1 On birinqi yili, ayning birinqi künidǝ xundaⱪ boldiki, Pǝrwǝrdigarning sɵzi manga kelip mundaⱪ deyildi: — □«on birinqi yil» — sürgün bolƣanliⱪining 11-yili idi. Bǝlkim on birinqi ay boluxi mumkin.

2 I insan oƣli, Turning Yerusalem toƣruluⱪ: «Waⱨ! Yahxi boldi! Əllǝrning dǝrwazisi bolƣuqi wǝyran boldi! U manga ⱪarap ⱪayrilip eqildi; uning wǝyran ⱪilinixi bilǝn ɵzümni toyƣuzimǝn!» degini tüpǝylidin, 3 — Xunga Rǝb Pǝrwǝrdigar mundaⱪ dǝydu: — Mana, i Tur, Mǝn sanga ⱪarximǝn, dengiz dolⱪunlarni ⱪozƣiƣandǝk, kɵp ǝllǝrni sǝn bilǝn ⱪarxilixⱪa ⱪozƣaymǝn; 4 ular Turning sepillirini bǝrbat ⱪilip, uning munarlirini qeⱪip yoⱪitidu. Uning üstidiki topilirini ⱪirip taxlap, uni taⱪir tax ⱪilip ⱪoyimǝn. 5 U pǝⱪǝt dengiz otturisidiki torlar yeyilidiƣan jay bolidu; qünki Mǝn xundaⱪ sɵz ⱪildim, dǝydu Rǝb Pǝrwǝrdigar; u ǝllǝr üqün olja bolup ⱪalidu. 6 Uning ⱪuruⱪluⱪta ⱪalƣan ⱪizliri ⱪiliq bilǝn ⱪirilidu; xuning bilǝn ular Mening Pǝrwǝrdigar ikǝnlikimni tonup yetidu.□«ⱪuruⱪluⱪta ⱪalƣan ⱪizliri» — bǝlkim turƣa beⱪindi bolƣan yezilarni kɵrsitidu. 8-ayǝtnimu kɵrüng.
Bu bexarǝt toƣruluⱪ yǝnǝ «ⱪoxumqǝ sɵz»imizni kɵrüng.

7 — Qünki Rǝb Pǝrwǝrdigar mundaⱪ dǝydu: — Mana, Mǝn Tur bilǝn ⱪarxilixixⱪa Babil padixaⱨi Neboⱪadnǝsar, yǝni «padixaⱨlarning padixaⱨi»ni, atlar, jǝng ⱨarwiliri bilǝn, atliⱪ qǝwǝndazlar, ⱪoxun wǝ zor bir top adǝmlǝr bilǝn ximal tǝripidin qiⱪirip epkelimǝn. 8 U ⱪuruⱪluⱪta ⱪalƣan ⱪizlirini ⱪiliq bilǝn soyidu, sanga muⱨasirǝ potǝylirini ⱪuridu, sepilƣa qiⱪidiƣan dɵnglükni yasaydu, sanga ⱪarap ⱪalⱪanlirini kɵtüridu. 9 U sepilliringƣa bɵsküqi bazƣanlarni ⱪaritip tiklǝydu, ⱪoral-paltiliri bilǝn munarliringni qeⱪip ƣulitidu. 10 Uning atlirining kɵplükidin ularning kɵtürgǝn qang-topisi seni ⱪaplaydu; sepilliri bɵsülgǝn bir xǝⱨǝrgǝ bɵsüp kirgǝndǝk u sening ⱪowuⱪliringdin kirgǝndǝ, sepilliring atliⱪ ǝskǝrlǝrning, qaⱪlarning ⱨǝm jǝng ⱨarwilirining sadasi bilǝn tǝwrinip ketidu. 11 Atlirining tuyaⱪliri bilǝn u barliⱪ rǝstǝ-koqiliringni qǝylǝydu; u puⱪraliringni ⱪiliq bilǝn ⱪiridu, küqlük tüwrükliring yǝrgǝ yiⱪilidu.■Yǝx. 5:28; Yǝr. 47:3

12 Ular bayliⱪliringni olja, mal-tawarliringni ƣǝnimǝt ⱪilidu; ular sepilliringni buzup ƣulitip, ⱨǝxǝmǝtlik ɵyliringni harabǝ ⱪilidu; ular sening taxliring, yaƣaq-limliring wǝ topa-qangliringni dengiz suliri iqigǝ taxlaydu. 13 Mǝn nahxliringning sadasini tügitimǝn; qiltarliringning awazi ⱪaytidin anglanmaydu. ■Yǝx. 24:7, 8; Yǝr. 7:34; 16:9 14 Mǝn seni taⱪir tax ⱪilimǝn; sǝn torlar yeyilidiƣan bir jay bolisǝn, halas; sǝn ⱪaytidin ⱪurulmaysǝn; qünki Mǝnki Pǝrwǝrdigar xundaⱪ degǝnmǝn, dǝydu Rǝb Pǝrwǝrdigar.□«Mǝn seni taⱪir tax ⱪilimǝn; sǝn torlar yeyilidiƣan bir jay bolisǝn, halas; sǝn ⱪaytidin ⱪurulmaysǝn» — bu bexarǝt awwal Babilning imperatori Neboⱪadnǝsar, andin Grek imperatori «Büyük Iskǝndǝr» tǝrǝpliridin ǝmǝlgǝ axuruldi. Turning ⱨazirⱪi ǝⱨwali dǝl muxu ayǝttǝ eytilƣandǝktur. Bu ixlar toƣruluⱪ yǝnǝ «ⱪoxumqǝ sɵz»imizni kɵrüng.

15 Rǝb Pǝrwǝrdigar Turƣa mundaⱪ dǝydu: — Sǝn ƣulap kǝtkiningdǝ, yarilanƣanlar aⱨ-zarliƣinida, otturungda ⱪirƣin-qapⱪun ⱪilinƣanda, dengizning qǝt yaⱪiliri tǝwrinip kǝtmǝmdu? 16 Dengizdiki xaⱨzadilǝr tǝhtliridin qüxüp, tonlirini biryaⱪⱪa taxlap, kǝxtilik kiyim-keqǝklirini seliwetidu; ular ɵzlirini ⱪorⱪunq-titrǝk bilǝn pürkǝydu; ular yǝrgǝ olturup, ⱨeq tohtawsiz titrǝp, sanga ⱪarap sarasimigǝ qüxidu. 17 Ular sǝn üqün bir mǝrsiyǝni oⱪup sanga mundaⱪ dǝydu: —

«I aⱨalǝng dengizdikilǝrdin bolƣan, dangⱪi qiⱪⱪan,

Dengiz üstidin küqlük ⱨɵküm sürgǝn,

Ɵz wǝⱨxǝtliringni barliⱪ dengizda turuwatⱪanlarƣa salƣan xǝⱨǝr!

Sǝn wǝ sǝnda turuwatⱪanlar nǝⱪǝdǝr ⱨalak bolƣan!■Wǝⱨ. 18:9-19

18 Ⱨazir sening ƣulap kǝtkǝn kününgdǝ,

Dengiz boyidikilǝr titrǝp ketidu;

Dengizdiki arallar wǝ ⱪirƣaⱪtikilǝr sening yoⱪ bolup kǝtkiningdin dǝkkǝ-dükkigǝ qüxüp ⱪaldi».□«Ⱨazir sening ƣulap kǝtkǝn kününgdǝ, dengiz boyidikilǝr titrǝp ketidu...» — bu bexarǝtning kɵp jǝⱨǝtlǝrdǝ ǝmǝlgǝ axuruluxi toƣruluⱪ «ⱪoxumqǝ sɵz»imizni kɵrüng.

19 — Qünki Rǝb Pǝrwǝrdigar mundaⱪ dǝydu: —

«Mǝn seni adǝmzatsiz xǝⱨǝrlǝrdǝk, harabǝ xǝⱨǝr ⱪilƣinimda,

Mǝn üstünggǝ dengiz qongⱪurluⱪlirini qiⱪirip seni qɵkürginimdǝ,

Uluƣ sular seni besip yapⱪanda,

20 Xu tapta Mǝn seni ⱨangƣa qüxkǝnlǝr bilǝn billǝ qüxürimǝn,

Ⱪǝdimki zamandikilǝrning ⱪatariƣa qüxürimǝn;

Seni yǝrning tegiliridǝ turƣuzimǝn;

Seningdǝ ⱪaytidin adǝmzat bolmasliⱪi üqün,

Seni ⱪǝdimki harabilǝr arisiƣa,

Ⱨangƣa qüxkǝnlǝr bilǝn billǝ boluxⱪa qüxürimǝn;

Biraⱪ tiriklǝrning zeminida bolsa güzǝllik tiklǝp ⱪoyimǝn;□«Biraⱪ tiriklǝrning zeminida bolsa güzǝllik tiklǝp ⱪoyimǝn» — baxⱪa birhil tǝrjimisi: «Sǝn ⱪaytidin tiriklǝrning zeminida ⱨɵrmǝtkǝ sazawǝr orunda bolmaysǝn».

21 Mǝn seni baxⱪilarƣa bir agaⱨi-wǝⱨxǝt ⱪilimǝn;

Sǝn ⱪaytidin ⱨeq bolmaysǝn;

Ular seni izdǝydu, biraⱪ sǝn mǝnggügǝ tepilmaysǝn»

— dǝydu Rǝb Pǝrwǝrdigar.