109
Qinumiqumi tana Keke Tie pu Koa pa Tinasuna
(Keke kinera te Devita)
1 Kei Tamasa, vahesi Igo rau si Agoi,
Mu lopu koromu pude kulu au.
2 Sari na tie kaleadi, na tie kokohadi si ele rapata nau,
tozi rini sari na zinama kokohadi koasa guguaqu rau.
3 Soku ginugua kaleadi si tozi rini koasa guguaqu rau,
meke rapata hoboro nau rini si rau pa loke ginugua.
4 Tataru ni na varavara toka ni rau si arini,
ba kanau tu rini.
5 Sa qua lineana koa rini si hobe nia kinaleana tu rini,
meke sa qua tataru si hobe nia kinukiti tu rini.
6 Mu vizatia keke tie varipitui kaleanana pude varipitui nia,
Mu vizatia keke nana kana telena pude zutua gana.
7 Pana ta pitu sa, si mani sea gana;
sa nana vinaravara ba mani ta balabalae sinea tugo.
8 Mani papaka gana sa nana tinoa,* TTA 1:20
meke mani vagi hobea gana keke votiki tie sa nana tinavete!
9 Madi eapa gedi sari nana koburu,
mani naboko gana sa nana barikaleqe!
10 Madi loke dia vasina, meke madi koa malaṉa gedi sari na tuna.
Madi ta hadu taloa gedi koari na vetu huhuaradi pu koai rini!
11 Koarini pu vagi paki sa sa dia poata meke lopu boka hobe pulei sa,
si madi la vagi beto pani sari doduru nana likakalae.
Madi la vagi beto pani rina tie karovodi sari doduru nana vinagi koari nana tinavete!
12 Mani loke tie va tukania si asa,
meke mani loke tie tataru ni na kopuni sari na tuna pu eapadi!
13 Madi puzulu sari doduru tutina,
mani ta muliṉae palae sa pozana koasa sinage pu luli mae koa sa.
14 Mani balabala vekoi e Zihova sari na kinaleadi tadi na tiatamana pukerane,
meke mani lopu taleosae ni Tamasa sari na sinea tanisa tinana.
15 Mani lopu muliṉi ni e Zihova sari na dia sinea,
ba sari na tiedi si madi ta muliṉi palae hokara.
16 Ura lopu hite koa pa nana binalabala sa tinavete tataru na vinatukana,
ba ṉoṉovali sa sari na habahuala,
na malaṉa, meke saripu lopu ta galagalaedi.
17 Hiva hola nia sa sa lineveleve, ke mani ta levei gana tugo si asa!
Lopu hiva mana ni sa sari na tie, ke mani lopu ta manae tugo si asa.
18 Sa nana hahanana lineveleve si guana nana pinokopoko sa.
Mani guana kolo sa lineveleve sapu nuquru pa tinina,
meke guana oela sapu nuquru pa susurina!
19 Mani nobia na lineveleve si asa guana poko pu va sagea sa,
meke guana belete sapu dokoho nia sa hopeke rane.
20 Madi gua arini sari na linipulipu kaleadi pu poni ni e Zihova koarini pu va kaleanau,
koarini pu zutu nau koari na zinama kaleadi.
21 Ba Zihova qua Baṉara lavata, Mu toka nau gua sapu ele va tatara nau Goi,
Mamu va sare au, sina koa gua koasa Mua lineana na tataru.
22 Ura habahuala na malaṉa si rau,
meke koa ta sigiti pa korapa buloqu si rau.
23 Tata mate taloa mo si rau, guana opoadumu pana veluvelu;
ta givusu palae guana kupokupo hakena pa elelo si rau.
24 Malohoro sari na tuṉutuṉu nenequ, sina lopu henahena si rau;
tale susuriqu mo si rau.
25 Na dia sisireana rina tie si rau pana dogorau rini;* Mt 27:39; Mk 15:29
meke hiruhirue batudi si arini.
26 Mu toka nau, kei Zihova qua Tamasa;
Mu harupau pa Mua tataru nabuna!
27 Va gilana nia koari na qua kana,
sapu Agoi sa Tamasa sapu harupuqu rau.
28 Arini si leve nau, ba Agoi si mana nau tu.
Madi tava kilasa sarini pu ṉoṉovalau,
ba arau na Mua nabulu si maqu qetuqetu qua.
29 Madi tava malamalaṉa gedi sari na qua kana,
meke madi guana pokopoko nia rini sa kinurekure.
30 Kaqu velavela nia rau sa qua zinama leana koe Zihova.
Kaqu vahesia rau koari na vinarigarae tinoni,
31 sina lavelave nia Sa sa tie habahuala,
meke va sarea Sa si asa koarini pu zutuna pude va matea gua.