Muqeddes Kalam (latin yéziq) Zebur 72

72-küy •••• Textke olturidighan padishahning oghli toghruluq dua-tilewet hem bésharet •••• 1-ayettiki izahatni körüng

1 Sulayman üchün: —

I Xuda, padishahqa hökümliringni tapshurghaysen;

Padishahning oghligha Öz heqqaniyliqingni bergeysen. □

2 Shundaq bolghanda u Öz xelqing üchün heqqaniyliq bilen,

Sanga tewe ézilgen möminler üchün adilliq bilen höküm chiqiridu;

3 Taghlar xelqqe tinch-amanliq élip kélidu,

Édirliqlarmu heqqaniyliq bilen shundaq qilidu.

4 Padishah xelq arisidiki ézilgenlerge adil hökümlerni chiqiridu;

U namratlarning balilirini qutquzidu,

Zalimlarni bitchit qilidu.

5 Shundaq bolghanda kün we ay yoq bolup ketmisila,

Ewladtin-ewladqa xelq Sendin eyminidu.□ ■

6 U bolsa goya yéngidin orghan otlaqqa yaghqan yamghurdek,

Yer sughiridighan höl-yéghinlardek chüshidu.■

7 Uning künliride heqqaniylar ronaq tapidu;

Ay yoq bolghuche tinch-amanliq téship turidu.

8 U déngizdin-déngizlarghiche,

Efrat deryasidin yer yüzining chetlirigiche höküm süridu.□

9 Chöl-bayawanda yashawatqanlar uning aldida bash qoyidu;

Uning düshmenliri topilarni yalaydu.

10 Tarshishning we arallarning padishahliri uninggha hediyeler teqdim qilidu,

Shéba we Sébaning padishahlirimu sowghatlar sunidu. □

11 Derweqe, barliq padishahlar uning aldida sejde qilidu;

Pütkül eller uning xizmitide bolidu;

12 Chünki u peryad kötürgen yoqsullarni,

Panahsiz ézilgenlerni qutulduridu; ■

13 U yoqsul-ajizlargha ichini aghritidu,

Yoqsullarning jénini qutquzidu;

14 Ularning jénini zulum-zomigerliktin hörlükke chiqiridu,

Ularning qéni uning neziride qimmetliktur.

15 Padishah yashisun!

Shébaning altunliridin uninggha sunulidu;

Uning üchün dua toxtawsiz qilinidu;

Uninggha kün boyi bext tilinidu;

16 Yer yüzidiki hosul mol bolidu,

Hetta tagh choqqiliridimu shundaq bolidu.

Migh-migh chüshken méwiler Liwandiki ormanlardek tewrinidu;

Sheherdikiler bolsa daladiki ot-yéshilliqtek güllinidu;

17 Uning nami menggüge öchmeydu,

Uning nami quyash yoqalghuche turidu;

Ademler uning bilen özlirige bext tileydu,

Barliq eller uni bextlik dep atishidu.

18 Israilning Xudasi, Perwerdigar Xudagha teshekkür-medhiye bolghay!

Karamet ishlarni Yaratquchi yalghuz Udur!

19 Uning shereplik namigha menggüge teshekkür-medhiye oqulsun!

Uning shan-shöhriti pütkül dunyani qaplighay! Amin! We amin!

20 Yessening oghli Dawutning dualiri shuning bilen tamam boldi. □

Zebur
<
72
>

□72:1 «I Xuda, padishahqa hökümliringni tapshurghaysen; padishahning oghligha Öz heqqaniyliqingni bergeysen» — shübhisizki, bu ulugh bésharetning toluq menisi Sulaymanning özini emes, belki uning ewladi bolghan Mesihni körsitidu. «Sulayman üchün» — bashqa birxil terjimisi «Sulaymanningki» yaki «Sulayman’gha tewe».

□72:5 «Sendin eyminidu» — démek, Xudadin eyminidu.

■72:5 Zeb. 89:36,37

■72:6 2Sam. 23:4

□72:8 «Efrat deryasi» — ibraniy tilida peqet «Derya» déyilidu. Shübhisi yoqki, bu ibare Efrat deryasini körsitidu.

□72:10 «Tarshish.. arallar... Shéba...Séba...» — «Tarshish»ning del qaysi jay ikenliki hazir éniq emes, Ispaniye, shimaliy Afriqa yaki En’gliyeni bildürüshi mumkin. Lékin shübhe yoqki, mushu ayettiki «Tarshish» hem «arallar» déngizdiki eng chet yerlerni bildüridu. «Shéba hem Séba» — hazirqi Erebistanda.

■72:12 Ayup 29:12

□72:20 «Dawutning dualiri shuning bilen tamam boldi» — bu küy Dawut peyghemberning eng axirqi duasi boldi. Biraq «Zebur»ning kéyinki bölümliride biz uning bashqa dua-küylirini uchritimiz.