Hoe ty nafè’ Iehovà, Talè amy Edome:

Nahajanjiñe entañe boak’ amy

Iehovà zahay,

le fa nampihitrifeñe amo kilakila’

ondatio ty sorotà, nanao ty hoe:

Miongaha, antao hitroatse hihotakotake. 2 Inao te hafotsako ho kede

amo fifeheañeo irehe;

ho vata’e mavoeñe. 3 Fa namañahy azo ty firengevohan’arofo’o,

ihe mpimoneñe an-tseratseram-bato ao;

an-kaboañe ey ty fimoneña’o

ihe mitsakore ty hoe añ’arofo ao:

Ia ty hanjotso ahy mb’an-tane mb’eo? 4 Aa ndra t’ie mizonjoñe mb’añ’abo ey

hirae’o am-bantio,

naho ajado’o amo vasiañeo eñe ty akiba’o,

mbe hazotsoko boak’ ey, hoe t’Iehovà. 5 Ie nivotraha’ ty mpampikametse,

naho ty malaso an-kaleñe

— akore ty fandrotsahañe anahareo—

tsy ho nampikametse am-para’

t’ie nietsake hao?

Aa naho nivotrak’ ama’o

ty mpanontoñe valoboke,

tsy ho nenga’e hao ty ho tsindroheñe? 6 Akore ty fivolosañe i Esave,

ty fikodebeañe o vara nakafi’eo. 7 Fa nanese azo pak’ añ’efe-tane eo

o mpirimboñ’ ama’oo;

nifañahie’ o nifampilongo ama’oo

vaho nahagioke;

fa nampipoke fandrik’ ambane’o ao

o mpitrao-pikama ama’oo;

(tsy ama’e ty hilala!) 8 Ie amy andro zay, hoe t’Iehovà,

tsy ho mongoreko Edome ao hao

o mahihitseo

naho am-bohi’ Esave ty faharendrehañe? 9 Hiroreke o fanalolahi’oo ry Temane,

amy te ho fonga haitoañe am-pizamanañe

am-bohi’ i Esave eo ondatio. 10 Hañoloñe azo ty fisalarañe

ty amy nampisoaña’o

an-drahalahi’o Iakobey,

vaho haitoañe zafe-zanake irehe. 11 Ihe nijagarodoñe eo amy andro zay,

amy andro nendese’ o ambahinio

mb’eo o vara’eoy

naho nizilike an-dalambei’e mb’eo o alik’ama’oo,

vaho nanoe’ iereo tsatopiso t’Ierosalaime

—ihe nimpiama’ iareo. 12 Ho nisoa t’ie tsy nisamba an-drahalahi’o amy andron-kekoheko’ey,

tsy ho nirebeke amy andro

naha-rotsake o ana’ Iehodaoy;

mbore tsy nimete ty nisaontsie’o añ’ebotsebotse amy andron-kankàñey. 13 Tsy nimete ty nimoaha’o an-dalambei’ ondatikoo amy andron-kekoheko’ iareoy;

Eka, tsy ho nisambà’o ty fisotria’e amy andron-kankà’ iareoy,

ndra nampipao-pitàñe amo fanaña’ iareoo amy andro nitarañen-doza’ iareoy. 14 Tsy nimete ty nijohaña’o am-pitsileañe eo

hamonoa’o ze nipoliotse mb’eo;

naho tsy ho nasese’o o sehanga’eo

amy andron-kasotriañey. 15 Fa mitotok’ amo kilakila’ ondatio

ty andro’ Iehovà:

hambañe amo sata’oo ty hanoeñe ama’o.

habalik’ añ’ambone’o eo o fitoloña’oo 16 Fa manahake ty ninoma’ areo

amy vohiko miavakey,

ty hinoma’ o ambahinio nainai’e;

ie hinoñe naho higenoke,

vaho hanahake te mbe lia’e tsy teo. 17 F’ie ambohi’ i Tsione ao

ty nahapoliotse†Ies 4:2-3, Ioe 2:32, Ben 14:1, ie ho miavake;

vaho ho fanaña’ Iakobe o vara’ iareoo. 18 Le ho afo ty anjomba’ Iakobe,

naho lel’afo ty anjomba’ Iosefe,

naho ho ahetse ty anjomba’ i Esave,

le ho viañe’ iereo ty ao, hamorototo iareo,

vaho tsy hengañe honka’e ty añ’anjomba’ i Esave ao; fa nitsara t’Iehovà. 19 Ho a o tatimoo ty vohi’ i Esave,

naho i monto’ o nte-Pilisty ambane eio,

ho fanaña’ iareo ty tete’ i Efraime,

naho ty tonda’ i Somerone,

vaho ho fanaña’ i Beniamine t’i Gilade. 20 Ho fanaña’ o nirohizañe amy valobohò’ o nte-­Israeleoy ty a o nte-Kenàneo,

pak’e Tsakrefate añe;

vaho ho fanaña’ o mpirohi’ Ierosalaime

e Sefaradeo o rova atimoo. 21 Homb’an-kaboa’ i Tsione mb’eo o

mpandrombakeo hizaka ty vohi’ i Esave;

vaho ho a Iehovà i fifeheañey‡Sab 2:8, Dan 2:44, Zek 14:9, Ben 11:15.