1 “Sa Binaṉara Maṉauru si kekeṉoṉo puta gua hie,” gua se Zisu. “Keke tie tago inuma vaeni si topue munumunu hokara meke la hata tie pude tavetavete pa nana inuma vaeni, gua. 2 Meke variva ego nia sa koa rini si pude kote tabara ni padana keke poata siliva pa keke rane, meke tiqe garunu lani sa pa tinavete. 3 Sipu vura pule la sa pa vasina tana maketi pa sia koloko, si dogori pule sa sari kaiqa tie korapa tuturu hoboro dia, loketoṉa tavetia. 4 Ke tozi ni sa, ‘La mamu tavetavete pa qua inuma vaeni, meke kote poni gamu rau sa tinabara pu garomia,’ guni sa si arini. 5 Ke topue la si arini pa tinavete. Meke pa manege rua koloko, meke pa ṉeta koloko ba gua tugo, kaiqa tie pule si vagi lani sa pa tinavete. 6 Meke sipu pule la sa pa vasina tana maketi pa kaiqa lima koloko veluvelu, si dogori pule sa si kaiqa tie korapa tuturu hoboro dia. ‘Na vegua ke turu va hola hoboro totoso tani si gamu?’ gua si asa. 7 Meke olaṉa sarini, ‘Na loke tie poni gami tinavete,’ gua si arini. ‘Ego, leana, gamu ba mi la tavetavete tugo pa qua inuma vaeni,’ guni sa si arini.

8 Meke sipu veluvelu sa popoa si tozi nia sa tie tago inuma sa nana palabatu tinavete. ‘Mu la tioki sari na tie tavetavete mamu poni sari dia tinabara, podalae koa rini pu tavetavete mumudi meke kamo koa rini pu tavetavete kekenu,’ gua si asa.*Liv 19:13; Diut 24:15 9 Meke hopeke poni ni keke poata siliva*Keke poata siliva si padana sa tinabara tana tie tavetavete pa keke rane. sa saripu podalae tavetavete pa lima koloko veluvelu. 10 Meke sipu mae vagi tinabara saripu podalae tavetavete kekenu, si balabala ia rini sapu kote vagi va noma si arini, gua. Ba totoso vagia rini sa dia tinabara si kekeṉoṉo gua mo tadi pu tavetavete mumudi. 11 Ke totoso vagi rini sari na poata, si podalae qumiqumi nia rini sa tie tago inuma. 12 Zama si arini, ‘Sari kaiqa hire pu tavetavete mumudi si keke aoa mo si tavetavete ia rini, ba gami si raza mate doduruna sa rane koasa maṉinina sa rimata, ba va kekeṉoṉo gami mo goi koa rini!’ gua si arini.

13 Meke olaṉa la koa keke ari kasa sa tie tago inuma, ‘Mu avoso mae qua baere, toṉotona sa qua tinavete koa goi. Nake ele va egoa tu goi sa tinabara sapu keke poata siliva pa keke rane tavetavete, gua. 14 Ke vagia sa mua tinabara mamu taloa. Arau hiva ponia koa sa pu tavetavete mumudi, gua sapu vatua rau koa goi. 15 Arau mo telequ tagoa sa ṉiniraṉira pude tavetavete nia sa qua poata. Mu lopu kono nia goi sapu tavete valeana la si arau koa rini.’ ”

16 Meke zama guahe se Zisu, “Ke gua asa si sokudi ri pu kekenu si kote tava mumudi, meke sokudi ri pu mumudi si kote tava kekenu,” gua si Asa.*Mt 19:30; Mk 10:31; Lk 13:30

17 Ego, sipu korapa ene la pa Zerusalema se Zisu, si tioko vagi vata kale i Sa sari ka manege rua Nana disaepeli, meke zama si Asa koa rini: 18 “Avoso mae gamu, korapa sage la pa Zerusalema si gita, meke vasina si kote ta vala sa Tuna na Tie pa limadi rina ṉati hiama, meke sari na tie va tumatumae koasa Tinarae te Mosese, meke kote ta zutu, meke tava mate si Asa. 19 Beto asa, kote vala ia rini si Asa koari na tie Zenitailo pude va sisire nia, na sekea, meke kote va matea rini pa korosi si Asa. Ba pa rane vina ṉeta si kaqu turu pule pa minate si Asa,” gua se Zisu.

20 Meke mae koe Zisu sa barikaleqe te Zebeti meke sari karua tuna koreo; mae todoṉo pa kenuna Sa meke tepa vina lavata koa Sa.

21 “Na sa si hiva nia goi?” gua se Zisu koasa barikaleqe; meke olaṉa si asa, “Baṉara, va tatara veko nau Goi kamahire sapu sari karu tuqu koreo hire si kaqu habotu*Hiva koa somanae koe Zisu pude baṉarani sari na tie. somanae koa Goi, keke pa kali mataomu meke keke pa kali gedemu pana koa Baṉara si Goi.”

22 Meke olaṉa la se Zisu, “Lopu gilania gamu kara gua sapu tepa ia gamu. Vegua, boka napo turaṉau gamu kara sa kapa tinasigiti sapu kaqu napo ia Rau?” gua si Asa. Meke olaṉa sari karua, “Uve, boka tugo,” gua si arini.

23 Meke zama la koari karua se Zisu, “Ego, kote somana napo si gamu koasa kapa tinasigiti sapu kote napo ia Rau, ba sa ṉiniraṉira pude vizatia sapu esei si kote habotu pa kali mataoqu, meke pa kali gedequ, si lopu Taqarau. Sari na vasidi gugua arini si tadirini tu pu ele vizata vekoi sa Tamaqu,” gua se Zisu.

24 Totoso avosia ri ka manege puta disaepeli sapu gua asa, si bugoro ni rini sari karu tamatasi. 25 Ke tioko varigara ni Zisu sari doduru disaepeli meke zamai Sa, “Gilania mia gamu sapu sari na baṉara tadi na tie Zenitailo, si lalae ni rini sari na tinoa tadi na dia tie meke ṉati hiniva ni rina dia koimata si arini.*Lk 22:25-26 26 Ba koa gamu si lopu kaqu gua asa. Be keke koa gamu si hiva pude na koimata, si mani koa na nabulu si asa koa gamu.*Mt 23:11; Mk 9:35; Lk 22:26 27 Meke be keke koa gamu si hiva koa na tie ululuna, si mani koa na pinausu si asa koa gamu. 28 Kekeṉoṉo gua sa Tuna na Tie sapu lopu mae pude va baṉabaṉarae, ba mae pude koa na nabulu tu, meke ponia sa Nana tinoa pude holu pule ni sari sokudi,” gua se Zisu.

29 Meke sipu taluarae pa Zeriko se Zisu meke sari kasa Nana disaepeli, si keke puku tinoni lavata si luli koa rini. 30 Meke totoso avosia ri karua tie bebehudi sapu habotudi pa vale siraṉa sapu e Zisu si korapa ene hola, si velavela sari kara, “Ke Baṉara, Tuna d Devita, mu tataru ni gami!” gua sari kara.

31 “Mokomoko gamu kara!” gua sari kobi tie. Ba velavela va ululae latu sari kara, “Ke Baṉara, Tuna Devita, mu tataruni gami!” gua sari kara.

32 Turu noso se Zisu meke nanasi Sa, “Na sa si hiva nia gamu kara pude tavete poni gamu Rau?” gua si Asa.

33 Meke zama la sari kara, “Baṉara, hiva dodogorae si gami!” gua si arini.

34 Meke tataru ni Zisu sari kara ke la tiqui Sa matadi, meke hinoqa dodogorae sari karua, meke lulia rini si Asa.