1 Phat chomkhat jouvin Philistine miten gamsunga a sepai jouse akhom un, Israel mite toh kisat dingin akigo tauve. Achish lengpan David jah ah, “Nang le na sepai ten galsatna a neipan khompi diu ginchat aum'e,” ati.

2 David jong anom in, “Apha lheh jenge! Ichan kabol thei dol natahsa tah a namu ding ahi,” ati.

Chuti chun Achish in David jah ah, “Keiman keima hinkho eivengtup dia kasem ding nahi,” ati.

3 ✡Thempu Dan 20:27; Danbu Ni Na 18:10,11Samuel athi phat in, Israel pumpin alhaset piuvin, along a-op uvin, ama khopi sung ma-ma Ramah ah avuitauvin ahi. Chule Saul in agamsunga gaochang jouse le phunsan ho athisa ho lhagao ho toh kihoutoh ho jouse anomang tan ahi. ✡1 Samuel 25:1

4 Philistine te akikou khom’un, Shunem ah ngahmun asauvin chule Saul in Israel sepai jouse akhomin Gilboa ah ngahmun asemin ahi. 5 Saul in Philistine sepai tamtah amu phat in akicha behseh jengin alungthim alinglao lheh jeng tan ahi. 6 Hichun aman, ipi kabol ding hitam tin Pakai adongin, ahinlah Pakaijin adonbut tapoi, mang hihenlang, phunsan hihen chule themgao hijongleh iman adonbut tapoi. ✡Minbu 27:21 7 Chuin Saul in athumop a pang ho asol’in, “Cheuvin lang gaochang numei nei gaholpeh un, keima chengting amanu chu kagadoh ding ahi,” ati.

Hiti chun athumop a pang ho khat in, “Endor mun'ah gaochang numei khat aum'e,” ahin atipeh in ahi.

8 Hichun Saul in athempu von chol akhellin von mai-mai in akivon in, jan in sepai mini akipuijin numeinu in'a chun acheuvin ahi.

Chuin aman, “Keiman athisa mi khat kakihoupi nom e, a lhagao neikou peh thei dem?” ati.

9 Numeinu chun, “Nangman tha dinga neigot ham? Saul in gamsunga konna gaochang jouse le phunsan them jouse adelmang hi nahet ding ahi. Chutia ahileh nangman ipi dinga keima kipalsah tei ding neigot ham?” ati.

10 Ahinlah Saul chu Pakai min panin akihahsel'in akitemin ahi. “Tahbeh a hingjing Pakai min'a kasei ahi, hiche nabol jeh hin ima thilse um ponte,” ati.

11 Achainan numeinun jong, “Aphai, koi pentah lhagao ka koudoh peh ding ham?” atile

Saul in, “Samuel lhagao nei koudoh peh in,” ati.

12 Numeinun Samuel amu phat in, ahung pengjah jengin, “Nangman nei joulhep e, nangma Saul nahi!” ati.

13 Hichun Lengpan amanu kom'ah, “Kicha hih in, koi namum?” atile amanun jong,

“Pathen khat kamun leisetna kon'in ahung potdoh e,” ahin ti.

14 Saul in, “Amapa chu koitoh kilou em?

Ama chu tehsepu ahin, sangkhol chol khat akiah e,” ati. Saul in Samuel ahi ahechen tan, chuin amasanga tol’ah abohkhup in chibai abohtai.

15 Hichun Samuel in, “Ipi jeh a neisuh boiya, neinung kou ham?” Chuin Saul in, “Ajeh chu keima kaboina asanglheh tai, Philistine te galsat din ahung kigo uvin, Pathen'in eidalha tan, themgao ahilou le mangin jong eihetsah tapoi. Hijeh a chu nang kahin doh ahi, Ipi kati ding hitam?” ati.

16 Ahinla Samuel in adonbut in, “Pathen'in na dalhah tah a, chule agalmi nahitah a ahile, ibol'a kei neidoh ham?” ati. 17 “Pathen'in asei banga abol ahitai. Na lenggam nanga konna ale lah a chule David joh apeh ahitai. ✡1 Samuel 15:28 18 Pakai thupeh jouse napalkeh a, alungnatna na boldoh a, Amalek mite le anei jouseu na suhmang hel lou jeh a tua hi Pakaijin hitia abol ahitai. ✡1 Samuel 15:3-9 19 Chule jing nikho tengleh nang le na sepai ho jouse Philistine te khut a apehdoh ding ahitai, chule nangma le na chapa kaheng’a hung ding nahi lhon tai. Israel sepai te jong Pakaijin Philistine te khut a pedoh tante,” ati.

20 Samuel thucheng seiho atijat behseh jeng jeh in, Saul chu tol’ah akijam den jengin ahi. Sun le jan’a an nelouva aum jeh in, agil akel'in alhalhop jeng tan ahi.

21 Numeinu chea agavet le, atijat val chu amudoh in, “Kapu, nei lungset in kenbon kahinkho phalngam’a neidoh ho kanop a kabolpeh ngam nahi. 22 Tun nangman jong kasei bangin bollin, neh ding phabep kapeh ding nahin, nenlang natha kidodoh sah kit in,” ati.

23 Ahinlah Saul chun ima neh ding anompoi. Chule avaipo teho geiyin nehsah tei ding agouvin, akhon-khon nan anomin tol’a kon'in ahung kithoudoh in jalkhun chung’a atousah tauvin ahi.

24 Hiche numeinu hin a ina bongnou thaochet khat anei ahin, hichu agathat loiyin, changbong toh ameh nangjet in, chol solouvin changlhah akangtan ahi. 25 Chuin changlhah le bongsa chu Saul le aloi teni chu athuh peh in ahile ama hon ane tauve. Aneh jou phat un hiche jan chun amaho ahung kile kit tauve.