68
Maaron, i Uleeŋa ariaaŋa to tamtamon tooni
Mbouŋ to David
1 Maaron aat iburig ve ireu mbirisai koiŋa.
Yes tau tighur koi pani, i pale iziir zi tighau pa naagho.
2 I aat ipasov zi le tisov kat, imin yav mbuasa tau izaa, ve yaghur ivuvuura gha ilale.
Isaav ighe zeran sasaghati tileep ila Maaron naagho, i pale ivaghamun zi gha tilalez,
imin bagil tau igheen igharau yav ziige, ve yav ighamu ireer ila, le isov.
3 Eemon zeran duduŋazi, yes pale lolozi poia kat.
Pale tileep ila Maaron naagho, ve tiyoor eeza toman tintinizi.
4 Ambou pa Maaron. Ambou ve apait eeza, ve agharaat eez pani.
I Ŋeer tau ileep ila taitai paavo, ve ilandoova.
I eeza Yoova.
Alup gham ila naagho, ve tintinmim pani. *Igham 19:16; Mbo 18:10+; Mt 26:64
5 Maaron ileep ila niia patabuyaaŋ, ve iŋginŋgin yes parooŋa imin tamazi.
I ivolvool to yes zinaara ve iyozyooz pazi. *Igham 22:22+; Mbo 10:14, 146:7+
6 Yes tau zigazi tileep, ene pale Maaron igham tamtamon siriv timin zetazŋa, leso yesŋa tilup zi ve tileep.
Ve yes tau koiazŋa tizeev zi sorok tiloŋ tila ruum to yavyavuuŋ na, i ipaspas zi tivot, ve imuuŋ pazi, ve ighegherev zi tila, leso tigham lepoogh poia.
Tauvene yes timbou toman tintinizi, ve titaghoni gha tila.
Eemon yes tau tighamgham taliiŋzizi na, pale tileep saghat ila taan gorgori tau le yaa mako na.
7-8 Maaron, saawe tau yo umuuŋ pa tamtamon tsio Israela, ve yamŋa alaagh izi nugh ŋginaaŋa na,
yogyoog itok taan, ve uman tiina itap sambam saamba gha izi.
Maaron to Israel, nugh tsio to ghamuuŋ pooz, ene loloz Sinai. Yo utotoi taum uvot ughazooŋ ta sewe. *Igham 19:16+
9 Maaron, taan tau yo ugham pa tamtamon tsio na, isaav ighe aaz tiina ve igorgor,
na yo ughamgham uman tiina izizi to ipabees taan, leso gabua titum muul.
10 Tamtamon tsio tigham taan tane imin lezi nugh to lepoogh.
Yei mbolaaŋa. Lemai gabua eta mako. Eemon Maaron, yo poia puughu.
Tauta ugham taan tane payei, leso iuul ghei.
11 Ŋeer Tiina ivotia malmal vaaru ighe i iliiv koiŋa wa.
Tauvene zilivaa eval tilaan tila, ve tibobaini tighe:
12 “Ou alooŋ! Yes kinik tomania zaaba toozi tila wa. Tisov tighawaar wa!
Tauta zaaba toit tiyau gabua to koiaanŋa tilam, ve tigham pa zilivaa tau tileep nughei we, leso tivarei zi.
13 Zilivaa tsiei tipabood zi pa silva ma gol le paghunazi kat, imin mbunumoor tau tigharaata pa silva, ve tipaak gol milmilia ila baage.
Puughu mindai ta yam siriv ala pa malmal mako, ve aleep sorok nughei tomania sipsip?”
14 Saawe tau Maaron saksaki ireu mbirisai yes kinik,
i igham ais paatu paatu titaptap tizi ila loloz Zalmon. Tauta inaan zi gha tighawaar.
15 Loloz to nugh Basan, ene tiina ve daaba izala kat, ve le mbua ve sapsapu katini.
Daaba izala kat, tauta i le eeza.
16 Loloz to nugh Basan, yo lem mbua naol. Puughu mindai ta ughita Maaron igham loloz Zion imin niia to lepoogh, ve ireu lolom? Tauta lolom isaghat pani ne?
Onoon kat, i pale ileep izi loloz tane taghon taghon gha ila.
17 Ŋeer Tiina ipul loloz Sinai, ve ilaagh tomania karis tooni ndiŋndiŋ ndiŋndiŋ to malmal,
le tila tivot niia patabuyaaŋ ta Zion we.
18 Maaron, yo ugherev koiamŋa katini tau uliiv zi na,
gha titaghon ghom ve yamŋa azala loloz tsio daaba ta saaŋa we.
Tamtamon tigham lem gabua popoia maata maata.
Yes tau tizorzoor aliŋam na paam, tiput aghezi payo, ve tigham lem gabua.
Onoon kat, Maaron toit Yoova, monmon i ilepleep izi loloz tooni tane. *Ep 4:8
19 Tapait Ŋeer Tiina pa poia tooni!
Saawe isov, i iuluul ghiit pa badooŋ pataŋani toit.
Maaron toit, i Maaron tau ighamgham mulin ghiit pa pataŋani toit. *Mbo 81:6; 2Kor 1:4+
20 Maaron toit, i Maaron to uleeŋ.
Onoon kat, Maaron toit Yoova, i ighamgham mulin ghiit. Tauta tamaat mako, ve taleep poi. *Mbo 56:13; 1Kor 15:51+; 1Tes 4:13+; Syg 1:18
21 Maaron pale irav valaghin koiŋa dabazi.
Yes tau titaghon eez saghati ve tighamgham sosor na, i pale irav mbirisai dabazi rubruuba, le tisov timataar.
22 Ŋeer Tiina isaav ighe: “Koiagŋa irau tighau mako.
Isaav ighe tileep izi loloz to nugh Basan, ma tileep siiŋa kat izila mazavan,
ene aat nagham zi tisov timuul tilam.
23 Siŋizi pale ireer izi, ve ipot ila taan paavo, leso awai ila.
Ve ŋgavuun tsiam pale tighunu, le isooŋ zi.”
24 Maaron, yo kinik tsiau.
Yo uliiv koiamŋa wa.
Tauta aazne, ulam toman lolom poia, ve uloŋ ula rumei tsio patabuyaaŋ ila eval tiina matazi.
Yo umuuŋ, ve tamtamon tsio titaghon ghom gha yamŋa aloŋ ala.
25 Yes to mbouŋ timuuŋ,
ve zilivaa paghpaaghu tau titoktok kakaap na titaghon zi.
Ve yes to ravuuŋ ambam, ve vivuuŋ mboi ve tavuur ma gabua siriv paam tilaagh murei.
26 Yam Israela tau avot ila to Yakop na, alup gham ila Maaron naagho ve apaiti pa poia tooni.
Yam asov apait Yoova eeza!
27 Aghita. Rumei to Benyamin tau eval mako na, timuuŋ.
Mako yes daaba to Yuda tomania tamtamon toozi titaghon zi.
Ve yes daaba to Sebulun ve Naptali tilaagh murei.
28 Maaron, yo usaav ariaaŋ pataghaaŋ ughe yei Israela aat lemai tapirimai tiina ve niyooz ariaaŋ.
Utotoi tapirim payei muul, imin muuŋ utotoia payei.
29 Yes kinik to taan pale tilam tivot Yerusalem, ve tigham lem gabua popoia iloŋ ila rumei tsio patabuyaaŋ.
30 Yes Isipa tilepleep ila pizpiiz loolo ta yaa Nil ziige we imin poghai.
Ve yes kinik to nugh siriv tilaghlaagh tomania zaaba toozi timin makau umbaal tau tiketkeet tomania natuzŋa.
Uyaon koiamaiŋa tawe, leso tiput aghezi payo, ve tighur maet silva toozi imin lem to tipakur ghom.
Nugh nugh tau lolozi pa ghamuuŋ malmal na, ureu mbirisai zi.
31 Kinik to yes Isipa pale imbaaŋ uraata tooni tilam Yerusalem, leso yeŋa nisavsaav pa lupuuŋ tsiei.
Ve yes to Etiopia paam, pale rekia tiit nimazi izaa, ve tisuŋ pa Maaron.
32 Yam kinik to taan tomania tamtamon tsiam, ambou pa Maaron.
Ambou mbouŋ pani ve apakuru.
33 I Ŋeer tau ileep izala taitai paavo, ve ilandoova ila sambam saamba tau igheen muuŋ geeg ve ilam.
Alooŋ. I isavsaav toman tapiri tiina.
Aliiŋa luutu tiina imin lalaav. *Mbo 29:3, 68:4
34 Tauvene yam avotia Maaron tapiri.
I kinik tiina tau ighamgham pooz pa iit Israela,
ve itotoi tapiri ivotvot ila sambam saamba.
35 Maaron to iit Israela, i ilepleep iloŋ ila rumei tooni patabuyaaŋ ve itotoi tapiri.
Tauvene tamtamon tighita ve tiroi.
I ireirei tapiri pa tamtamon tooni ve ipapalot zi.
Tapait Maaron pa poia tooni! *Igham 19:5+; Mbo 29:10+
*68:4: Igham 19:16; Mbo 18:10+; Mt 26:64
*68:5: Igham 22:22+; Mbo 10:14, 146:7+
*68:20: Mbo 56:13; 1Kor 15:51+; 1Tes 4:13+; Syg 1:18
*68:35: Igham 19:5+; Mbo 29:10+