Муқеддес Калам (кирил йезиқ) Зәбур 33

33-күй •••• Худаниң меһриванлиғиға мәдһийә •••• «елипбә тәртивилик» күй •••• 1-айәттики изаһатни көрүң.

1-2 Давут язған күй: —

(Давут Абимәләк падишаниң алдида жүрүш-турушини башқичә қиливалғанда, Абимәләк уни һайдивәткән вақитта язған)

|א| Мән һәр қандақ вақитларда Пәрвәрдигарға тәшәккүр-мәдһийә қайтуримән;

Уни мәдһийиләш ағзимдин чүшмәйду.□ ■

3 |ב| Қәлбим Пәрвәрдигарни иптихарлинип мәдһийәләйду,

Мөминләр буни аңлап шатлиқта болиду.

4 |ג| Мән билән биллә Пәрвәрдигарни улуқлаңлар,

Бирликтә Униң намиға мәдһийиләр яңритайли.

5 |ד| Пәрвәрдигарни издидим,

У мениң дуайимни иҗабәт қилди,

Мени басқан барлиқ вәһимә-қорқунучлиримдин қутқузди.

6 |ה| Мөминләр Униңға тәлмүрүп нурланди;

|ו|Йүзлири йәргә қаритилмиди.

7 |ז| Мән пеқир-бечарә Униңға нида қилди,

Пәрвәрдигар аңлап, мени һәммә аваричиликләрдин қутқузди.

8 |ח| Пәрвәрдигарниң Пәриштиси Униңдин әйминидиғанларни қоғдап әтрапиға чедирини тикиду,

Уларни қутқузиду.□

9 |ט| Пәрвәрдигарниң меһриванлиғини тетип, билгин,

Униңға ишинип таянған адәм немидегән бәхитликтур!

10 |י| И Униң муқәддәс бәндилири, Пәрвәрдигардин әйминиңлар!

Чүнки Униңдин әйминидиғанларниң һеч нәрсиси кам болмас.

11 |כ| Күчлүк асланлар озуқсиз қелип ач қалсиму,

Амма Пәрвәрдигарни издигүчиләрниң һеч бир яхши нәрсиси кам болмас.■

12 |ל| Келиңлар балилирим, маңа қулақ селиңлар;

Мән силәргә Пәрвәрдигардин әйминишни үгитип қояй.

13 |מ| Һаятни әтиварлайдиған киши ким?

Кимниң узун вә яхши күнләрни көргүси бар?■

14 |נ| Ундақта тилиңни яманлиқтин тартип жүр,

Ләвлириң мәккарлиқтин нери болсун;

15 |ס| Яманлиқтин айрилип жирақ болуп, гөзәл әмәлләрни қилип жүр;

Аман-хатирҗәмликни издәп, уни қоғлап жүр.□

16 |ע| Пәрвәрдигарниң көзи һәққанийларниң үстидә туриду,

Униң қулиқи уларниң илтиҗалириға очуқ туриду;■

17 |פ| Пәрвәрдигарниң чирайи рәзиллик қилғучиларға қарши чиқар,

Уларниң һәр қандақ нам-хатирилирини йәр йүзидин елип ташлар;

18 |צ| Һәққанийлар илтиҗа қилиду,

Пәрвәрдигар аңлайду, уларни барлиқ азап-мушәққәтлиридин қутқузиду;

19 |ק| Пәрвәрдигар көңли сунуқларға йеқиндур,

Роһи езилгәнләрни қутқузиду.□ ■

20 |ר| Һәққанийлар дуч кәлгән аваричиликләр көптур;

Бирақ Пәрвәрдигар уларни буларниң һәммисидин қутқузиду.■

21 |ש| У һәққанийниң сүйәклирини сақ қалдуриду,

Улардин бирисиму сунуп кәтмәйду.■

22 |ח| Яманлиқниң өзи рәзилләрни өлтүриду;

Һәққанийларға нәпрәтлинидиғанлар гунада қалиду.

23 |פ| Пәрвәрдигар Өз қуллириниң җанлирини бәдәл төләп һөрлүккә чиқириду;

Униңға таянғанлардин һеч кимгә гуна бекитилмәйду.□

□33:1-2 « א аләф, ибраний тилидики биринчи һәрип» — бу күй «елипбә тәртивилик» күй. Һәр бир айәт алдида ибраний һәрипләр көрситилиду (10-күйгә берилгән, «елипбә тәртивилик күй» тоғрилиқ изаһатниму көрүң). «Мән һәр қандақ вақитларда Пәрвәрдигарға тәшәккүр-мәдһийә қайтуримән» — «тәшәккүр-мәдһийә қайтуруш» дегән сөз ибраний тилида «(Худаға) рәхмәт ейтиш», «уни улуқлаш» дегән мәнидә келиду, униң йәнә «Худани хурсән қилиш» дегән мәнасиму бар. «Тәшәккүр-мәдһийә қайтуруш» дегәнниң ибраний тилидики шәкли әрәб тилидики «мубарәкләш» дегән сөзгә охшап кетиду; демәк, Худаға ««барәк» (бәрикәт) йәткүзүш».

■33:1-2 1Сам. 21:13

□33:8 ««Пәрвәрдигарниң Пәриштиси» яки «Пәрвәрдигарниң Әлчиси»» — Тәврат дәвридә интайин алаһидә бир шәхс еди. «Тәбирләр»ни көрүң. «Пәрвәрдигарниң Пәриштиси» бәзи ишларда Худаниң орнида көрүнәтти (мәсилән, «Яр.» 16:7-14, 18-бапни, «Тәбирләр»ниму көрүң).

■33:11 Аюп 4:11

■33:13 1Пет. 3:10

□33:15 «Аман-хатирҗәмликни издәп...» — яки «һәммәйлән билән енақ өтүшкә тиришип,...».

■33:16 Аюп 36:7; Зәб. 32:18; 1Пет. 3:12

□33:19 «Пәрвәрдигар көңли сунуқларға йеқиндур, роһи езилгәнләрни қутқузиду» — бу айәттики «көңли сунуқлар» һәмдә «роһи езилгәнләр», шүбһисизки, товва қилғанларни көрситиду.

■33:19 2Тим. 3:11

■33:20 2Тим. 3:12

■33:21 Юһ. 19:36

□33:23 «Пәрвәрдигар Өз қуллириниң җанлирини бәдәл төләп һөрлүккә чиқириду» — бу йәрдә ишләткән пеил («бәдәл төләп һөрлүккә чиқириду») адәттә қулларни (мәлум баһада) қуллуқтин азат қилиш, һөр қилишни билдүриду.