Муқеддес Калам (кирил йезиқ) Зәбур 83

83-күй •••• Пәрвәрдигарниң һозурини сеғиниш

1-2 Нәғмичиләрниң бешиға тапшурулуп, «Гиттиф»та челинсун дәп, Кораһниң оғуллири үчүн йезилған күй: —

Маканлириң нәқәдәр әзиздур,

Самави қошунларниң Сәрдари болған Пәрвәрдигар!□

3 Җеним Пәрвәрдигарниң һойлилириға тәшна болуп,

Сеғинип һәтта һалидин кетиду,

Дилим вә әтлирим һаят Тәңригә тәлмүрүп нида қилиду;■

4 Мана, һәтта мубарәк қучқачму бир маканни тапқан,

Қарлиғачму өзигә һәм бала туғидиған уга ясайдиған җайни тапқан,

— Йәни Сениң қурбангаһлириңдин,

И самави қошунларниң Сәрдари болған Пәрвәрдигар,

— Мениң Падишасим, мениң Худайим!

5 Сениң өйүңдә туруватқанлар бәхитликтур!

Улар үзлүксиз Сени мәдһийиләйду.

Селаһ.

6 Күч-қудрити Сәндин болған киши бәхитликтур —

Қәлбидә көтирилмә йоллар болғанлар;□

7 Жиға вадисидин өткәндә,

Улар уни булақлиққа айландурар;

Бәрһәқ, күз ямғурлири уни бәрикәтләргә толдуриду.□

8 Улар күчигә-күч улап меңивериду;

Һәр бири Зионға йетип келип, Худаниң һозурида һазир болиду.

9 И самавий қошунларниң Сәрдари болған Пәрвәрдигар, дуайимни аңлиғайсән;

И Яқупниң Худаси, қулақ салғайсән!

Селаһ.

10 Қара, и қалқинимиз болған Худа,

Өзүң мәсиһ қилғиниңниң йүзигә илтипат билән қариғин!□

11 Чүнки Сениң һойлилириңда өткән бир күн

Башқа йәрдә өткән миң күндин әладур;

Рәзилләрниң чедирлиридә яшиғандин көрә,

Худайимниң өйиниң босуғисида турғиним яхшидур.□

12 Пәрвәрдигар Худа қуяш вә қалқандур,

Пәрвәрдигар шапаәт вә шан-шөһрәт бәхш етиду;

Дурус маңғанлардин У һәр қандақ илтипатни һеч айимайду;

13 Самавий қошунларниң Сәрдари болған Пәрвәрдигар,

Бәхитликтур Саңа таянған инсан!■

□83:1-2 «Нәғмичиләрниң бешиға тапшурулуп, «Гиттиф»та челинсун дәп» — «Гиттиф»ниң мүмкинчилиги бар бир мәнаси: «Гат шәһириниң сази».

■83:3 Зәб. 41:1-3; 62:1-3

□83:6 «...қәлбидә көтирилмә йоллар болғанлар» — «көтирилмә йоллар» — көтирип ясалған, Йерусалимға тавап қилидиған йолучилар маңидиған йоллар болса керәк.

□83:7 «Жиға вадисидин өткәндә» — «Жиға вадиси» яки «бака вадиси». Ибраний тилида «бака» биринчидин «жиға»ни билдүриду, иккинчидин бир хил үҗмә дәриғини билдүриду, йәнә «жиғлайдиған дәрәқ» — кесилгән болса дәрәқ сүйи жиғлиғандәк чиқиду. Давут пәйғәмбәр икки қетим бир «Бака вадиси» (йәни «Рәфайим җилғиси»)да ғәлибә қилди һәм әшу йәрдә униң үч җан-дости җенини тәвәккүл қилип униңға су елип кәлди («2Сам.» 5-, 23-бапта). «күз ямғурлири уни бәрикәтләргә толдуриду» — Қанаанда (Пәләстиндә) күз ямғурлири йәрни һайдаш, һәм уруқ селишқа тәйяр қилиду.

□83:10 «Өзүң мәсиһ қилғиниңниң йүзигә илтипат билән қариғин!» — «мәсиһ қилғини», 2-күйдики изаһатларни, шундақла «Тәбирләр»ниму көрүң.

□83:11 «Худайимниң өйиниң босуғисида турғиним яхшидур» — йәнә бир хил тәрҗимиси: «Худайимниң өйидә ишикбақар болғиним яхшидур».

■83:13 Зәб. 2:12; 33:9