenuna, se Amaramu si na tamadia ari Eroni e Mosese. Eroni meke sari na tuna si ninae rane ta veko vata kale pude va madi ni sari na likakalae madidi, pude va vukivukihi pa kenuna e Zihova, pude nabulu nia, meke pude mana ni sari na tinoni pa pozana Sa.*Ekd 28:1 14 Ba sari na tuna Mosese sa nabulu te Tamasa si somana ta nae mo pa butubutu Livae. 15 Mosese si karua tuna koreo: Qesomu meke Elieza. 16 Sa koimata koari na tuna e Qesomu si e Sebuele. 17 Elieza si keke mo sa tuna koreo: e Rehabia, ba se Rehabia si podopodo va soku hola si asa.

18 Sa tuna koreo vina rua e Kohati sapu se Izihara si keke koreo mo si tanisa, e Selomiti; asa sa ṉatina sa tuti Izihara. 19 Sa koreo vina ṉeta te Kohati sapu se Heboroni si ka made sari tuna koreo: Zeria, Amaraea, Zahazieli, meke Zekameamu. 20 Sa koreo vina made te Kohati si e Uzieli meke karua tuna koreo si asa: e Maika meke Isia.

21 Merari si karua tuna koreo: Ari Mahili, meke Musi. Mahili si karua tuna: Eleaza meke Kisi. 22 Ba e Eleaza si mate meke lopu podo tuna koreo si asa, ba na vineki mo si podoi sa; habai rini sari tasidia karokarovo; na tuna e Kisi sari na vineki arini. 23 Sa tuna koreo vina rua e Merari, se Musi, si ka ṉeta tuna koreo: Mahili, Edera, meke Zerimoti.

24 Hire sari na pinodopodo pa butubutu Livae, pa hopeke puku tuti meke pa tatamana, doduru puku tuti si ta kubere beto pozadi, arini sapu hiokona puta vuahenidi meke sage pu tavetavetedi koasa Zelepade te Zihova.

25 Ura na zama se Devita, “Se Zihova sa Tamasa tadi na tie Izireli si ele vekoa sa binule koari na Nana tie, meke koa pa Zerusalema si Asa ninae rane. 26 Ke lopu ta hivae pude kaqu ta paleke pule koari na tie Livaeti sa Ipi Hopena te Zihova meke gua tugo sari na likakalae pu hoke tavetavete ni pa vinahesi.”*Diut 10:8 27 Koari na ginarunu vina betobeto te Devita si ta nae sari na tie Livaeti saripu podalae pa hiokona puta vuahenidi meke hola. 28 Dia tinavete si pude tokani sarini pa tutina Eroni koa rina vinahesi pa Zelepade, kopu ni sari na vasina varivariganana pa Zelepade meke sari na lose vekovekoana, kinopudi rina vinavia koari na likakalae tava madidi pa vina vukivukihi na vinahesi, meke kaiqa tinavete pule pa korapa Zelepade.*Nab 3:5-9 29 Dia tinavete tugo si pude va tana ia sa bereti pude vala nia pa tevolo, sari na palava na huiti tana vina vukivukihi va uququ, meke sari na bereti na bisikiti manivisidi loke isitidi, sa tinavete kinakina tadi na vinariponi, sa palava ta henie oela olive, meke pude kopu ni sari na tinavete pinada mamata meke ninae vinariponi pa kinopudi rina tinarae pa Zelepade. 30 Arini tugo si kaqu turu doduru munumunu na veluvelu meke zama leana na vahesia se Zihova, 31 meke koari na totoso sapu vukivukihi va uququ la koe Zihova pa rane Sabati, meke pa Sidara Vaqura, meke sari na inevaṉa koari na rane hopedi. Na tinarae si ta tavete sapu tozia visa tie si ta hivae pude taveti sari na tinavete hire pa hopeke totoso. 32 Gua ke ta poni koari na tie Livae sa tinavete pude kopu nia sa Ipi Hopena meke sa Lose Hopena, meke pa tinolitolie tadi na tuti te Eroni si kopu nia arini sa vinahesi koasa Zelepade te Zihova.