Muⱪeddes Kalam (yǝngi yeziⱪ) Ⱨekmǝt topliƣuqi 1

Ⱨekmǝt topliƣuqi

«Ⱨǝmmǝ ix bimǝniliktur!»

1 Yerusalemda padixaⱨ bolƣan, Dawutning oƣli «Ⱨekmǝt topliƣuqi»ning sɵzliri: —□

2 «Bimǝnilik üstigǝ bimǝnilik!» — dǝydu «Ⱨekmǝt topliƣuqi» — «Bimǝnilik üstigǝ bimǝnilik! Ⱨǝmmǝ ix bimǝniliktur!»□ ■

3 Ⱪuyax astida tartⱪan japaliridin insan nemǝ paydiƣa erixǝr?□ ■

4 Bir dǝwr ɵtidu, yǝnǝ bir dǝwr kelidu;

Biraⱪ yǝr-zemin mǝnggügǝ dawam ⱪilidu;■

5 Kün qiⱪidu, kün patidu;

Wǝ qiⱪidiƣan jayƣa ⱪarap yǝnǝ aldirap mangidu.

6 Xamal jǝnubⱪa ⱪarap soⱪidu;

Andin burulup ximalƣa ⱪarap soⱪidu;

U aylinip-aylinip,

Ⱨǝrdaim ɵz aylanma yoliƣa ⱪaytidu.

7 Barliⱪ dǝryalar dengizƣa ⱪarap aⱪidu, biraⱪ dengiz tolmaydu;

Dǝryalar ⱪaysi jayƣa aⱪⱪan bolsa,

Ular yǝnǝ xu yǝrgǝ ⱪaytidu.■

8 Barliⱪ ixlar japaƣa tolƣandur;

Uni eytip tügǝtküqi adǝm yoⱪtur;

Kɵz kɵrüxtin,

Ⱪulaⱪ anglaxtin ⱨǝrgiz toymaydu.

9 Bolƣan ixlar yǝnǝ bolidiƣan ixlardur;

Ⱪilƣan ixlar yǝnǝ ⱪilinidu;

Ⱪuyax astida ⱨeqⱪandaⱪ yengiliⱪ yoⱪtur.■

10 «Mana, bu yengi ix» degili bolidiƣan ix barmu?

U bǝribir bizdin burunⱪi dǝwrlǝrdǝ alliⱪaqan bolup ɵtkǝn ixlardur.

11 Burunⱪi ixlar ⱨazir ⱨeq ǝslǝnmǝydu;

Wǝ kǝlgüsidǝ bolidiƣan ixlarmu ulardin keyin yaxaydiƣanlarning esigǝ ⱨeq kǝlmǝydu.□

Sulaymanning tǝjribisi

12 Mǝnki ⱨekmǝt topliƣuqi Yerusalemda Israilƣa padixaⱨ bolƣanmǝn; 13 Mǝn danaliⱪ bilǝn asmanlar astida barliⱪ ⱪilinƣan ixlarni ⱪetirⱪinip izdǝxkǝ kɵngül ⱪoydum —

Hulasǝm xuki, Huda insan balilirining ɵz-ɵzini bǝnd ⱪilip upritix üqün, ularƣa bu eƣir japani tǝⱪdim ⱪilƣan! 14 Mǝn ⱪuyax astidiki barliⱪ ⱪilinƣan ixlarni kɵrüp qiⱪtim, —

Mana, ⱨǝmmisi bimǝnilik wǝ xamalni ⱪoƣliƣandǝk ixtin ibarǝttur.

15 Əgrini tüz ⱪilƣili bolmas;

Kǝmni toluⱪ dǝp saniƣili bolmas.□

16 Mǝn ɵz kɵnglümdǝ oylinip: «Mana, mǝn uluƣlinip, mǝndin ilgiri Yerusalem üstigǝ barliⱪ ⱨɵküm sürgǝnlǝrdin kɵp danaliⱪⱪa erixtim; mening kɵnglüm nurƣun danaliⱪ wǝ bilimgǝ erixti» — dedim.

17 Xuning bilǝn danaliⱪni bilixkǝ, xuningdǝk tǝlwilik wǝ ǝhmiⱪanilikni bilip yetixkǝ kɵngül ⱪoydum; muxu ixnimu xamal ⱪoƣliƣandǝk ix dǝp bilip yǝttim. 18 Qünki danaliⱪning kɵp boluxi bilǝn azab-oⱪubǝtmu kɵp bolidu; bilimini kɵpǝytküqining dǝrd-ǝlimimu kɵpiydu.

□1:1 «Ⱨekmǝt topliƣuqi» — yazƣuqi ɵzining Sulayman ikǝnlikini kɵrsitidu. Bu nuⱪta 16-ayǝt, 2:7-ayǝt ⱪatarliⱪlarda ispatlinidu. Kitabning nami ǝsliy ibraniy tilida «Ⱪoⱨǝlǝt» deyilidu, uning mǝnisi: «topliƣuqi» «rǝtligüqi» degǝn mǝnidǝ bolup, biz uni «ⱨekmǝt topliƣuqi» (demǝk, «oy-pikirlǝrni rǝtligüqi») dǝp tǝrjimǝ ⱪilduⱪ. Bǝzilǝr uni yǝnǝ «Tǝlim bǝrgüqi», «Wǝz eytⱪuqi» dǝpmu tǝrjimǝ ⱪilidu.

□1:2 «Bimǝnilik üstigǝ bimǝnilik!» — ibraniy tilida «bimǝniliklǝrning bimǝniliki!». Bu huddi «Küylǝrning küy» «ǝng güzǝl küy» deyilgǝngǝ ohxaxtur, «bimǝniliklǝrning bimǝniliki» bǝlkim «ⱨayatliⱪ alǝmdǝ «ǝng bimǝnilik ixtur!»» degǝnni bildürüxi mumkin.

■1:2 Zǝb. 62:9; 144:4

□1:3 «Ⱪuyax astida» — bu «Ⱨekmǝt topliƣuqi»diki aqⱪuqluⱪ sɵzdur. Yazƣuqining bayanlirining kɵpinqisi «asmandin (Hudadin) kǝlgǝn wǝⱨiy» bilǝn ǝmǝs, bǝlki «ⱪuyax astida» yaki «aptap asti»diki kɵzⱪarax bilǝn eytilƣan. U ⱪǝstǝn xundaⱪ kɵz-ⱪaraxni sɵzlǝydu. «Kirix sɵz» wǝ «ⱪoxumqǝ sɵz»imiznimu kɵrüng.

■1:3 Top. 2:22; 3:9

■1:4 Zǝb. 104:5

■1:7 Ayup 38:8, 9, 10; Zǝb. 104:8-10

■1:9 Top. 3:15

□1:11 «... kǝlgüsidǝ bolidiƣan ixlarmu ulardin keyin yaxaydiƣanlarning esigǝ ⱨeq kǝlmǝydu» — demǝk, yengi dǝwrdǝ «yengi» deyilgǝn bir ix qiⱪⱪan bolsa, xu ix ǝmǝliyǝttǝ burunⱪi dǝwrdlǝrdǝ mǝwjut bolƣan ixtur. Ⱨazirⱪi dǝwrdikilǝr burunⱪi dǝwrlǝrni bilmǝydu yaki untuƣan, bu ixni «yengi!» dǝydu.

□1:15 «... toluⱪ dǝp saniƣili bolmas» — demǝk, tǝminligili bolmas.